Ba-Yígúrə́-Jə-Tiu tʋtʋnʋ tə yɩ lʋʋ dwíə́ poni
49
1 Mʋʋ titəŋi wa lʋʋ níə́ lɩ̀à-ba, á cʋga à con!Dwíə́ tə, á nə wulə yiŋʋnɩ,
á zurə á yɩra, á cʋgʋ zəni!
Ba-Yígúrə́-Jə-Tiu bon nə,
də à tə wulə à nuu pùə́ wa,
ʋ bon à yɩrɩ də à tə wà à nuu pùə́ wa nan.
2 Ʋ pɩn à nii sʋgʋ jì ndə kwatara sɩ̀ʋ́, kʋ nə jə nii,
ʋ ga ja ʋ jɩɩn ywárɩ́ ʋ pú à yuu nə.
Ʋ pɩn à jì ndə cɩɩn nə,
ba nə deri kʋ nii,
ʋ ga səgə nə ʋ cwan wa.
3 Yá ʋ swɩ̀n à con, ʋ wʋ́:
«N yɩ à tʋtʋnʋ, Yɩzərayɛlə,
kʋ wá twá də n mʋ̀, à ma bɩrɩ à dun tə!»
4 Yá à mʋ̀ yà bʋŋa də
à yɩ à gwàrɩ̀ à tɩ̀àn tʋtʋ,
à yɩ à ken kajaŋa à tʋn,
à dʋgʋ woru wa, à pa vʋʋ nə.
Yá Ba-Yígúrə́-Jə-Tiu wá bʋ̀rɩ̀ à bʋra,
ʋ pa kʋ twá cɩ́gá cwəŋə nə,
à ŋwɩ́rán wulə à tíú Yɩɩ con.
5 Yá sɩ́ʋ́n nə, Ba-Yígúrə́-Jə-Tiu swɩ̀n,
ʋ mʋ̀ nə ma nə à nuu pùə́ wa,
sə à ya ʋ tʋtʋnʋ,
sə à ja Zwakɔbə dwíí tə à pìí à bà ʋ con,
sə Yɩzərayɛlə lɩ̀à bà duən yáá, ʋ yáá con.
À jə dun Ba-Yígúrə́-Jə-Tiu yáá con.
Cɩ́gá, à tíú Yɩɩ nə yɩ à dɩ̀àn.
6 Ʋ swɩ̀n à con, ʋ wʋ́:
«N bá ya à tʋtʋnʋ cɩcɩ,
n pìí n zɩ̀n Zwakɔbə dwíə́ tə,
n ga pa Yɩzərayɛlə lɩ̀à gɩganɩ tə pìí ba bà:
À tún mʋ́ sə n ya dwíə́ nəkaran* tə poni,
sə à wànɩ́ à jon ləzoni tə mama,
tɩa yuu bwálɩ́ mama nə.
Yongaʋ lɩ̀à ka pìí ka bà yoo
7 Nə̀ń kʋ tə Ba-Yígúrə́-Jə-Tiu,
jonu tə nə yə̀ Yɩzərayɛlə lɩ̀à ʋ jon,
ʋ mʋ̀ Yɩɩ tə nə yɩ parɩ* nə swɩ̀n
n mʋ̀ lìù tə con ba nə fʋfʋlɩ,
n mʋ̀ lìù tə lʋʋ nii tə lɩ̀à nə culi,
kʋ pa n jì dɩ̀àn tɩ̀án yoŋu:
«Pɛ̀gá wá na mʋ́, ba ga nyɩ́n ba zàn yɩɩ nə,
pabɩa wá na mʋ́, ba ga tʋ ba nadwana yuu
n yáá con, ba pa mʋ́ dun,
Ba-Yígúrə́-Jə-Tiu yɩrɩ, ʋ nə yɩ pùə́ nədʋ tíú,
Yɩzərayɛlə lɩ̀à Yɩɩ tə yɩrɩ,
ʋ nə yɩ parɩ, ʋ ga kúrí mʋ́.»
