Ba-Yígúrə́-Jə-Tiu caga ʋ lɩ̀à tə nii nə
50
1 Nə̀ń kʋ tə Ba-Yígúrə́-Jə-Tiu nə swɩ̀n:«Də kʋ nə yɩ cɩ́gá,
à cɩ́gá vɩga Zwerizalɛmə tɩʋ tə,
kʋ nə yɩ ndə á nuu nə à dʋgʋ,
sagɩ tə à nə pʋ́pʋ́nɩ́,
à ma dʋgʋ á nuu tə wulə yə̀n nə?
Nə à yə̀ə́ wàà jɩŋa nə wulə à yuu wa,
kʋ pa à ja aba à ma ŋwɩ́n tə?
Kʋ yɩ á yolwana tə nə pɩn
ba ma yoli aba,
yá kʋ yɩ á cʋna tə nə pɩn
ba vɩ á nuu ba dʋgʋ.
2 Bɛ̀ɛ̀ nə pɩn à ma bà də lìù mama tə̀lə́?
Bɛ̀ɛ̀ nə pɩn à bon, yá lìù mama wà sɛ̀?
À vàn tə yɩ kukuə zənzən,
kʋ pa à wàrɩ̀ aba à joŋə naaa?
À bá dɩ̀àn jə sə à jon aba naaa?
À nə baa mʋʋ tə nii nə, kʋ yàá wʋ,
à yàá pa mʋnɛɛ tə jì kasɔɔ lanworu,
yá nanyʋnɩ yàá pa tə wa filə tə tɩ,
tə pʋ, nɩ́á nə tə̀lə́ yɩrɩ.
3 À ja yikunu à ma zʋ lanworu tə, ndə gànʋ̀ nə,
à ga ja ganlɔɔ gànʋ̀a à ma piri kʋ, ndə gansara nə.»
Ba-Yígúrə́-Jə-Tiu tʋtʋnʋ tə yoo
4 Yuu-Tiu Ba-Yígúrə́-Jə-Tiu bɩrɩ nə
nətʋ tə à nə mɛ sə à swɩ̀n,
sə à wànɩ́ à ja à nii sʋgʋ
à ma dàn lìù tə jɩɩn, ʋ jɩɩn nə gwàrɩ̀.
Ʋ yàá zɩ̀n nə jɩjʋ mama,
ʋ pa à súrí à zɩɩn à cʋgʋ, ndə karbɩa nə.
5 Yuu-Tiu Ba-Yígúrə́-Jə-Tiu súrí à zɩɩn,
yá à mʋ̀ wà ʋ nii vɩ,
à wà pìí à kə à kwa.
6 À pɩn à dəkoru lɩ̀à tə nə, ba nə mà nə,
à ga te à pɩparan lɩ̀à tə nə,
ba nə vaŋa à twaŋa ba mùrí.
À wà vɩ sə ba twɩn nə,
à ma wà à yáá viviri à kə kwa,
sə ba dàn ká pìì mɩmɩan ba kə à yáá wa.
7 Yá Yuu-Tiu Ba-Yígúrə́-Jə-Tiu jon nə.
Kʋ mʋ̀ nə pɩn à wà fʋfʋlʋ dí,
yá à pɩn à yáá jì ndə pɩ̀ʋ̀ nə,
à nə yə̀ə́ də à bá də́ cavɩra yɩrɩ.
8 Lìù tə nə bʋ̀rɩ̀ ʋ pɩn nə cɩ́gá,
wulə à səpuni nə!
Wàà nə wá swɩ̀n ʋ zɩgɩ à nə, bʋra bwálɩ́ nə?
Kʋ tíú bà sə nə va
lɩ̀à tə nə bʋ̀rɩ̀ bʋra yáá con!
Wàà nə swɩ̀n ʋ zɩga à nə?
Kʋ tíú bà ʋ yí à yɩra!
9 Nə̀ń, Yuu-Tiu Ba-Yígúrə́-Jə-Tiu wá bà ʋ san nə.
Wàà nə wàá à bʋra ʋ bʋ̀rɩ̀, sə ʋ cʋ̀gʋ̀ nə?
À dʋŋa tə mama wá kwɩn ndə gànʋ̀ nə,
yá tʋ́á nə wá də́ ba.
Á cʋga Ba-Yígúrə́-Jə-Tiu tʋtʋnʋ tə sʋgʋ
10 Wàà nə wulə á titəŋi wa,
ʋ nə dəri Ba-Yígúrə́-Jə-Tiu fən?
Kʋ tíú nə wulə,
sə ʋ cʋgʋ Ba-Yígúrə́-Jə-Tiu tʋtʋnʋ tə sʋgʋ!
Wàà nə vəli yikunu wa, poni nə tə̀lə́ lá?
Kʋ tíú nə wulə,
sə ʋ kə ʋ waa Ba-Yígúrə́-Jə-Tiu nə,
ʋ nə yɩ ʋ Yɩɩ, ʋ ga jələ ʋ cɩcɩ yuu wa!
11 Yá á mʋ̀ mama yɩ lɩ̀à tə á nə sʋ̀rɩ́ mən.
Á kwatarɩ zɩla yɩ cɩan də tə níə́ jiribu.
Á dàń vələ á mən tə wa,
á vələ á zʋ mənvwəsɩʋn bʋʋ tə wa,
də cɩan tə də tə níə́ jiribu mən tə,
á tətə nə sʋ̀rɩ́!
Kʋ twá də à mʋ̀ jɩɩn,
kʋ nətʋ tə ma yí aba,
yá á wá də́ càn á ma tɩ!