Ba-Yígúrə́-Jə-Tiu dun tə wulə Zwerizalɛmə yuu wa
60
1 Zàn yɩɩ nə, n pɩpɩlɩ!Cɩ́gá, n poni twi!
Ba-Yígúrə́-Jə-Tiu dun tə
pɛ́n n yuu wa ndə yɩcaʋ nə.
2 Cɩ́gá, yikunu púə́ tɩa tə nə,
yikunu bìrə̀n púə́ lalʋʋ tə yuu nə.
Yá Ba-Yígúrə́-Jə-Tiu wulə n mʋ̀ yuu con,
ʋ dun tə pɛ́n n yuu con ndə yɩcaʋ nə.
3 Lʋʋ dwíə́ wá va n poni wa,
yá n poni ga wá pɩ̀rɩ̀ pɛ̀gá.
4 Zɩ̀n n yáá, n ywàń n kɩkarɩ:
Ba mama kun duən nə,
ba bɩ̀àn n con.
N bɩ̀á tə naŋa yiŋʋnɩ ba bɩ̀àn,
ba guə n bwɩ̀ɩ́ tə ba ja bɩ̀àn.
5 Máŋá tə n nə wá na kʋ nətʋ tə,
n bɩcan wá sú də pupwən,
kʋ pa n làrɩ̀,
máŋá tə wa nɩ́á yuu bwərə jɩjə wiən tə
nə wá viviri tə yáá tə kə n con,
máŋá tə wa lʋʋ dwíə́ tə jɩjə tə
nə wá bà n con.
6 Nyʋgʋmɛ kapʋpʋ wá sú n lʋʋ nii tə.
Kʋ yɩ Madɩan də Efa tɩ̀án nyʋgʋmɛ bálɩ́,
yá tə mama yɩ ba wá ja nan Saba, ba bà.
Tə wá zɩn sɩ́án də wusinə tə ja bà,
yá ba wá bʋ Ba-Yígúrə́-Jə-Tiu nə,
də ba waa mama.
7 Kedarə tɩ̀án vàná tə mama wá kun duən nə n con.
Nebayɔtə dwíí pabɩran tə wá jì n mʋ̀ nyiən.
N wá ja tə n ma fwa joŋi tə ba nə sʋ̀rɩ́*,
n pa nə, à joŋi bwálɩ́ tə yuu wa,
à ga wá sɛ̀ à jon tə,
yá à wá pa à dìə̀ tə nə súə́ də à dun tə, ja fɩra.
8 Bə̀rə́ nə piri ndə bakwan nə?
Bə̀rə́ nə piri ndə gunponi nə piri
tə zwɩ tə pwalan wa?
9 Cɩ́gá, mʋʋ titəŋi wa lʋʋ níə́ dwíə́ tə ken ba yala à nə,
yá nɩ́á yuu bwərə nəfaran tə nə vəli yiŋʋnɩ wulə yáá,
sə tə ja n bɩ̀á tə, tə pìí tə nan yiŋʋnɩ tə bà,
də ba wárʋ́ də ba sɩ́án,
Ba-Yígúrə́-Jə-Tiu, n tíú Yɩɩ tə yɩrɩ,
Yɩzərayɛlə lɩ̀à Yɩɩ tə yɩrɩ, ʋ nə yɩ parɩ*,
ʋ ga pɩn n jə dun.
10 Vərə bɩ̀á wá pìí ba lwà n biritaŋan tə,
yá ba pɛ̀gá wá tʋn ba pa mʋ́.
Cɩ́gá, à lɩŋa yà zàn n yuu wa,
kʋ pa à mà mʋ́,
yá à pubwanʋ tə wa, à dəri n yinəgə.
11 N mimiən wá súrí tə dʋgʋ, máŋá mama,
tə bá sun yɩcaʋ wa, tə ma bá sun tɩtɩn nə,
sə lʋʋ dwíə́ tə jɩjə wiən tə wànɩ́ tə zʋ n con,
ba pɛ̀gá ga pú tə kwa.
12 Cɩ́gá, lʋʋ dwíí tə, nə à yə̀ə́ payuu tə kʋ nə wá vɩ sə kʋ tʋn kʋ pa mʋ́, wá jɛ́n tɩa yuu wa. Tə mʋ̀ lʋʋ dwíə́ təntə wá cʋ̀gʋ̀ mɩ́ámɩ́án.
