Ba-Yígúrə́-Jə-Tiu wá kwɛn Zwerizalɛmə
52
1 Zàn dwiən nə, zàn dwiən nə!Tʋn dɩ̀àn, Siyon* tɩʋ!
Zʋ n ganmʋla, Zwerizalɛmə,
tɩʋ tə kʋ nə yɩ Yɩɩ nyiən!
Cɩ́gá, dwíí tə nə yəri Yɩɩ, nə à yə̀ə́
durən lìù kʋ́ʋ̀ ba zʋ n waa.
2 Zàn yɩɩ nə, n pupugu n pùrú,
zàn n jə̀ń n yijaa bwálɩ́ nə, Zwerizalɛmə!
Kʋ̀rɩ̀ banzala tə n bɩan nə,
Siyon bʋ̀áa tə n nə jìgə̀ bandiə lìù!
3 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n:
«Á yɩ ba jɩn ba pa tʋtʋ,
yá ba bá ŋwɩ́n səbiu,
ba ma yə̀ aba ba jon.»
4 Cɩ́gá, nə̀ń kʋ tə Yuu Tiu Ba-Yígúrə́-Jə-Tiu
nə swɩ̀n, ʋ súrí lá:
«À lalʋʋ təntən ba va ba jə̀ń Ezwipətə nə,
yá kʋ yígúrə́ wa, Asiiri tɩ̀án fɩfɩn ba tʋtʋ.
5 Yá sɩ́ʋ́n nə, bɛ̀ɛ̀ nə à dàń mɛ sə à fwa,
dʋŋa nə jɩn à lalʋʋ tə tʋtʋ yɩrɩ?
À mʋ̀ Ba-Yígúrə́-Jə-Tiu nii sʋgʋ nə!
Lɩ̀à tə nə dí dɩ̀àn ba yuu wa mà cə̀rí,
yá ba cʋ̀gà à yɩrɩ nə dɩɩn mama.
À mʋ̀ Ba-Yígúrə́-Jə-Tiu nii sʋgʋ nə!
6 Kʋ mʋ̀ nə pɩn, à lalʋʋ tə wá lwarɩ à yɩrɩ.
Kʋ mʋ̀ nə pɩn dɩɩn don nə,
ba wá lwarɩ də à mʋ̀ nə swɩ̀n də à bɩ̀àn!»
Ba-Yígúrə́-Jə-Tiu pìí ʋ bà Zwerizalɛmə wa
7 Ʋ vəli jə fɩra pɛɛn yuu wa,
tʋntʋnʋ tə ʋ nə swɩ̀n sʋywáŋʋ́ ʋ bɩrɩ,
ʋ ga bòrì ʋ swɩ̀n bɩcan sìə́ yoo!
Tʋntʋnʋ tə nə swɩ̀n sʋywáŋʋ́ ʋ bɩrɩ,
ʋ ga bòrì ʋ swɩ̀n jonu yoo,
ʋ swɩ̀n Siyon* tɩ̀án con, ʋ wʋ́:
«Á tíú Yɩɩ tə yɩ pɩ̀ʋ́!»
8 Cʋgʋ lɩ̀à tə nə cɩ̀ n nə kori!
Ba zɩ̀n ba kori yɩɩ nə,
ba twá duən ba mà pupwən cə̀rí.
Cɩ́gá, ba tətə na Ba-Yígúrə́-Jə-Tiu
ʋ pìí ʋ bɩ̀àn Siyon wa.
9 Zwerizalɛmə dibwərən-ba,
á zɩan á kori yɩɩ nə,
á twá duən á mà pupwən cə̀rí!
Cɩ́gá, Ba-Yígúrə́-Jə-Tiu kòrì ʋ lalʋʋ tə,
ʋ yə̀ Zwerizalɛmə ʋ jon kʋ dʋŋa jɩɩn wa.
10 Dwíə́ nəkaran* tə mama yáá con,
Ba-Yígúrə́-Jə-Tiu bɩrɩ ʋ vàn dɩ̀àn tə
nə ba cʋna tʋŋa.
Yá tɩa nii yígúrə́ mama wá na nətʋ tə,
nə tíú Yɩɩ nə jon nəba.
Á naŋa á yá Babɩlɔnə
11 Á vìrə́, á vìrə́, á naŋa lá!
Dànà ká dwen durən won mama yɩra!
Á naŋa tɩʋ təntə wa!
Á kwɩan á tɩ̀àn á lɩ durən yìə̀n wa,
á mʋ̀ lɩ̀à tə á nə zɩŋa
Ba-Yígúrə́-Jə-Tiu dìə̀ tʋtʋnzɩla tə!
12 Á dànà ká nan də bɩbarʋ,
á dànà ká dəri á ma vìí.
Cɩ́gá, Ba-Yígúrə́-Jə-Tiu wá ya á yáá,
yá ʋ mʋ̀ Yɩzərayɛlə Yɩɩ tə wá ya á kwa.
Ba-Yígúrə́-Jə-Tiu tʋtʋnʋ tə yoo
13 Ba-Yígúrə́-Jə-Tiu swɩ̀n, ʋ wʋ́:
«À tʋtʋnʋ tə yìə̀n wá kwɛn tə pa wá.
Ʋ wá va yáá wuuu, ba wá zɩ̀n wá yɩɩ nə,
ba kə dun nəfarʋ bwálɩ́ nə.
14 Bɩcapuri ya zʋa lɩ̀à kapʋpʋ,
ʋ yáá tə yà nə cɩcɩra, ka cʋ̀gʋ̀ zənzən,
kʋ pa ʋ yà kʋ́ʋ̀ ba nyən də ləzwənə yɩrɩ.
15 Mə nətʋ nə ʋ wá ja ʋ jana tə,
ʋ ma kwɛn dwíə́ kapʋpʋ cʋna ʋ lɩ.
Pɛ̀gá wá pú ba nii ʋ yáá con.
Cɩ́gá, ba wá na kʋ tə,
lìù yà nə tə wà kʋ yoo swɩ̀n, ʋ bɩrɩ ba,
yá ba wá nì yoo tə də̀ń, ba yà nə wà nì.