Nivori tə nə twá Yɩɩ fɩra nə
58
1 Ba-Yígúrə́-Jə-Tiu swɩ̀n, ʋ wʋ́:«Bori n kə də n kori dɩ̀àn mama,
dàn ká cɩ̀ n kori nə!
Zɩn n kori yɩɩ nə ndə nabwanʋ nə,
n ma swɩ̀n à lalʋʋ tə cʋna tə, n bɩrɩ ba,
n ga swɩ̀n Zwakɔbə dìə̀ tə lwanɩ tə, n bɩrɩ ba!
2 Ba twarɩ nə dɩɩn mama,
ba pɩ̀à sə ba lwarɩ à coŋi tə,
ndə dwíí nə, ba nə tʋŋa kʋ tə nə tì cɩ́gá cwəŋə,
yá ba wà kʋ tə ba Yɩɩ tə nə bɩrɩ,
sə ba twá kʋ nə, ndə kʋ nə mɛ nətʋ, vɩ ba dʋgʋ.
Ba lòrì nə sə à bʋ̀rɩ̀ bʋra,
ka twá cɩ́gá nə, ndə kʋ nə mɛ nətʋ,
ba swə sə ba yí à mʋ̀ Yɩɩ yɩra.
3 Ba swɩ̀n à con, ba wʋ́:
“Nə nivori tə nywarɩ nə yɩ bɛ̀ɛ̀,
də n nə ba nəba na?
Nə nə kəni nə tɩ̀àn càn wa,
nə ma muŋə nə tɩ̀àn tə nywarɩ nə yɩ bɛ̀ɛ̀,
də n nə yəri də nə tʋŋa kʋ nətʋ tə?”
Dɩɩn tə á nə vwə á nii,
á tə yàá tʋŋa á tətə fɩra yìə̀n,
yá á fɩfɩn á tʋ̀tʋ̀nà tə mama.
4 Á yàá vwa á nii, yá á dɩ tʋ́tʋ̀ná də jara,
də á mà duən wʋlʋŋʋ mà də jɩgulə.
Á nə vwə á nii, á ba tʋŋa ndə á nə mɛ
sə á tʋn nətʋ kʋ dɩɩn nə,
sə kʋ pa à nì á yɩjʋnɩ lanworu wa.
5 Mə nivori təntə yiri nə à wʋ́ ba fwa,
dɩɩn tə nə ləzwənə nə mɛ
sə ʋ kə ʋ tɩ̀àn càn wa,
ʋ ma mun ʋ tɩ̀àn naaa?
Kʋ yɩ ka ziri yuu tɩa ndə mɩncanɩ nə,
ka ga zʋ pucʋnɩ gànʋ̀,
ka ja pə̀ń tʋntʋnʋ wa ka bibili naaa?
Mə kʋ nə á boŋə nivori,
dɩɩn tə kʋ nə twá à mʋ̀ Ba-Yígúrə́-Jə-Tiu fɩra nə?
6 Ɔn ɔn! Nə̀ń nivori tə, kʋ nə twá à fɩra nə:
Kʋ yɩ sə á kʋ̀rɩ̀ wʋlʋŋʋ banzala tə,
sə á kʋ̀rɩ̀ ywə́ŋə́ bɩan dàʋ̀ tə, sə ba tɩnɩ ba tɩ̀àn,
sə á dʋgʋ lɩ̀à tə ba nə fɩfɩn, sə ba tɩnɩ ba tɩ̀àn,
á ga yá á pa yóŋí tʋ̀tʋ̀nán yiri mama zwɛ̀.
7 Kʋ yɩ sə á tara á wodiu də lìù tə,
ʋ nə ba jə ʋ də́,
sə á ga jon zʋra tə nə bá yipaa bwálɩ́ jə,
á kə á dìə̀ wa.
Kʋ yɩ sə á pú lìù tə cavɩra nə,
á nə nɩ də ʋ ba gànʋ̀ jə ʋ zwɩ,
yá á dàn ká viviri á kwa á ma sà á nubiu.»
8 Á poni dàń wá pɛ́n,
ndə tɩbɩlakʋnʋ poni nə,
yá á wá pìí á na yazurə lala.
Cɩ́gá cwəŋə wá ya á yáá, ka va,
yá Ba-Yígúrə́-Jə-Tiu dun tə wá ya á kwa,
tə cɩ̀ á nə.
9 Á dàń wá bon á kə Ba-Yígúrə́-Jə-Tiu nə,
yá ʋ wá le aba.
Á wá bubwi, á pɩ̀à sáŋʋ́,
yá ʋ wá swɩ̀n, ʋ wʋ́: «Nə̀ń nə!»
Də á nə lɩ yóŋí tʋ̀tʋ̀nán tə, á titəŋi wa,
á ga yá ka fɩfaga jɩfwa lɩ̀à nii nə,
də ka swɩ̀n sʋkʋkwɩnan lɩ̀à con,
10 də á nə tarɩ á wodiu də lìù tə,
ʋ nə ba jə ʋ də́,
də á nə pɩn lalaŋʋ də́ ʋ sú,
á poni wá pwin tə nan yikunu wa,
yá á yikunu wá ya ndə yɩcakʋrʋ nə.
11 Ba-Yígúrə́-Jə-Tiu wá kə aba cwəŋə wa máŋá mama,
ʋ wá pa á də́ á sú, tɩkʋrʋ bwálá wa,
ʋ ga pa á nandaran pìí tə ja dɩ̀àn.
Á wá ya ndə dəŋə kəduə nə, nɩ́á nə yí ka,
ndə nabuliyii nə, kʋ nɩ́á nə bá wɩ.
12 Yá lɩ̀à wá ya á wa, ba nə wá pìí
ba lwà dibwərən nədwara tə,
yá á wá pìí á lwà dìì dəkurən tə wa,
ba nə vɩga ba dʋgʋ, kʋ máŋá ba yigə.
Ba wá bon aba «Lɩ̀à tə nə suŋə lulwərən»,
də «Lɩ̀à tə nə kwɛn coŋi,
sə ba pa lɩ̀à ya lʋʋ nii tə wa!»
Sìə́ dɩɩn tə nə yí Ba-Yígúrə́-Jə-Tiu fɩra
13 Ba-Yígúrə́-Jə-Tiu swɩ̀n, ʋ wʋ́:
«Á nə cɩ̀gà á tɩ̀àn nə,
á dàn ká bàn sìə́ dɩɩn tə,
á dàn ká tʋn á tətə fɩra yìə̀n à culu dɩɩn tə nə,
á nə jələ sìə́ dɩɩn tə, ndə dɩzəŋu nə,
á nə jələ kʋ ndə à mʋ̀ Ba-Yígúrə́-Jə-Tiu
culu dɩɩn nə kʋ nə jə dun,
á nə zìlí kʋ,
kʋ pa á ba á tətə pubʋŋa yìə̀n nə twá,
á ga ba á tətə fɩra yìə̀n tʋŋa,
yá á ba sʋvɛɛ swɩ̀n,
14 á wá nì á ywánɩ́ à mʋ̀ Ba-Yígúrə́-Jə-Tiu con.
À wá ja aba à jírí lʋʋ nii tə
pɛɛn nədaran yuu wa,
yá à wá pa á də́ tɩa tə nywarɩ,
à nə pɩn á nɩbɛɛ Zwakɔbə nə,
sə ka ya ʋ tori.»
Ba-Yígúrə́-Jə-Tiu nii nə swɩ̀n kʋ!