57
1 Ba gwɩ cɩ́gá tíú,yá kʋ tà lìù mama yáá.
Pùə́ nədʋ tíú nɛɛ mɩnɩ,
yá lìù mama ba kʋ də̀ń nə̀ń,
də cɩ́gá tíú nɛɛ yàá mɩnɩ,
sə kʋ ma jon wá lɛɛ tə jɩɩn wa, tə nə bɩ̀àn.
2 Yá ʋ wá zʋ sìə́ wa,
lìù tə nə tì cwəŋə tə nə yɩ mənəmənə,
wá pə̀ń ʋ gədo yuu, ʋ sìí.
Yɩɩ caga lɩ̀à tə nii nə ba nə pɩn dun woŋwanan nə
3 Á mʋ̀, á fwara á yí yəbə,
kacɩrʋ kan bɩ̀á-ba,
á mʋ̀ bacwaran də kacwaran dwíí-ba!
4 Wàà nə á ma də́ bɩyɩrɩ?
Wàà con nə á kàń á nii,
á ga lɩ á nəndəli?
Á tà bɩ̀á tə á nə vɩ nii,
də kʋ̀nkʋ̀na dwíí naaa?
5 Á yɩ lɩ̀à tə á nə cwàrɩ̀ cúlú tɩ̀án də̀ń,
də tɩ̀ʋ́ mama də̀ń, kʋ nə jə vʋran,
á ga gwɩ bìsɩ́ná nacorən nii nə,
də pɩ̀ràn kwə̀lə́ wa, á ma fwa joŋə.
6 Nacorən kapana səsolən tə wa nə,
á woŋwanan tə á nə swə wulə.
Mə tə nə, tə mʋ̀ nə yɩ á yisɩŋan wiən,
tə mʋ̀ yuu wa nə á lwɛ́ divɛn jwəŋə,
á ga sʋ̀rɩ́ zìlə́ wiən jwəŋə, á pɩn tə.
Kʋ mɛ sə à pɩ́án yìə̀n təntə naaa?
7 Paan ka yuu nə dara yuu wa nə,
á tún á yipaa bwálɩ́,
yá mə lá nə á dɩ̀,
á fwa jwəŋə də.
8 Á tún á woŋwanʋ mimii bòrù kwa.
Cɩ́gá, á yàá səgə à yáá nə, á kʋ̀rɩ̀ á gànàn,
á yá á tɩ̀àn swə̀lə́ ndə kacwaran nə,
á ga dɩ̀ á wàlɩ̀ á yipaa bwálɩ́.
Á tún nimarʋ də bara duən,
á swə ka pə̀ń də ba,
yá á balɩ ba bárɩ́.
9 Á janɩ nʋga də wusinə kapʋpʋ,
á vəli á pɩn Mɔlɔkəa nə,
yá á tʋŋa á tʋntʋna yiŋʋnɩ,
á pɩn ba mʋ̀rɩ̀ ba cwí, ba yí ciru*.
10 Á vəli cwəŋə tə wa, á gwàrɩ̀,
yá á ba swɩ̀n də á wá yá á sìí!
Á nɛɛ tə jə dɩ̀àn,
kʋ mʋ̀ nə pɩn á jɩ̀àn wà gwàrɩ̀.
11 Wàà fən yà nə jə aba,
wàà fən nə á yà dəri,
kʋ pa á kʋ̀nà kʋ̀nkʋ̀n,
yá á swɛ̀ɛ́, á kʋ́ʋ̀ ba á yoo bʋŋa?
À wà à nii pwí kʋ máŋá təntə mama naaa?
Kʋ mʋ̀ nə pɩn á ba à mʋ̀ fən dəri.
12 À mʋ̀ wá bɩrɩ á cɩ́gá cwəŋə tə,
də á tʋtʋnɛɛ nə yɩ nətʋ.
Tə bá ja sáŋʋ́ mancɩn mama tə pa aba.
