Babɩlɔnə tʋrɩ yoo
47
1 Cú n jə̀ń pùrú wa Babɩlɔnə,tɩzəŋu tə nə yɩ ndə kacɩɩn nə!
Jə̀ń tɩpɩrɩ wa.
Cɩ́gá, ba cúə́ mʋ́ n padaʋ tə yuu,
Kaləde* tɩ̀án bʋ̀á!
Ba kʋ́ʋ̀ ba bon mʋ́,
“Tɩʋ tə nə ziən, kʋ ga jə fɩra”.
2 Tí nʋŋʋ, n gà mun.
Lɩ n gankɩkala tə n yáá nə,
kʋ̀rɩ́ n ganzwɩdarʋ tə n pa kʋ dɩ̀,
n ga yá n ciən,
n ma bɩn mʋnɛɛ tə!
3 N wá ya yaswələ,
yá lɩ̀à wá na n cavɩra.
À wá fwi à lɩŋa,
yá à bá yá à pa lìù mama cɩ̀ à yáá nə!
4 Nə jonu tə ʋ nə yə̀ nəba ʋ jon
yɩrɩ nə yɩ Ba-Yígúrə́-Jə-Tiu, kwatara Yɩɩ,
Yɩzərayɛlə lɩ̀à Yɩɩ tə ʋ nə yɩ parɩ*.
5 Jə̀ń tɩa sənbwen,
n ga səgə yikunu wa,
Kaləde tɩ̀án bʋ̀á!
Ba kʋ́ʋ̀ bá bon mʋ́,
“Payun Pakan.”
6 À lɩŋa yà zàn à lalʋʋ tə yuu,
à yà jələ lɩ̀à tə ba nə yɩ à mʋ̀ tori,
ndə durən lɩ̀à nə,
kʋ pa à yá à pa ba tʋ n jɩɩn wa,
yá n wà ba yinəgə dəri.
N pɩn bazʋnʋ tətə də́ càn zənzən n jɩɩn də̀ń.
7 N yà swɩ̀n, n wʋ́:
«À wá ya pakan máŋá mama wuuu!»
Yá n wà yìə̀n tə tə mama yoo bʋ́n,
n wà jwɩan yoo bʋ́n.
8 Sɩ́ʋ́n nə, n dàń cʋgʋ,
n mʋ̀ kan tə n nə fwa n fɩra,
n nə saa də yazurə,
yá n swɩ̀n, n wʋ́:
«À mʋ̀ nə, à mʋ̀ cɩcɩ nə wulə!
À bá jì kadənu də mama,
yá à bá kwɩ̀n à bɩ̀á də nə!»
9 Yìə̀n bələ təntə wá yí mʋ́,
naa nədʋ, dɩɩn nədʋ:
N wá kwɩ̀n n bɩ̀á nə,
yá n wá jì kadənu.
Də n fwanan kapʋpʋ tə mɛ,
də n cɩrɩ tʋ̀tʋ̀nán tə mɛ,
yìə̀n təntə wá kə lɛɛ n nə.
10 N yà jələ wʋlʋŋʋ tə yuu wa n nə fwa.
N yà swɩ̀n n waa con, n wʋ́:
«Lìù mama bá nə na!»
N wʋbʋŋa tə də n yənu tə
gɩgarɩ mʋ́ tə dʋgʋ,
kʋ pa n swɩ̀n n waa con, n wʋ́:
«À mʋ̀ nə, à mʋ̀ cɩcɩ nə wulə!»
11 Lɛɛ wá yí mʋ́,
yá n bá wànɩ́ tə yáá nə n cɩ̀.
Cʋcʋran wá tʋ n yuu wa,
yá n bá wànɩ́ n tɩ̀àn nə n cɩ̀.
Yobɩbɩlʋ, n nə yəri kʋ nii nə,
wá yí mʋ́, kʋ dɩ̀ n yuu.
12 N dàń kə dɩ̀àn,
n də tʋŋa n cɩrɩ tʋ̀tʋ̀nán tə,
də fwanan kapʋpʋ tə n nə gwàrɩ̀ n tɩ̀àn
n ma tʋŋa, kʋ nə zɩgɩ n zandʋan mama!
Kʋ wàá də tə wá ja nywarɩ tə pa mʋ́,
kʋ ma wàá də tə wá pa lɩ̀à dəri n fən!
13 N pɩ̀à kwìə̀ n gwàrɩ̀!
Ba mʋ̀ lɩ̀à tə nə ywàŋá kacɩlacɛɛ lanworu tə wa,
ba ma swɩ̀n jwɩan yoo tə nə wá yí mʋ́
candʋan mama wa, ba bɩrɩ mʋ́,
ba dàń zaŋa ba jon mʋ́!
14 Nə̀ń ba wá ya ndə gaʋ nə, mən nə wá də́.
Ba ba jon ba tɩ̀àn mənvwə wa.
Kʋ tà məncala ba nə ma fwa wodiu,
nə à yə̀ə́ mən ba nə jəni tə yáá, ba ywəri.
15 Mə yoo nə kʋ nə wá yí lɩ̀à tə,
n nə gwàrɩ̀ n tɩ̀àn ba yɩrɩ,
lɩ̀à tə n də ba nə tʋn duən nə,
kʋ nə zɩgɩ n zandʋan mama.
Ba lìù mama wá ywan, ʋ va ʋ gayaa,
ba lìù mama ba wànɩ́ mʋ́ ʋ jon!