Yɩɩ fwa zəni yá ʋ ba ŋwɩ́rán joŋə
55
1 He! Á mʋ̀ lɩ̀à tə mama nanyʋnɩ nə jə,á bɩ̀àn á nə̀ń nɩ́á!
Lìù tə nə ba səbiu jə də tətə wàá ʋ twi.
Á bɩ̀àn á yə̀, á də́,
á bɩ̀àn á yə̀ divɛn də nayɩla,
á bá lɩ səbiu, á bá ŋwɩ́n won mama!
2 Bɛ̀ɛ̀ nə pɩn á ma cʋ̀gà səbiu
won tə yɩrɩ kʋ nə tà wodiu?
Bɛ̀ɛ̀ nə pɩn á gwàrɩ̀ á tɩ̀àn
won tə yɩrɩ kʋ nə ba pùə́ swí?
Á dàń cʋga à con,
á ga də́ kʋ tə nə ziən,
yá á wá də́ wodirən tə nə ywán, á sú.
3 Gunə á zɩan á cʋgʋ, á ga bà à con.
Á cʋga, yá á mɩɩ wá ya lʋʋ.
À wá tún nimarʋ də aba,
kʋ nə bá ja yígúrə́.
Kʋ mʋ̀ nə yɩ wʋywaŋʋ* nimarʋ tə
à nə kàn nii, à ga tʋn Davidə yɩra.
4 À pɩn ʋ jì à dansɩa lìù, lʋʋ dwíə́ tə yáá con,
à pɩn ʋ jì yáá tíú, ʋ pɩn nii lalʋʋ nə.
5 N wá bon dwíí n nə yəri,
yá dwíí tə nə yəri mʋ́,
wá dəri ba bà n con,
Ba-Yígúrə́-Jə-Tiu, n tíú Yɩɩ yɩrɩ,
Yɩzərayɛlə lɩ̀à Yɩɩ tə nə yɩ parɩ*,
ʋ ga pɩn n jə dun.
Ba-Yígúrə́-Jə-Tiu nikanɩ nii yàá sú
6 Á twara Ba-Yígúrə́-Jə-Tiu,
də á tə wàá wá á nɩ,
á boŋə á kə ʋ nə,
də ʋ tə bwə́lə́ də aba.
7 Wʋlʋnyiən yá ʋ tʋtʋnɛɛ,
sə yolwafwanʋ də yá ʋ pubʋnlwana tə.
Ba bɩ̀án Ba-Yígúrə́-Jə-Tiu con,
yá ʋ wá dəri ba yinəgə.
Ba bɩ̀án nə tíú Yɩɩ con!
Cɩ́gá, ʋ yɩ Yɩɩ tə ʋ nə kwɛn cʋna
yiri mama ʋ lɩ də pubwanʋ.
8 Cɩ́gá, à pubʋŋɩ də á pubʋŋɩ tà nədʋ,
yá á tʋtʋnɛɛ də à tʋtʋnɛɛ də tà nədʋ.
À mʋ̀ Ba-Yígúrə́-Jə-Tiu nii sʋgʋ nə!
9 Nətʋ tə lanworu tə nə ŋʋ́ná də tɩa tə,
mə nətʋ nə à tʋtʋnɛɛ tə ŋʋ́ná də á tʋtʋnɛɛ tə,
yá à pubʋŋɩ tə ŋʋ́ná də á pubʋŋɩ tə.
10 Dwà də nyʋ̀nʋ̀ yàá nan lanworu wa tə cú,
yá tə ba pìrí tə vìrí, də tə wà tɩa tə gàrɩ̀,
tə pa ka zuri, wiən ga pɛ́n ka yuu wa,
yá ka lənə wodwii ka pa valʋ nə,
sə lìù tə niən nə jə wànɩ́ ʋ na wodiu ʋ də́.
11 Mə kʋ yɩ nətʋ kʋ pa à sʋgʋ tə də nə,
kʋ nə naŋa à nii wa:
Kʋ ba pìí kʋ twi à con, də kʋ wà yoo tʋn.
Kʋ ba pìí kʋ twi à con, də kʋ wà à fɩra tə tʋn.
Kʋ ba pìí kʋ twi à con, də kʋ wà yoo tə
à nə tʋn kʋ kʋ yɩrɩ fwa, kʋ pa kʋ nii sú.
12 Cɩ́gá, á wá nan Babɩlɔnə wa də pupwən,
yá ba wá kə aba cwəŋə nə də bɩcan sìə́.
Pɛɛn də dədwələn wá mà pupwən cə̀rí, á yáá con,
yá gaʋ wa tɩ̀án tə mama wá mà jɩpwələ.
13 Nyənbori wá nan səni bwálɩ́ nə,
yá kawalʋ wá nan casʋran bwálɩ́ nə.
Kʋ nətʋ wá pa
ba bʋ Ba-Yígúrə́-Jə-Tiu yɩrɩ nə,
yá kʋ wá ya mɩmɩnʋ won
máŋá mama wuuu, kʋ wàrɩ̀ kʋ jɛ́n.