BATWA NII BWALƖ
(56—66)
Yɩɩ bá lɩ dwíí mama ʋ dʋgʋ
56
1 Nəŋə kʋ tə Ba-Yígúrə́-Jə-Tiu nə swɩ̀n:«Á tʋŋa yoo mama,
á pa kʋ twá cɩ́gá nə,
ndə kʋ nə mɛ nətʋ,
á ga twá cɩ́gá cwəŋə nə.
Cɩ́gá, à ken sírí à zwɛ̀, sə à jon aba,
yá à cɩ́gá cwəŋə tə wá bɩrɩ ka tɩ̀àn.
2 Pupwən lìù nə yɩ lìù tə ʋ nə fwa kʋ nətʋ tə,
yá pupwən lìù nə yɩ Adamə nàʋ́ tə
ʋ nə zɩga kankan kʋ wa,
ʋ ga zìlí sìə́ dɩɩn tə,
kʋ pa ʋ cɩ̀ ʋ tɩ̀àn nə,
ʋ dàn ká cʋ̀gʋ̀ kʋ culu tə,
nə à yə̀ə́ ʋ tʋn tʋtʋnkʋkwɩʋn mama kʋ dɩɩn nə!»
3 Vee tə ʋ nə vwə ʋ tɩ̀àn Ba-Yígúrə́-Jə-Tiu yɩra,
dàn ká swɩ̀n, ʋ wʋ́:
«Ba-Yígúrə́-Jə-Tiu wá pwɛ̀ nə
ʋ lɩ ʋ lalʋʋ tə yɩra, kʋ bá kwɛ̀!»
Batana dàn ká swɩ̀n, ʋ wʋ́:
«À mʋ̀ yɩ tɩ̀ʋ́ kʋ nə kʋa!»
4 Cɩ́gá, nəŋə kʋ tə à mʋ̀ Ba-Yígúrə́-Jə-Tiu
nə swɩ̀n batanɩ tə con,
ba nə zìlí à sìə́ dɩan tə,
ba nə kúrí ba tì,
sə ba tʋn kʋ tə nə poli à pùə́,
yá ba zɩga kankan à nimarʋ tə wa:
5 «À wá pa ba mɩmɩnʋ won à dìə̀ tə wa,
də à bírí tə wa, ba nə wá ma bon ba yɩrɩ,
kʋ nə wá ja funə kʋ pa ba,
kʋ doni bɩ̀á də bwɩ̀ɩ́.
Yá à wá pa ba yɩrɩ tə ya lá,
máŋá mama wuuu, kʋ bá jɛ́n.
6 Yá vərə tə mʋ̀, ba nə wá vwa ba tɩ̀àn
à mʋ̀ Ba-Yígúrə́-Jə-Tiu yɩra,
ba nə wá sóní nə zənzən,
kʋ pa ba jì à tʋ̀tʋ̀nà, ba tʋn ba pa nə,
vərə tə mama, ba nə wá zìlí sìə́ dɩɩn tə,
kʋ pa ba cɩ̀ ba tɩ̀àn nə,
ba dàn ká cʋ̀gʋ̀ kʋ culu tə,
ba ga zɩga kankan à nimarʋ tə wa,
7 à wá ja ba à bà à culu paan tə yuu wa,
yá à wá pa ba jwɛ à dìə̀ tə wa,
ka nə yɩ yɩjʋnɩ dìə̀.
À wá sɛ̀ à jon ba jwəŋə tə ba nə sʋ̀rɩ́*,
də ba jwəŋə tə duən tə,
ba nə fwa ba pa nə, à joŋi bwálɩ́* tə yuu wa.
Cɩ́gá, ba wá bon à dìə̀ tə,
“lʋʋ dwíə́ tə mama yɩjʋnɩ dìə̀.”»
8 Nəŋə Yuu-Tiu Ba-Yígúrə́-Jə-Tiu nii sʋgʋ nə,
ʋ mʋ̀ Yɩɩ tə, ʋ nə ja Yɩzərayɛlə lɩ̀à tə,
ba yà nə laga duən yáá nə,
ʋ pìí ʋ twi duən yáá nə:
«À wá ja ba duən à bà à súrí ba tə nə,
à nə dí yáá à kə duən yáá nə.»
Yáá tɩ̀án tə nə wà mɛ də yáá tini
9 Á mʋ̀, gaʋ ganaŋa tə mama,
də á mʋ̀, pún ganaŋa tə mamaa,
á bɩ̀àn á də́ cànà wodiu!
10 À lɩ̀à tə nəcɩra tə mama yɩ lilirən,
ba yəri won mama.
Ba mama yɩ kukuri bibənən,
tə wàrɩ̀ tə wuwe.
Ba swə ka pə̀ń ka dwɛ̀ pandwɩa.
11 Ba yɩ kukuri tə nə də́ zənzən,
yá tə ba swí.
Ba yɩ payɩra, ba nə yəri yoo də̀ń.
Ba lìù mama yɩ ʋ tì ʋ cwəŋə,
ʋ pɩ̀à kʋ tə nə yɩ ʋ cɩcɩ fɩra won.
12 Ba yàá swɩ̀n, ba wʋ́:
«Á bɩ̀àn, à wá pɩ̀à divɛn,
nə wá nyʋn sana tə nə dà, nə bʋbʋnɩ!
Jwɩan nə, nə tə wá fwa nətʋ.
Cɩ́gá, tə ga lá zənzən!»