Yɩɩ wá jon ʋ lɩ̀à tə máŋá mama wuuu
51
1 Á cʋga à con,á mʋ̀ lɩ̀à tə á nə twarɩ cɩ́gá cwəŋə,
á mʋ̀ lɩ̀à tə á nə pɩ̀à Ba-Yígúrə́-Jə-Tiu!
Á kənə á yɩ́á pɩ̀ʋ̀ tə yuu wa,
ba nə sə̀ aba ba lɩ kʋ yɩra,
bʋʋ kolu tə wa, ba nə lɩ aba.
2 Á kənə á yɩ́á á nɩbɛɛ Abərahamə,
də Sara yuu wa ʋ nə lɩrɩ aba.
Cɩ́gá, à nə bon Abərahamə máŋá tə wa,
də ʋ ba bìú jə,
yá à fwa zəni ʋ yɩra,
à pa ʋ jì dwíí kapʋpʋ nɩbɛɛ.
3 Cɩ́gá, Ba-Yígúrə́-Jə-Tiu dəri Siyon* tɩʋ tə yinəgə,
ʋ dəri kʋ dibwərən tə mama yinəgə.
Ʋ wá pa kʋ kasɔɔ lanworu tə
jì ndə Edɛnə tɩ̀án kárá nə,
ʋ ga pa kʋ digə tə
jì ndə Ba-Yígúrə́-Jə-Tiu tɩ̀án kárá nə.
Yá lɩ̀à wá ya kʋ wa,
ba mà pupwən cə̀rí, ba ga jwɛ,
yá ba dɩ gwaran, ba ma bwɩ Yɩɩ nə.
4 Á mʋ̀ à lɩ̀à tə, á cʋga à con!
Á gunə á zɩɩn á cʋgʋ zəni,
á mʋ̀ à dwíí lɩ̀à tə!
Cɩ́gá, à mʋ̀ con nə nii wá nan,
yá à wá pa à bʋra tə ya lʋʋ dwíə́ tə poni.
5 À cɩ́gá cwəŋə tə bwə́lə́,
à wá bɩrɩ nətʋ tə à nə joŋə lɩ̀à,
yá à vànà tə wá bʋ̀rɩ̀ lʋʋ dwíə́ tə bʋra.
Mʋʋ titəŋi wa lʋʋ níə́ tə lɩ̀à wá kə ba yala à nə,
yá ba wá jələ à vàn dɩ̀àn yuu wa.
6 Á zɩan á yɩ́á á ywàń yɩɩ nə,
á ga pìí á ywàń tɩa!
Cɩ́gá, lanworu tə wá nyʋn lá ndə ŋwɩn nə,
yá tɩa tə wá kwɩn ndə gànʋ̀ nə,
ka yuu lɩ̀à tə ga wá tɩ ndə nanjwɩ nə.
Yá à mʋ̀ yɩ jonu máŋá mama wuuu,
à cɩ́gá cwəŋə tə ga bá kwɛ̀.
7 Á cʋga à con,
á mʋ̀ lɩ̀à tə á nə yə̀ə́ cɩ́gá cwəŋə,
á mʋ̀ dwíí tə à nii yìə̀n tə nə wulə á bɩcan wa!
Á dànà ká pa fʋfʋlʋ tə
ləzwəni nə fʋfʋlɩ aba fən ja aba,
á dànà ká pa tʋran tə
ba nə twɩn aba yoo yɩ̀ aba.
8 Cɩ́gá, tʋ́á wá lwà ba ndə gànʋ̀ nə,
sabadaʋ wá də́ ba ndə bɔɔ nə.
Yá à cɩ́gá cwəŋə tə wá ya lá, máŋá mama wuuu,
à ga wá ya jonu, máŋá də máŋá mama wuuu.
Ba-Yígúrə́-Jə-Tiu, zàn dwiən nə
9 Zàn dwiən nə, zàn dwiən nə!
Ba-Yígúrə́-Jə-Tiu, tʋn də n vàn dɩ̀àn tə!
Zàn dwiən nə, ndə n nə fwa nətʋ
dɩan tə wa tə nə kɛ̀ń,
ndə n nə fwa nətʋ
dí yáá máŋá tə wa, ka nə kɛ̀ń!
Kʋ tà n mʋ́ nə cʋ̀gʋ̀ mʋʋ wojijiru tə,
ba nə boŋə Rahavə,
n ga caŋa mʋʋ wojijiru* tə naaa?
10 Kʋ tà n mʋ́ nə pɩn mʋʋ tə kʋ̀,
n ga pa bʋʋ nəfarʋ* tə nɩ́á wʋ naaa?
Kʋ tà n mʋ̀ nə tún cwəŋə mʋʋ nɩ́á titəŋi wa,
n pa lɩ̀à tə n nə yə̀ jon, twá lá ba kɛ̀ń naaa?
11 Mə nətʋ nə lɩ̀à tə
Ba-Yígúrə́-Jə-Tiu nə jon wá pìí ba bà.
Ba wá bà Siyon* tɩʋ tə wa də pupwən cə̀rí.
