Yɩa tə lɩ̀à nə zɩŋa, də Yɩɩ tə nə zɩŋa lɩ̀à yìə̀n
46
1 Woŋwanʋ Bɛlə tʋa kʋ nadwana yuu,woŋwanʋ Nebo kwá tɩa.
Ba tì ba woŋwanan tə,
ba ma zɩn vàná tə nə zɩŋa zɩla.
Á woŋwanan tə, á yà nə zɩŋa,
jìgə̀ zɩla tə nə dù,
vàná tə nə gwàrɩ̀ zɩŋa!
2 Woŋwanan tə mama kwá tɩa,
tə tʋa tə nadwana yuu,
tə wà wànɩ́ tə jon tə nyɩnyɩga tə
nə jìgə̀ zɩlɩ, vàná zɩŋa,
yá ba ja tə tətə, ba vələ yongaʋ.
3 Á cʋga à con, Zwakɔbə dìə̀ lɩ̀à-ba,
də á mʋ̀ Yɩzərayɛlə lɩ̀à gɩganɩ tə,
á mʋ̀ lɩ̀à tə à nə sinti à ywàŋá á yuu,
də á tə wulə á nuu pùə́ wa,
á mʋ̀ lɩ̀à tə à nə zɩŋa,
kʋ nə zɩgɩ á lɩrʋ máŋá mama!
4 Mə nətʋ nə à wá ya də aba,
á kori á kwɩn,
yá mə nətʋ nə à wá san aba,
á yuu kori kʋ pɩ̀rɩ̀.
À mʋ̀ nə dí yáá à tʋn kʋ,
yá à mʋ̀ tə nə wá zɩn aba,
à san aba, à ga jon aba.
5 Wàà nə á wàá, á ma maŋa də nə,
də à də kʋ tíú nə yɩ nədʋ?
Á bʋŋa də, à də wàà nə nyən duən,
sə à də kʋ tíú ya won nədʋ?
6 Ba yàá lwá sɩ́án tə nə wulə ba lɔ̀ɔ̀ wa,
ba kəri wárʋ́ səkəri yuu wa,
ba ma ŋwɩ́n cɩnayarʋ,
sə ʋ ja tə ʋ fwa yɩɩ, ʋ pa ba,
yá ba dàń yàá twɩ ba nadwana yuu
kʋ yáá con, ba pɩn kʋ dun.
7 Ba yàá tì ba yɩɩ tə ba zɩn,
ba yàá tì kʋ ba tún ba vapɔɔ yuu,
ba ja va ba tún kʋ yipaa bwálɩ́ nə.
Yá kʋ ba kʋ yipaa bwálɩ́ tə nə sʋsʋga!
Ba nə swə ba bubwi ba kəni kʋ nə,
kʋ ba le,
kʋ wàrɩ̀ ba kʋ joŋə jɩgwarʋ wa.
Yɩɩ sáŋʋ́ tə máŋá bwə́lə́
8 Á lìə́ á tɩ̀àn kʋ nətʋ tə,
á ga pa á jɩ̀àn dàn!
Á bʋŋa kʋ yuu wa zəni,
á mʋ̀ cʋna lɩ̀à-ba!
9 Á lìə́ á tɩ̀àn máŋá tə yoo,
ka nə kɛ̀ń, kʋ ba yigə.
Cɩ́gá, à yɩ Yɩɩ,
yá Yɩɩ don tə̀lə́, kʋ ma dà à nə.
À yɩ Yɩɩ, yá à ba kamandon jə.
10 À swɩ̀n kʋ tə nə bɩ̀àn à bɩrɩ,
kʋ də̀ń laŋʋ mama.
Yá à swɩ̀n kʋ tə nə wá tʋn yoo à bɩrɩ,
kʋ máŋá ba yigə, də kʋ nii tə wà swi.
À swɩ̀n də à pubʋŋa yìə̀n tə nii wá sú,
yá à wá tʋn kʋ tə mama à nə swə.
11 À pɩn lìù nan lʋʋ nii wa
kʋ nə ŋʋ́ná, ʋ bà,
ʋ yɩ ndə zənpuu nə,
à nə bon yɩɩ yɩpɩan con.
Ʋ wá tʋn à pubʋŋa yìə̀n tə,
ʋ pa tə nii sú.
Kʋ tə à nə swɩ̀n, à yàá tʋn kʋ.
Kʋ tə à nə tanɩ sə à tʋn,
à yàá tʋn kʋ, à pa kʋ nii sú.
12 Á cʋga à con,
á mʋ̀ lɩ̀à tə á bɩcanɩ nə kʋa,
á ga ŋʋ́ná də cɩ́gá cwəŋə!
13 À wá bʋ̀rɩ̀ bʋra, kʋ twá cɩ́gá cwəŋə nə.
Kʋ máŋá bwə́lə́, kʋ ba ŋʋ́ná,
yá à sáŋʋ́ tə ba dán kʋ ma bà.
À wá pa jonu Siyon tɩ̀án nə,
à ga pa Yɩzərayɛlə lɩ̀à na à dun tə.