Yɩɩ kúrí Sirusə ʋ tún vàn nə ʋ pa ʋ tɩ̀àn nə
45
1 Nə̀ń yoo tə Ba-Yígúrə́-Jə-Tiu nə swɩ̀n pɩ̀ʋ́ Sirusə con, ʋ nə kúrí.
Ʋ mʋ̀ bɛɛ tə yɩ à jə ʋ jɩzən nə,
sə à pa lʋʋ dwíə́ tʋ ʋ yáá con,
sə ʋ kʋ̀rɩ̀ pɛ̀gá tàŋá vwərən,
sə à súrí tɩan mimien bwə̀rə̀n bələ tə, ʋ yáá con,
yá mimii mama kʋ́ʋ̀ bá sun ʋ yáá con:
2 «À tətə wá ya n yáá à va,
à wá kwɛn bwálá zizinu tə,
à pa tə mɛ duən,
à wá kɛ́n cɩnɩan bwə̀rə̀n tə,
à ga nyʋnyʋgʋ lugu boruswaran tə.
3 À wá pa mʋ́ wiən tə nə jə funə, tə nə səgə,
jɩjə wiən tə nə səgə,
sə n lwarɩ də à mʋ̀ Ba-Yígúrə́-Jə-Tiu
nə boŋə mʋ́ n yɩrɩ yuu wa,
yá à mʋ̀ nə yɩ Yɩzərayɛlə lɩ̀à Yɩɩ tə.
4 À tʋtʋnʋ Zwakɔbə dwíí tə yɩrɩ,
də Yɩzərayɛlə lɩ̀à tə yɩrɩ à nə kúrí,
à bon mʋ́ n yɩrɩ yuu wa,
à pa mʋ́ dun, yá n yəri nə.
5 À mʋ̀ nə yɩ Ba-Yígúrə́-Jə-Tiu,
yá Yɩɩ don kʋ́ʋ̀ tə̀lə́ kʋ ma dà à nə,
à mʋ̀ kwa nə, Yɩɩ don kʋ́ʋ̀ tə̀lə́.
À ken dɩ̀àn n jɩɩn wa, yá n yəri nə.
6 Kʋ nətʋ wá pa,
kʋ nə zɩgɩ yɩɩ yipɩan con,
kʋ ja va kʋ nan yɩɩ yizwɩa con,
lɩ̀à wá lwarɩ də à mʋ̀ kwa nə, kʋ yɩ tʋtʋ.
À mʋ̀ nə yɩ Ba-Yígúrə́-Jə-Tiu,
yá Yɩɩ don kʋ́ʋ̀ tə̀lə́, kʋ ma dà à nə.
7 À mʋ̀ nə dɩga poni,
yá à mʋ̀ nə fwa yikunu də.
À mʋ̀ nə pɩn sìə́ wulə,
à mʋ̀ ma nə fwa lɛɛ də.
À mʋ̀ Ba-Yígúrə́-Jə-Tiu nə tʋŋa yìə̀n təntə mama.
8 Lanworu, zɩgɩ baan n pa cɩ́gá cwəŋə
nan bakwan tə wa ka cwí ndə dwà nə!
Tɩa, súrí n jon jonu,
sə cɩ́gá cwəŋə ga pɛ́n!
À mʋ̀ Ba-Yígúrə́-Jə-Tiu nə tʋŋa kʋ nətʋ.»
Daʋ də nəkənmarʋ
9 Nə̀ń kʋ lɛɛ nyɩɛn, kʋ pa lìù tə nə,
ʋ nə tʋ́tʋ̀nɩ́ də lìù tə ʋ nə ma wá,
yá ʋ yɩ ndə daʋ nəkənə nə,
ka nə wulə ka duən nəkəni wa!
Daʋ wàá lìù tə con ʋ nə ja kʋ ʋ ma tʋŋa,
kʋ swɩ̀n, kʋ wʋ́:
«Bɛ̀ɛ̀ nə n fwa?
N tʋtʋŋɩ tə ba ziən!»
10 Nə̀ń kʋ lɛɛ nyɩɛn, kʋ pa bìú tə nə,
ʋ nə wá bwe ʋ nyɩna, ʋ wʋ́:
«Bɛ̀ɛ̀ nə pɩn n ma lɩra nə nətən?»
Nə à yə̀ə́ ʋ nə bwe ʋ nuu, ʋ wʋ́:
«Bɛ̀ɛ̀ nə n lɩrɩ n kə lʋʋ wa nətən?»