8 Nə̀ń kʋ tə Ba-Yígúrə́-Jə-Tiu nə swɩ̀n:
«À le n yɩjʋnɩ, máŋá tə wa à nə pɩ̀à sə à le mʋ́,
à ga jon mʋ́, dɩɩn tə nə
à nə pɩ̀à sə à jon mʋ́.
À cɩ̀gà n nə à tún vàn nə,
sə à pa n ya lalʋʋ tə nimarʋ dansɩa lìù,
sə à pìí à kwɛn lʋʋ nii tə,
à ga tara kʋ bwálá tə nə cʋ̀gʋ̀, à pa ba.
9 Sə à swɩ̀n bandiə lɩ̀à con, à wʋ́: “Á naŋa!”
À ga swɩ̀n lɩ̀à tə con,
ba nə wulə yikunu wa, à wʋ́:
“Á naŋa poni nə!”
Ba wá wànɩ́ ba na wodiu coŋi tə nii nə,
ba ga wá də́ dədwələn tə mama yuu wa.
10 Niən kʋ́ʋ̀ bá ja ba,
nanyʋnɩ də ma kʋ́ʋ̀ bá ja ba.
Kasɔɔ lanworu tɩlʋŋʋ də yɩcaʋ bárɩ́
kʋ́ʋ̀ bá wʋwalɩ ba.
Cɩ́gá, à mʋ̀ Ba-Yígúrə́-Jə-Tiu dəri ba yinəgə zənzən,
yá à wá ya ba yáá,
à kə ba cwəŋə wa,
à ja va nabuliyɩa nii nə.
11 À wá pa à pɛɛn tə mama lwàń tə jì coŋi,
à ga sun à coŋi tə gwàlán tə.
12 Nə̀ń ba nə, ba naŋa yiŋʋnɩ ba bɩ̀àn,
ba duən naŋa jɩzən saparʋ
də yɩɩ yizwɩa con ba bɩ̀àn,
ba duən də naŋa Sinimə lʋʋ nii wa ba bɩ̀àn.»
13 Lanworu tə mà pupwən cə̀rí,
sə tɩa tə ga jwɛ!
Pɛɛn tə maga pupwən cə̀rí!
Cɩ́gá, Ba-Yígúrə́-Jə-Tiu kòrì ʋ lalʋʋ tə,
ʋ ga dəri ba lalaŋa tə yinəgə zənzən.
Ba-Yígúrə́-Jə-Tiu wà ʋ lɩ̀à tə yoo swɛ̀ɛ́
14 Siyon* tɩʋ tə swɩ̀n, kʋ wʋ́:
«Ba-Yígúrə́-Jə-Tiu vɩga nə ʋ dʋgʋ,
Yuu-Tiu swɛ̀ɛ́ à yoo!»
15 Yá Ba-Yígúrə́-Jə-Tiu le, ʋ wʋ́:
«Kan yàá swɛ̀ɛ́ bìsɩ̀ná tə yoo,
ʋ nə ŋʋ̀à ʋ nyʋnɩ nə naaa?
Ʋ ba bìú tə ʋ nə lɩrɩ yinəgə dəri naaa?
Yá də ʋ nə swə ʋ swɛ̀ɛ́ ʋ yoo,
à mʋ̀ ba swɛ̀ɛ́ n yoo də mama.»
16 À bɩ̀rɩ̀ n yɩrɩ à tún à jɩtalɩ wa.
À bʋŋa n biritaŋan tə yoo máŋá mama.
17 N bɩ̀á tə dəri ba bɩ̀àn,
yá lɩ̀à tə nə gwɛrɩ mʋ́,
ba pa n jì dibwərən,
wá dəri ba nan ba va yiŋʋnɩ, ba yá mʋ́.
18 Zɩ̀n n yáá, n ywàń tɩa mama, n ja kɩkarɩ:
N bɩ̀á tə mama kun duən nə,
ba pìí ba bɩ̀àn n con.
À dùə̀, à mʋ̀ Ba-Yígúrə́-Jə-Tiu wulə!
N wá pìí n jon n bɩ̀á tə mama n kə n yɩra,
ndə wiən nə, n nə ma nàn n tɩ̀àn.
N wá vwa ba n marɩ n yɩra,
ndə kadʋrʋ bwanzɩla nə.
