Yɩɩ swɩ̀n yìə̀n nədʋra yoo ʋ bɩrɩ
48
1 Á cʋga yoo kʋ tə, Zwakɔbə dìə̀ lɩ̀à-ba,á mʋ̀ lɩ̀à tə á yɩrɩ nə yɩ Yɩzərayɛlə,
ba nə lɩrɩ aba Zwida dwíí tə wa,
á mʋ̀ lɩ̀à tə á nə dwì durə
də Ba-Yígúrə́-Jə-Tiu yɩrɩ tə,
á ga boŋə á kəni Yɩzərayɛlə lɩ̀à Yɩɩ tə nə,
á ga ba cɩ́gá də cɩ́gá cwəŋə nə twá!
2 Cɩ́gá, ba boŋə ba “Yɩɩ tɩʋ lɩ̀à”,
yá ba yɩ Yɩzərayɛlə lɩ̀à Yɩɩ tə yuu wa ba jələ,
ʋ yɩrɩ nə yɩ Ba-Yígúrə́-Jə-Tiu, kwatara Yɩɩ.
3 Yìə̀n tə nə tʋn tə kɛ̀ń,
à swɩ̀n tə yoo fuən mama.
Tə nan à nii wa, yá à swɩ̀n tə à pa ba nì.
À tʋn naa nədʋ, yá tə jìgə̀.
4 À nə yə̀ə́ də á zɩɩn ba nə̀ń,
yá á yuu dà ndə lugu nə,
á yii ga dà ndə cɩnɩan nə yɩrɩ,
5 à swɩ̀n yìə̀n təntə à bɩrɩ aba fuən mama.
À pɩn á nì tə yoo, də tə tə wà twi,
sə á dàn ká swɩ̀n, á wʋ́:
«Kʋ yɩ à woŋwanʋ nə tʋn tə,
kʋ yɩ à woŋwanʋ tə ba nə sə̀,
nə à yə̀ə́ à woŋwanʋ tə
ba nə nyɩan lugu ba ma fwa,
nə pɩn nii kʋ ma tʋn.»
6 Á nì zəni!
Á ywàŋá kʋ tə mama à nə tʋn!
Á mʋ̀ bá swɩ̀n kʋ á bɩrɩ naaa?
Kʋ nə zɩgɩ sɩ́ʋ́n nə,
à dàń swɩ̀n yìə̀n nədʋra à bɩrɩ aba.
Tə yɩ yìə̀n à nə cɩ̀gà à tún vàn nə,
á yà nə yəri tə.
7 Tə tà yìə̀n à nə fwa fuən mama,
kʋ yɩ sɩ́ʋ́n nə à fwa tə.
Á tə yà wà tə yoo nì,
də kʋ nə tà zə̀n,
sə á dàn ká swɩ̀n, á wʋ́:
«Ooo, à yà yə̀ə́ kʋ!»
8 Á wà yoo mama nì,
á wà yoo mama lwarɩ,
yoo mama wà dí yáá kʋ tʋ á zɩɩn wa.
Cɩ́gá, à yà yə̀ə́ də á yɩ níə́ bələ tɩ̀án,
yá ba boŋə aba “Zɩbanənyɩna”,
də á tə wulə á nuu pùə́ wa.
9 À taa à tətə yɩrɩ,
à yá à lɩŋa tə.
À taa à nə mɛ də dun yɩrɩ,
à ja à tɩ̀àn də aba,
sə à dàn ká pa á jɛ́n tɩa yuu wa mɩ́ámɩ́án.
10 Nəŋə, à nyɩan aba sə à lɩ á durən,
kʋ nə tà ndə ba nə nyɩŋa wárʋ́,
ba lɩ kʋ durən nətʋ.
À dídə́n aba càn wa,
ndə lugu nə, ba nə ken líí mən wa.
11 Kʋ yɩ à tətə yɩrɩ nə à taa,
à tətə yɩrɩ nə à taa à tʋŋa nətʋ.
Bɛ̀ɛ̀ nə wá pa à yá
à pa ba cʋ̀gà à yɩrɩ nə?
À bá pa à dun tə lìù don nə!
