53
1 Wàà nə pɩn cɩ́gá ŋwɛn tə nə, nə nə nì?
Wàà nə nə Ba-Yígúrə́-Jə-Tiu bɩrɩ ʋ vàn dɩ̀àn tə?
2 Ba-Yígúrə́-Jə-Tiu tʋtʋnʋ tə yɩn ʋ yáá nə,
ʋ bori ndə naywalʋ nə,
kʋ nə tá kʋ nan tɩ̀ʋ́ dəkuu yɩra,
ndə tɩ̀ʋ́ ŋʋnʋ nə pɛ́n kʋ nan tɩkʋrʋ wa.
Ʋ yà ba zəni jə, ʋ ma ba fɩra də jə,
sə kʋ pa nə ywàń wá,
yá won mama yà tə̀lə́ ʋ yɩra,
kʋ nə jə fɩra, sə kʋ van nəba.
3 Ʋ yɩ lìù tə ləzoni nə fʋfʋlɩ,
ba ga vɩ wá ba dʋgʋ.
Ʋ yɩ càn lìù,
yá ʋ dí yinəgə ʋ mɩ̀n.
Ʋ nyən ndə lìù nə ba nə zʋ̀nɩ̀.
Ba fʋfʋlɩ wá,
yá nə wà wá jələ ndə lìù nə.
4 Yá kʋ yɩ nə yinəgə tə nə ʋ jon ʋ zɩn,
nə càn tə nə ʋ tì ʋ zɩn,
yá nə mʋ̀ yà bʋŋa də Yɩɩ nə mà wá,
sə ʋ pa lɛɛ yí wá, ʋ ga fʋfʋlɩ wá.
5 Yá nə mʋ̀ cʋna tə yɩrɩ nə, ba cɩcɩra wá,
nə yolwana tə yɩrɩ nə, ba nyʋnyʋgʋ wá.
Càn tə yà nə mɛ sə tə yí nəba,
pìí tə tʋ ʋ yuu wá,
nə mʋ̀ ga na bɩcan sìə́.
Yá kʋ twá də ʋ yɩra tə ba nə cɩcɩra,
nə ma na yazurə.
6 Nə mama ya yɩ nə ywaŋa ndə pee nə,
lìù mama də tì ʋ cwəŋə,
yá Ba-Yígúrə́-Jə-Tiu pɩn
nə mama cʋna tə tʋ ʋ tʋtʋnʋ tə yuu wa.
7 Ba fɩfɩn wá, ba ga fʋfʋlɩ wá,
yá ʋ wà ʋ nii nə súrí.
Ʋ yɩn ndə pəbiə nə,
ba nə ja vələ nangʋra sàń.
Ʋ yɩn ndə piə nə, ka nii nə bá swɩ̀n,
lɩ̀à tə nə fɩnɩ ka kʋran yáá con.
Ʋ wà ʋ nii nə súrí.
8 Ba jɩn wá də dɩ̀àn,
ba bʋ̀rɩ̀ kʋ̀nkʋ̀n bʋra, ba ma gʋ wá.
Ba kalɩ ba lɩ ʋ mɩɩ tɩa yuu ləzoni wa,
yá ʋ yoo wà ʋ máŋá lɩ̀à tə lìù mama yɩ̀.
À lalʋʋ tə cʋna tə yɩrɩ nə
ba mà wá ba gʋ.
9 Ba guri wá wʋlʋnyɩna libərə bwálɩ́ nə,
ba ken ʋ libəri jɩjə tɩ̀án libərə wa,
yá ʋ wà wʋlʋŋʋ tʋn,
gɩgɩra sʋgʋ də ma wà ʋ nii wa nan.
10 Yá Ba-Yígúrə́-Jə-Tiu nə kúrí ʋ tì,
sə ʋ pa càn gʋ ʋ tʋtʋnʋ tə.
Yá ʋ nə pɩn ʋ tɩ̀àn
ndə cʋna kwɩan joŋi nə kwa nə,
ʋ wá na dwíí də mɩdarɩ,
ʋ ga wá tʋn Ba-Yígúrə́-Jə-Tiu fɩra tə,
ʋ pa tə nii sú.
11 Ʋ nə dí càn zənzən yɩrɩ,
ʋ wá na poni,
yá ʋ wá sú də pupwən.
Ba-Yígúrə́-Jə-Tiu swɩ̀n, ʋ wʋ́:
«À tʋtʋnʋ tə yɩ cɩ́gá tíú,
yá ʋ wá pa lɩ̀à kapʋpʋ jì cɩ́gá tɩ̀án,
ba nə wá lwarɩ də
ʋ mʋ̀ nə tì ba cʋna tə, ʋ zɩn yɩrɩ.
12 Kʋ mʋ̀ nə pɩn,
à wá zɩ̀n wá à kə dun bwálɩ́ nə,
lɩ̀à kapʋpʋ tə titəŋi wa.
Ʋ də dɩ̀àn tɩ̀án wá tara wiən tə
ba nə ta ba jon.
Cɩ́gá, ʋ sɛ̀ ʋ pa ʋ tɩ̀àn tɩan nə,
ba ga jələ wá ba kə cʋna lɩ̀à wa,
yá ʋ yɩ lɩ̀à kapʋpʋ lwanɩ nə ʋ jon ʋ zɩn,
ʋ ga jon cʋna lɩ̀à ba cʋna wa.»