Ba wá sú də pupwən ka nə ba zwɛ̀,
ndə nə ba púə́ payupuu ba yuu nə.
Ba wá jwɛ, ba ga làrɩ̀ də pupwən,
yá pucʋnɩ də súrə́ wá nyʋn lá.
Yɩzərayɛlə lɩ̀à wà mɛ sə ba pa fən ja ba
12 Kʋ yɩ à mʋ̀, à mʋ̀ cɩcɩ nə kòrì aba.
Bɛ̀ɛ̀ nə pɩn á ma dəri ləzwənə fən,
ʋ mʋ̀ lìù tə ʋ nə wá tɩ,
ʋ mʋ̀ lìù tə ʋ nə yɩ ndə gaʋ nə?
13 Á swɛ̀ɛ́ Ba-Yígúrə́-Jə-Tiu yoo,
ʋ nə fwa aba,
ʋ mʋ̀ Yɩɩ tə ʋ nə larɩ lanworu tə,
ʋ ga fwa tɩa tə!
Yá máŋá mama, fən pɩn á vɩvaga
lɩ̀à tə nə fɩfɩn aba lɩŋa tə yáá con,
ndə kʋ yɩ ba tanɩ ba zwɛ̀ sə ba cʋ̀gʋ̀ aba!
Lɩ̀à tə nə fɩfɩn aba lɩŋa tə wulə yə̀n nə?
14 Máŋá mancɩn wa, lìù tə nə gori,
ʋ tígə́ bandiə wa, wá tɩnɩ ʋ tɩ̀àn.
Ʋ bá tɩ ʋ bandiə tə wa,
yá wodiu kʋ́ʋ̀ bá mùrì wá.
15 À mʋ̀ nə yɩ Ba-Yígúrə́-Jə-Tiu,
á tíú Yɩɩ tə à nə pɩn mʋʋ pupwin,
à ga pɩn kʋ nakulə fwa zizigu.
À yɩrɩ nə yɩ Ba-Yígúrə́-Jə-Tiu, kwatara Yɩɩ.
16 À ken à sʋ̀ràn tə n nii wa,
à ga pú n yuu nə də à jɩɩn ywárɩ́.
À mʋ̀ nə larɩ lanworu tə, à ga fwa tɩa,
yá à swɩ̀n Siyon* tɩ̀án con, à wʋ́:
«Á yɩ à mʋ̀ lɩ̀à!»
Zwerizalɛmə wá pìí kʋ ja wʋdɩʋ
17 Zàn dwiən nə, zàn dwiən nə!
Zàn yɩɩ nə, Zwerizalɛmə!
N mʋ̀ tɩʋ tə n nə jon Ba-Yígúrə́-Jə-Tiu
lɩŋa wùrú zʋŋa tə ʋ jɩɩn wa, n nyʋn,
n mʋ̀ tɩʋ tə n nə nyʋan yiviru wùrú zʋŋa tə mama,
n cú n ja ka də̀ń nə.
18 Bɩ̀á tə mama wa, n nə lɩrɩ,
bìú nədʋ tətə tə̀lə́ sə ʋ kə mʋ́ cwəŋə nə.
Bɩ̀á tə mama wa, n nə kʋ̀nɩ̀,
bìú nədʋ tətə tə̀lə́ sə ʋ ja n jɩɩn nə.
19 Yojanan bələ təntə yí mʋ́,
yá wàà nə wá kwi ʋ pa mʋ́?
Kʋ yɩ cʋcʋran də dibwərən,
niən də kwatara sɩ̀ʋ́!
À mʋ̀ nə yɩ wàà, sə à ma kòrì mʋ́?
20 N bɩ̀á tə gwàrɩ̀,
ba tígə́ coŋi tə mama nii nə,
ndə panʋ nə, gəgəlu nə jɩn.
Ba-Yígúrə́-Jə-Tiu lɩŋa tə zaŋa ba yuu wa,
n tíú Yɩɩ ken ba càn wa.
21 Kʋ mʋ̀ yɩrɩ, à lòrì mʋ́ sə n cʋgʋ à con, yinənyiən!
N mʋ̀ lìù tə n nə nyʋan n sú n bʋbʋnɩ,
yá kʋ tà sana nə n nyʋan!
22 Nə̀ń kʋ tə n Yuu-Tiu Ba-Yígúrə́-Jə-Tiu,
n tíú Yɩɩ tə ʋ nə tɛ ʋ pɩn ʋ lɩ̀à tə nə, nə swɩ̀n:
«À wá jon yiviru wùrú zʋŋa tə n jɩɩn wa,
yá n kʋ́ʋ̀ bá nyʋn à lɩŋa wùrú zʋŋa tə.
23 À wá kə ka lɩ̀à tə jɩɩn wa,
ba yà nə fɩfɩn mʋ́,
yá ba swɩ̀n n con, ba wʋ́:
“Pə̀ń tɩa, sə nə nɩŋa n baan nə kɛ̀ń!”
N yà pɩn n dəkoru jì tɩa kʋ pa ba,
ba twá lá ba kɛ̀ń, ndə cwəŋə nə.»