13 Liban pún tə dun tə wá bà n con,
nyənbori tɩ̀án, də lən, də zɩnɛɛ mama
wá twá duən tə bà,
tə nàn à wúlú bwálɩ́ tə, sə kʋ ja fɩra,
yá à wá pa à nɛɛ yipaa bwálɩ́ tə ja dun.
14 Lɩ̀à tə yà nə fɩfɩn mʋ́ bɩ̀á wá bà,
ba kwá tɩa n yáá con,
yá lɩ̀à tə mama ba yà nə fʋfʋlɩ mʋ́,
wá tʋ ba nadwana yuu n nɛɛ də̀ń.
Ba wá bon mʋ́ «Ba-Yígúrə́-Jə-Tiu tɩʋ!»
«Siyon*, tɩʋ tə nə yɩ Yɩzərayɛlə lɩ̀à Yɩɩ tə,
ʋ nə yɩ parɩ tɩʋ!»
15 Ba yà culi mʋ́,
kʋ pa ba vɩ mʋ́ ba dʋgʋ,
lìù mama ba n con twi.
Yá à wá pa n jì yɩrʋ won,
máŋá mama wuuu.
À wá pa n jì pupwən won,
n pa dwíə́ tə mama nə,
máŋá də máŋá mama wuuu.
16 N wá ŋʋ̀à lʋʋ dwíə́ tə də ba pɛ̀gá yɩlɩ nɩ́á.
Mə kʋ wá twá nətʋ n ma lwarɩ
də à mʋ̀ nə yɩ Ba-Yígúrə́-Jə-Tiu,
n jonu tə ʋ nə yə̀ mʋ́ ʋ jon,
Zwakɔbə Yɩɩ tə ʋ dɩ̀àn nə dwə tə mɛ.
17 Cɩnɩan bwálɩ́ nə, à wá pa mʋ́ sɩ́án,
yá lugu bwálɩ́ nə, à wá pa mʋ́ wárʋ́,
yá dàʋ̀ bwálɩ́ nə, à wá pa mʋ́ cɩnɩan,
yá kapana bwálɩ́ nə, à wá pa mʋ́ lugu.
Yá à wá tún bɩcan sìə́, sə tə ywàń n yuu,
à ga tún cɩ́gá cwəŋə, sə ka də́ dɩ̀àn n yuu wa.
18 Ba kʋ́ʋ̀ bá nì də lɩ̀à tʋŋa dɩ̀àn
duən yɩra, n lʋʋ nii tə wa,
nə à yə̀ə́ də ba vɩrɩ lɩ̀à,
nə à yə̀ə́ də cʋcʋran tʋŋa
n lʋʋ nii tə sɩswɩan wa.
N wá dɩ n biritaŋan tə yɩrɩ «Jonu»,
n ga dɩ n mimien yɩrɩ «Bʋra!»
19 Kʋ kʋ́ʋ̀ bá ya yɩcaʋ tə
nə wá ya n poni tɩpʋrɩ wa,
kʋ kʋ́ʋ̀ bá ya cànà tə
nə wá pɩ̀rɩ̀ mʋ́ də ka poni tɩtɩn nə,
Ba-Yígúrə́-Jə-Tiu dàń nə wá ya n poni,
n tíú Yɩɩ tə nə wá pɩ̀rɩ̀ mʋ́ də ʋ dun tə,
máŋá mama wuuu.
20 N yɩcaʋ kʋ́ʋ̀ bá zʋ,
yá n cànà də kʋ́ʋ̀ bá zʋ yikunu.
Cɩ́gá, Ba-Yígúrə́-Jə-Tiu nə wá ya n poni,
máŋá mama wuuu.
N lúə́ pucʋnɩ dɩan wá zwɛ̀.
21 N lalʋʋ tə mama dàń wá ya cɩ́gá tɩ̀án,
yá ba wá tɩnɩ lʋʋ nii tə máŋá mama wuuu.
Ba yɩ ndə tɩ̀ʋ́ dəkuu nə,
à nə cwɛn, yá kʋ pɛ́n.
Ba yɩ à jɩ̀àn tʋtʋŋɩ,
sə à ma bɩrɩ à dun tə.
22 Ba dìì tə wa dìə̀ tə nə ba dáá,
wá pùlì ka yí lɩ̀à mʋ̀rʋ̀,
yá ba dwíə́ tə wa dwíí tə nə mun,
wá pùlì kʋ jì lʋʋ dwíí kʋ nə jə dɩ̀àn.
À mʋ̀ Ba-Yígúrə́-Jə-Tiu wá pa
yìə̀n təntə nii sú lala,
də tə máŋá nə yí.