Yoo tə Ba-Yígúrə́-Jə-Tiu nə tanɩ nii wa sú
12 Á cʋga à sʋgʋ, Zwakɔbə dwíí-ba,
á mʋ́ Yɩzərayɛlə lɩ̀à tə à nə bon!
Kʋ yɩ à mʋ̀, à mʋ̀ nə yɩ təntən,
à mʋ̀ ga nə yɩ talɩkwa də.
13 À mʋ̀ jɩɩn nə fwa tɩa tə,
yá à mʋ̀ jɩzən nə larɩ lanworu tə.
À bon tə, yá tə twá duən tə bà.
14 Á mama bɩ̀àn duən yáá, á cʋgʋ!
Ba wàà nə wànɩ́ tə yìə̀n tə ʋ swɩ̀n, ʋ bɩrɩ?
Lìù tə Ba-Yígúrə́-Jə-Tiu nə swə,
wá tʋn Ba-Yígúrə́-Jə-Tiu fɩra,
ʋ zɩgɩ Babɩlɔnə tɩ̀án nə,
yá ʋ wá zɩ̀n ʋ vàn Kaləde* tɩ̀án tə yuu wa.
15 Kʋ yɩ à mʋ̀, à mʋ̀ cɩcɩ nə swɩ̀n.
À bon wá, à pɩn ʋ bà,
yá ʋ wá tʋn ʋ tʋtʋŋɩ,
ʋ pa kʋ nii sú.
16 Á bɩ̀àn á yí à yɩra, á cʋgʋ!
Kʋ də̀ń laŋʋ mama, à wà səgə à ma swɩ̀n,
à yɩn lá, yìə̀n təntə də̀ń laŋʋ wa.
Yá sɩ́ʋ́n nə, Yuu-Tiu Ba-Yígúrə́-Jə-Tiu
dàń tʋn nə də ʋ Siŋu* tə.
Yɩzərayɛlə lɩ̀à wà Yɩɩ nii zìlí
17 Nəŋə kʋ tə Ba-Yígúrə́-Jə-Tiu,
á jonu tə ʋ nə yə̀ aba ʋ jon,
Yɩzərayɛlə lɩ̀à Yɩɩ tə nə yɩ parɩ*, nə swɩ̀n:
«À mʋ̀ Ba-Yígúrə́-Jə-Tiu,
á tíú Yɩɩ kàrɩ̀ aba,
sə kʋ ja sáŋʋ́ kʋ pa aba.
Kʋ mʋ̀ nə pɩn à pɛ́ aba
à kəni cwəŋə nəzəŋu wa.
18 Ooo! Á yà nə cʋgʋ à yìə̀n tə
à nə pɩn nii tə yuu wa!
Á yà wá ja bɩcan sìə́ ndə mʋnaa nə,
á ga ya cɩ́gá cwəŋə wa ndə mʋʋ nakulə nə.
19 Á dwíí yà wá ya dánɩ́ ndə mʋʋ nii kasɩlʋ nə,
á bɩ̀á ga ya ndə kasɩlʋ bɩ̀á nə,
yá á yɩrɩ yà bá jɛ́n à yáá con.
20 Á naŋa Babɩlɔnə wa,
á dərə á nan, á yá Kaləde tɩ̀án tə!
Á maŋa kʋ á bɩrɩ də pupwən cə̀rí,
á bwərə kʋ á pa kʋ va,
kʋ yí tɩa nii yígúrə́ mama wa!
Á swɩan də Ba-Yígúrə́-Jə-Tiu yə̀
ʋ tʋtʋnʋ Zwakɔbə dwíí tə ʋ jon!
21 Nanyʋnɩ wà ba jɩn tɩkʋrʋ tə wa,
ʋ nə ja ba ʋ va.
Ʋ pɩn nɩ́á pwin tə nan pɩ̀ʋ̀ wa, tə pa ba,
ʋ lwə pɩ̀ʋ̀ tə,
yá nɩ́á dəri tə nan.
22 Wʋlʋnyɩna bá na bɩcan sìə́!
Ba-Yígúrə́-Jə-Tiu nə swɩ̀n kʋ!