13 À wá na də á woŋwanan
kapʋpʋ tə nə wá jon aba,
máŋá tə wa á nə wá bubwi á pɩ̀à sáŋʋ́!
Vʋʋ wá tì tə mama kʋ ja vìí,
kùlì wá jàn tə kʋ ja jɛ́n.
Yá lìù tə ʋ nə kwálɩ́ ʋ yuu à con,
lʋʋ nii tə wá ya ʋ tori,
yá ʋ wá tɩnɩ à culu paan tə.
Ba-Yígúrə́-Jə-Tiu wá zwɛ̀ ʋ lɩ̀à tə yayɩran
14 Ba-Yígúrə́-Jə-Tiu swɩ̀n, ʋ wʋ́:
«Á cɛŋa, á cɛŋa cwəŋə,
á kwɩan cwəŋə,
á lɩa wokʋkwɩnan tə mama,
à lɩ̀à tə cwəŋə wa!»
15 Cɩ́gá, nə̀ń kʋ tə Yɩɩ tə nə wulə yɩɩ nə baan baan,
ʋ wúlú bwálɩ́ tə nə wulə máŋá mama wuuu,
yá ʋ yɩrɩ yɩ parɩ*, nə swɩ̀n:
«À wúlú bwálɩ́ tə wulə baan baan,
kʋ ga yɩ parɩ.
Yá à wulə də lìù tə ba nə fɩfɩn,
də lìù tə ba nə fʋfʋlɩ,
sə à pa lɩ̀à tə ba nə fʋfʋlɩ,
pubʋŋa pìí ka bwin,
à ga pa lɩ̀à tə ba nə fɩfɩn,
bɩcan pìí kʋ bwin.
16 Cɩ́gá, kʋ tà máŋá mama nə,
à wá swɩ̀n à zɩgɩ lɩ̀à nə, bʋra bwálɩ́ nə,
kʋ ma tà à lɩŋa wá zàn wuuu, tə ba twɩ.
Kʋ yà nə yɩ nətʋ,
lɩ̀à tə à nə fwa à kə lʋʋ wa,
yà wá kwɩ̀n ba mɩɩ nə.
17 Yɩzərayɛlə lɩ̀à wʋkoru tə pɩn ba tʋn cʋna,
yá kʋ mʋ̀ nə zɩ̀n à lɩŋa,
kʋ pa à mà ba,
à ga səgə à tɩ̀àn ba yáá nə, à lɩŋa tə wa.
Yá də kʋ mɛ, ba tə yɩ lɩ̀à tə ba nə vɩ nii,
ba tə yɩ ba twá ba tətə pùə́ fɩra nə.
18 À nɩ ba napɩrɩ vəli,
yá də kʋ mɛ, à wá pa ba yazurə.
À wá kə ba cwəŋə nə,
yá à wá kòrì ba zənzən,
ba mʋ̀ də lɩ̀à tə nə wulə pucʋnɩ wa də ba.
19 À wá kə bʋra ba nii wa.
Kʋ wá ya sìə́ də sìə́,
kʋ pa lìù tə nə ʋ nə wulə yiŋʋnɩ,
də lìù tə nə ʋ nə wulə bwə́lə́ bwə́lə́!
À mʋ̀ Ba-Yígúrə́-Jə-Tiu nə swɩ̀n kʋ,
à wá pa ba yazurə!»
20 Yá wʋlʋnyɩna mʋ̀ yɩ ndə mʋʋ nə vuvugə,
kʋ wàrɩ̀ sənbwen kʋ pə̀ní,
yá kʋ nɩ́á yigə kʋ wa durən tə mama,
tə lɩ bibiru yuu.
21 Kʋ mʋ̀ nə pɩn à tíú Yɩɩ swɩ̀n, ʋ wʋ́:
«Wʋlʋnyɩna bá na bɩcan sìə́!»