À mʋ̀ Ba-Yígúrə́-Jə-Tiu nii sʋgʋ nə!
19 Cɩ́gá, n tɩʋ tə cʋ̀gʋ̀,
n sadiyun tə jìgə̀ dibwərən,
n lʋʋ nii tə kwɩ̀n kʋ lɩ̀à nə.
Sɩ́ʋ́n nə, n dàń wá jì pɩpɩan,
n pa n wa lɩ̀à tə nə,
yá lɩ̀à tə yà nə cʋ̀gà mʋ́,
wá va yiŋʋnɩ ba yá mʋ́.
20 N bɩ̀á tə n yà nə kwɩ̀n ba nə,
dàń wá swɩ̀n n zɩan wa
də ba bwɛ́, ba wʋ́:
«Bwálɩ́ tə yɩ pɩpɩan zənzən kʋ pa nəba!
Pɩa bwálɩ́ n pa nəba sə nə wànɩ́ nə jə̀ń lá.»
21 Yá n dàń wá swɩ̀n n waa con, n wʋ́:
«Wàà nə lɩrɩ bɩ̀á ba tə ʋ pa nə?
Cɩ́gá, à yà kwɩ̀n bɩ̀á nə,
à yà yɩ kadɩŋʋ!
Ba yà ja nə ba va yongaʋ,
ba ga vɩ nə ba dʋgʋ!
Wàà nə kʋ̀nɩ̀ bɩ̀á ba tə?
À cɩcɩ yà nə ga!
Bɩ̀á ba tə yà yɩ ba wulə yə̀n nə?»
22 Yuu-Tiu Ba-Yígúrə́-Jə-Tiu swɩ̀n, ʋ wʋ́:
«Nə̀ń, à wá zɩ̀n à jɩɩn à te dwíə́ nəkaran* tə con,
à wá zɩ̀n à kʋ̀ʋ̀ mɩmɩnʋ yɩɩ nə,
à te lʋʋ dwíə́ tə con,
yá ba wá ja n bɩ̀á tə ba jɩ̀àn wa,
ba ja pìí ba bà.
Ba wá zɩn n bwɩ̀ɩ́ tə ba para wa, ba ja bà.
23 Pɛ̀gá nə wá ywàń n bɩ̀á tə yuu,
yá ba pabwɩɩ ga nə wá kʋ̀nà ba.
Ba wá tʋ ba nadwana yuu n yáá con,
ba pú ba yáá tɩa, ba pa mʋ́ dun,
ba ga dàlà n nɛɛ pùrú.
Yá n dàń wá lwarɩ də
à mʋ̀ nə yɩ Ba-Yígúrə́-Jə-Tiu,
yá lɩ̀à tə nə jələ à yuu wa, bá də́ cavɩra.»
24 Ba yàá pìí ba jon wiən tə
kwatarʋ nə ta ʋ jon kʋ̀ʋ̀ wa, ʋ con naaa?
Dɩ̀àn tíú yoŋu wàá ʋ yáá nə ʋ jɛ́n naaa?
25 Cɩ́gá, nə̀ń kʋ tə Ba-Yígúrə́-Jə-Tiu nə swɩ̀n:
«À wá pìí à jon yoŋu tə
kwatarʋ nə jɩn, à dʋgʋ,
dɩ̀àn tíú ga wá kwɩ̀n won tə nə,
ʋ nə ta ʋ jon!
À mʋ̀ wá ta lɩ̀à tə nə tɛ mʋ́,
à ga jon n bɩ̀á tə á dʋgʋ.
26 À wá pa lɩ̀à tə nə fɩfɩn mʋ́
də́ ba tətə yatanaŋʋ.
Ba wá nyʋn ba tətə jana
ba sú ba bʋbʋnɩ, ndə divɛn nədʋn nə.
Yá ləzoni mama dàń wá lwarɩ də
à mʋ̀ nə yɩ Ba-Yígúrə́-Jə-Tiu,
n jonu tə ʋ nə yə̀ mʋ́ ʋ jon,
Zwakɔbə Yɩɩ tə ʋ dɩ̀àn nə dwə tə mɛ.