Yɩɩ kʋ́ʋ̀ wà Zwerizalɛmə vɩ ʋ dʋgʋ
54
1 Mà pupwən cə̀rí, kadɩŋʋ,n mʋ̀ kan tə n nə wà bìú lɩrɩ!
Baa pupwən cə̀rí, n ga jwɛ,
n mʋ̀ kan tə n nə wà yəni nətʋ tə,
kan pùə́ nə yàá yɩ̀ sə ʋ lɩra!
Cɩ́gá, kan tə ʋ barɩ nə vɩga wá ʋ dʋgʋ
bɩ̀á wá ya dánɩ́ ba doni kan tə nə swe bɩ̀á.
Ba-Yígúrə́-Jə-Tiu nə swɩ̀n kʋ!
2 Walɩ n gansili bwálɩ́,
van n wúlú bwálɩ́ tapwələ tə,
n wɛ̀ɛ́ n súrí lá,
dàn ká wɛ̀ɛ́ n ma bwan bwana!
Pa sə n gansili ŋoni tə ya danɩ,
n ga pa n párá, n pa tə zʋ tɩa zəni!
3 Cɩ́gá, n wá wàlɩ̀ n va jɩzən də n jɩgwiə sapara con,
n dwíí tə wá jon lʋʋ níə́ ba tɩnɩ,
yá ba wá pùlì ba sú tɩan tə ya nə cʋ̀gʋ̀.
4 Dàn ká pa fən ja mʋ́!
Cɩ́gá, cavɩra kʋ́ʋ̀ bá yí mʋ́.
Dàn ká pa n jwə̀rí!
Cɩ́gá, ba kʋ́ʋ̀ bá fʋfʋlɩ mʋ́.
N wá swɛ̀ɛ́ n zandʋan cavɩra tə,
n ga kʋ bá pìí n lìí n tɩ̀àn
fʋfʋlʋ tə yoo ba nə fʋfʋlɩ mʋ́,
də n nə yɩ kadənu tə.
5 Cɩ́gá, Yɩɩ tə ʋ nə fwa mʋ́
ʋ kə lʋʋ wa nə yɩ n barɩ.
Ʋ yɩrɩ nə yɩ Ba-Yígúrə́-Jə-Tiu, kwatara Yɩɩ.
Yɩzərayɛlə lɩ̀à Yɩɩ tə nə yɩ parɩ*
yɩ n jonu, ʋ mʋ̀ nə yə̀ mʋ́ ʋ jon.
Ba boŋə wá lʋʋ mama Yɩɩ.
6 Cɩ́gá, Ba-Yígúrə́-Jə-Tiu pìí ʋ boŋə mʋ́,
ndə kan nə, ʋ barɩ nə vɩga ʋ dʋgʋ,
kʋ pa pucʋnɩ zʋ mʋ́ zənzən.
N tíú Yɩɩ bwe sə ʋ jə́n,
lìù wàá ʋ zandʋan kan,
ʋ vɩ ʋ dʋga naaa?
7 À yà vɩga mʋ́ à dʋgʋ máŋá mancɩn wa,
yá à wá pìí à jon mʋ́,
də bɩcabwanʋ nəfarʋ.
8 À lɩŋa yà zaŋa n yuu wa zənzən,
kʋ pa à viviri à kwa
à ma sà mʋ́ máŋá mancɩn wa.
Yá à dàń wá fwa pubwanʋ n yɩra,
də sonu kʋ nə bá zwɛ̀.
Ba-Yígúrə́-Jə-Tiu, n jonu tə
ʋ nə yə̀ mʋ́ ʋ jon, nə swɩ̀n kʋ.
9 À mʋ̀ con, kʋ wá ya ndə Nowe máŋá tə nə:
À yà dùə̀ də Nowe máŋá nɩ́á tə yiri
kʋ́ʋ̀ bá pìí tə bà tɩa yuu wa.
Yá sɩ́ʋ́n nə, à dàń dwì də
à lɩŋa kʋ́ʋ̀ bá pìí tə zàn n yuu wa,
yá à kʋ́ʋ̀ bá pìí à caga n nii nə.
10 Pɛɛn tə nə swə tə fwarɩ tə dəkurən bwálɩ́ nə,
dədwələn tə nə swə tə vuvugu,
à mʋ̀ sonu tə à nə swə mʋ́
bá fwarɩ də mama,
yá bɩcan sìə́ nimarʋ tə
à nə tún də mʋ́ bá vuvugu.
Ba-Yígúrə́-Jə-Tiu, ʋ nə dəri n yinəgə nə swɩ̀n kʋ.
Zwerizalɛmə jwɩan nə wá ya nətʋ
11 N mʋ̀ yinənyiən, dwavʋʋ nə mà,
yá lìù tə̀lə́ sə ʋ kòrì mʋ́,
à wá tún n dəkuu
kapan cɩ́nán cɩcɩlan bʋla yuu wa,
à ga pìí à lwà mʋ́
də kapana pʋ̀pʋ̀nàn, tə nə jə funə.
12 À wá ja kapan cɩ́nán cɩcɩlan nəsɩnan mui
à ma nàn n birinɛɛ tə yuu,
à ga ja kapan cɩ́nán cɩcɩlan sɩsɩnan
à ma nàn n mimien tə,
yá à wá lwà n biritaŋʋ tə mama
à kɩkarɩ də kapana tə nə jə funə.
13 N bɩ̀á tə mama wá ya à mʋ̀
Ba-Yígúrə́-Jə-Tiu karbɩa,
yá ba wá ja bɩcan sìə́ zənzən.
14 Cɩ́gá cwəŋə wá pa n ja dɩ̀àn.
Lìù mama kʋ́ʋ̀ bá wànɩ́ mʋ́ ʋ fɩfɩn,
won mama fən kʋ́ʋ̀ bá ja mʋ́,
yá n dàń wá ya ŋʋ́nɩ́ də bɩcapuri,
kʋ kʋ́ʋ̀ bá yí n yɩra.
15 Dʋŋa nə twi sə ba ta mʋ́,
yəni də kʋ tà à mʋ̀ nə ken kʋ.
Yá lìù tə mama ʋ nə wá dídə́n
sə ʋ ta mʋ́, wá tʋ n mʋ̀ yɩrɩ.
16 À mʋ̀ nə fwa yàrʋ́,
ʋ nə cegi məncala də cəpurə,
sə ʋ ma fwa kwatarɩ zɩlɩ yiri tə ʋ nə swə.
Yá à mʋ̀ nə fwa cʋcʋnyiən də,
sə ʋ nyʋnyʋgʋ kʋ.
17 Kwatarɩ zɩlɩ tə mama ba nə fwa,
sə ba ma ta mʋ́, bá ja n tʋtʋŋɩ.
Yá lìù tə mama ʋ nə wá swɩ̀n
ʋ zɩgɩ n nə, bʋra bwálɩ́ nə,
n wá pa bʋra ja kʋ tíú.
Mə tori nə à mʋ̀ Ba-Yígúrə́-Jə-Tiu
nə pɩn à tʋ̀tʋ̀nà nə,
mə nətʋ nə à wá bʋ̀rɩ̀ à pa ba cɩ́gá.
À mʋ̀ Ba-Yígúrə́-Jə-Tiu nii sʋgʋ nə!