Yoo tə Yɩzərayɛlə lɩ̀à yolwana tə nə ja bà
59
1 Ɔn ɔn, Ba-Yígúrə́-Jə-Tiu vàn tà kukuə,sə kʋ pa ʋ wàrɩ̀ aba ʋ joŋə,
ʋ zɩan ma wà bwɩn,
sə kʋ pa ʋ ba á kori nə̀ń.
2 Yá kʋ dàń nə yɩ á yolwana tə nə pwɛ̀
á də á tíú Yɩɩ duən nə,
kʋ yɩ á cʋna tə nə pɩn
ʋ viviri ʋ kwa ʋ ma sà aba,
kʋ pa ʋ ba á kori nə̀ń.
3 Cɩ́gá, á jɩ̀àn cʋ̀gʋ̀ də jana,
á jɩfwɩ ga tà də yolwana.
Á nii ba cɩ́gá swɩ̀n,
á nəndəli ga ŋʋŋwɩn kʋ̀nkʋ̀n yìə̀n.
4 Lìù tə̀lə́ ʋ nə ja cɩ́gá cwəŋə yoo
ʋ vəli bʋra bwálɩ́ nə,
lìù mama ba cɩ́gá nə twá,
ndə kʋ nə mɛ nətʋ,
ʋ ma swɩ̀n ʋ zɩga ʋ don nə.
Á ba dansɩa won jə,
á nə nyɩ́n kʋ yuu wa,
yá á swɩ̀n sʋ̀ràn tə nə ba də̀ń jə.
Á vʋrɩ nətʋ á nə wá twá,
á ma kə càn lɩ̀à nə,
yá lwanɩ nə kʋ yàá ja bà.
5 Á vàlɩ̀ dəkwaa cala tə lwen,
yá lìù nə dí á càlɩ̀, ʋ yàá tɩ,
lìù ga nə lwə kʋ nədʋ,
bancaŋʋ nə yàá nan kʋ wa.
Á swɩ nənanʋ gantwɛn,
6 yá á gantwɛn wàrɩ̀ gànʋ̀ tə jì,
á jɩɩn tʋ̀tʋ̀nán tə wàrɩ̀ á yɩra nə tə pwí.
Á tʋtʋnɛɛ tə yɩ lwanɩ tʋtʋnɛɛ,
yá wʋlʋŋʋ súə́ á jɩ̀àn.
7 Á nɛɛ lɩŋa tɩa, sə á ma tʋn lwanɩ,
á bɩbarɩ sə á lwá lìù tə nə wà yoo cʋ̀gʋ̀ jana.
Yolwana ka tʋn yoo nə súə́ á pubʋŋɩ,
á nə twá bwálɩ́ nə,
kʋ yàá sú də pucʋnɩ də cʋcʋran.
8 Á yəri bɩcan sìə́ cwəŋə bwálɩ́,
yá yoo tə nə twá cɩ́gá nə
ndə kʋ nə mɛ nətʋ tə̀lə́ á fìù yuu wa.
Á túŋə́ coŋi gugwələn,
yá lìù tə mama ʋ nə twá tə,
ʋ ba bɩcan sìə́ jə.
Yɩɩ lɩ̀à tə lwarɩ də ba tʋn cʋna
9 Kʋ mʋ̀ nə pɩn, kʋ tə nə twá cɩ́gá nə
ndə kʋ nə mɛ nətʋ ŋʋ́ná də nəba,
yá cɩ́gá cwəŋə bá nə yɩra yí.
Nə yà jə poni yala,
yá nə̀ń kʋ nə, kʋ yɩ yikunu!
Nə yà dànɩ̀ sə poni pɩ̀rɩ̀ nəba,
yá nə̀ń kʋ nə, nə yɩ nə vəli yikunu wa.
10 Nə yɩ nə tɩtɛ nə ma vəli,
ndə lilirən nə tɩtɛ bírə́ yɩra,
nə yɩ nə tɩtɛ nə ma vəli,
ndə lɩ̀à nə ba nə ba yɩ́á jə.
Nə mà nə nɛɛ yɩcakʋrʋ wa,
ndə didənbibirə nə.
Nə yɩra zurə, yá nə yɩ ndə tɩga nə.
11 Nə mama ŋʋ̀nɩ̀ ndə kənyenkuru nə,
nə ga ŋʋŋwɩn ndə gunponi nə.
Nə yà jə kʋ tə yala, kʋ nə twá cɩ́gá nə
ndə kʋ nə mɛ nətʋ,
yá nə wà won mama nɩ!
Nə yà jə jonu yala,
yá ʋ ŋʋ́ná də nəba!
12 Cɩ́gá, nə cʋna tə dáá zənzən, n yáá con,
yá nə lwanɩ tə swɩ̀n tə zɩga nə nə.
Nə cʋna tə wulə də nəba,
nə ga yə̀ə́ yolwana tə nə nə tʋn:
13 Nə vɩga Ba-Yígúrə́-Jə-Tiu nii,
nə ga ya níə́ bələ tɩ̀án ʋ yáá con.
Nə viviri nə kwa nə ma sà nə tíú Yɩɩ tə.
Ka tʋn wʋlʋŋʋ də ka vɩ nii yoo
nə naŋa nə nii wa.
Nə tanɩ kʋ̀nkʋ̀n sʋ̀ràn,
nə tún nə bɩcanɩ wa.
14 Kʋ nətʋ pɩn yoo tə nə twá cɩ́gá nə
ndə kʋ nə mɛ nətʋ fwarɩ kʋ yá nəba,
yá cɩ́gá cwəŋə dàń ŋʋ́ná də nəba.
Cɩ́gá mà ka nɛɛ kanporu wa,
yá ka ya təgətəgə yoo kʋ́ʋ̀ ba swɩ̀n.
Jonu bɩ̀àn sə ʋ jon Siyon tɩ̀án
15 Cɩ́gá jɛ́n, yá ba vɩrɩ lìù tə
nə cɩ̀ ʋ tɩ̀àn nə də yolwan fwaŋʋ.
Ba-Yígúrə́-Jə-Tiu nɩ də,
kʋ tə nə twá cɩ́gá nə,
ndə kʋ nə mɛ nətʋ kʋ́ʋ̀ tə̀lə́,
yá kʋ nətʋ tə ba ywán də wá.
16 Ʋ nɩ də ladʋa tətə tə̀lə́,
yá ʋ pùə́ cʋ̀gʋ̀,
lìù mama nə ba lá taŋa yɩrɩ.
Ʋ tətə vàn nə pɩn ʋ də́ dɩ̀àn,
yá ʋ cɩ́gá cwəŋə tə yuu wa nə
ʋ nyɩ́n ʋ ma tʋŋa.
17 Ʋ zʋa cɩ́gá cwəŋə,
ndə kwatara lugu gànʋ̀ nə,
ʋ ga pú jonu lugu yupuu ʋ yuu nə.
Ʋ fwi ʋ lɩŋa ndə gànʋ̀ nə, ʋ nə zʋa,
ʋ ga ja sɩsabaan ʋ bɩ́bárɩ́ ʋ tɩ̀àn, ndə gansara nə.
18 Ʋ wá ŋwɩ́n kʋ tə nə mɛ
də lìù mama tʋtʋnɛɛ, ʋ pa wá:
Ʋ wá fwi ʋ lɩŋa, ʋ jarɩduən yuu wa,
ʋ ga ŋwɩ́n kʋ tə nə mɛ də ʋ dʋŋa, ʋ pa ba.
Ʋ wá ŋwɩ́n kʋ tə nə mɛ də mʋʋ titəŋi wa
lʋʋ níə́ tə də lɩ̀à, ʋ pa ba.
19 Yá kʋ nə zɩgɩ yɩɩ yizwɩa con,
ba wá dəri Ba-Yígúrə́-Jə-Tiu fən,
ba ga pa wá dun,
kʋ ja va kʋ yí yɩɩ yipɩan con.
Cɩ́gá, Ba-Yígúrə́-Jə-Tiu wá bà
ndə nacoru nɩ́á nə, dwavʋʋ nə yigə.
20 Jonu bɩ̀àn sə ʋ yə̀ Siyon* tɩ̀án ʋ jon,
ʋ bɩ̀àn sə ʋ jon Zwakɔbə dìə̀ lɩ̀à tə,
ba nə viviri ba kwa ba ma sà ba cʋna tə,
Ba-Yígúrə́-Jə-Tiu nii sʋgʋ nə!