11 Nə̀ń kʋ tə Ba-Yígúrə́-Jə-Tiu,
Yɩzərayɛlə lɩ̀à Yɩɩ tə nə yɩ parɩ*,
ʋ nə fwa ba ʋ kə lʋʋ wa, nə swɩ̀n:
«Á mʋ̀ nə pɩ̀à sə á bwe nə bwie,
jwɩan yìə̀n yuu wa,
á ga pa nə nii à bɩ̀á tə yuu wa,
də kʋ tə yuu wa à nə mɛ sə à fwa?
12 À mʋ̀ nə fwa tɩa tə,
à ga fwa ləzwənə à kə ka yuu wa.
À mʋ̀ nə larɩ lanworu tə də à jɩ̀àn,
yá à mʋ̀ nə pɩn nii lanworu tə wa wiən* tə mama nə.
13 À mʋ̀ nə kúrí Sirusə,
sə ʋ tʋn kʋ twá cɩ́gá cwəŋə nə,
yá à wá kwɛn ʋ coŋi mama.
Ʋ wá pìí ʋ lwà à tɩʋ tə,
yá ʋ wá yá à lɩ̀à tə,
ba nə ja va yongaʋ,
ʋ pa ba pìí ba vìí.
Ʋ bá pa ba ŋwɩ́n bwaan,
ʋ ma bá jon zìlə́ won də ba con.
À mʋ̀ Ba-Yígúrə́-Jə-Tiu,
à nə yɩ kwatara Yɩɩ nə swɩ̀n kʋ!»
Yɩɩ wulə Yɩzərayɛlə lɩ̀à titəŋi wa
14 Nəŋə kʋ tə Ba-Yígúrə́-Jə-Tiu nə swɩ̀n:
Ezwipətə tɩ̀án wiən tə ba nə tʋn ba na,
də Kuswə də Seba tɩ̀án nywarɩ tə,
Seba tɩ̀án təntə, ba nə yɩ ləzwəndaran,
ba wiən tə wá lwàń
tə bà á mʋ̀ Yɩzərayɛlə lɩ̀à con,
yá tə wá jì á mʋ̀ nyiən.
Á wá vwa dwíə́ təntə də banzala,
á kə á kwa, á vaŋa.
Ba wá tʋ ba nadwana yuu á yáá con,
ba ga swɩ̀n, ba wʋ́:
«Á mʋ́ cɩcɩ con nə Yɩɩ wulə,
yá Yɩɩ don tə̀lə́, kʋ ma dà ʋ nə.
Yɩa tə duən tə mama yɩ tʋtʋ!»
15 Cɩ́gá mama, Yɩzərayɛlə lɩ̀à Yɩɩ,
n yɩ Yɩɩ tə n nə səgə n tɩ̀àn,
yá n mʋ̀ nə yɩ jonu!
16 Cavɩra də fʋfʋlʋ yí ba mama,
ba mʋ̀ lɩ̀à tə mama, ba nə sə̀ woŋwanan,
vìrí də fʋfʋlʋ.
17 Ba-Yígúrə́-Jə-Tiu nə yɩ Yɩzərayɛlə
lɩ̀à mʋ̀ jonu, máŋá mama wuuu.
Á kʋ́ʋ̀ ba də́ cavɩra,
ba ma kʋ́ʋ̀ bá fʋfʋlɩ aba də mama,
kʋ ja vələ máŋá də máŋá mama wuuu.
Yɩɩ wá jon Yɩzərayɛlə lɩ̀à
18 Cɩ́gá, Ba-Yígúrə́-Jə-Tiu tə ʋ nə fwa lanworu,
ʋ mʋ̀ Yɩɩ tə ʋ nə fwa tɩa,
ʋ ga dɩ ka ʋ pa ka jə dɩ̀àn,
ʋ wà ka fwa ʋ pa ka ya woru,
ʋ dàń nə yɩ ʋ fwa ka,
sə lɩ̀à ya ka yuu wa,
á nəŋə kʋ tə, ʋ nə swɩ̀n:
«À mʋ̀ nə yɩ Ba-Yígúrə́-Jə-Tiu,
Yɩɩ don tə̀lə́, kʋ ma dà à nə.
19 Kʋ tà à səgə tɩa yikunu bwálɩ́ wa,
à ma swɩ̀n.
À wà Zwakɔbə dwíí tə con swɩ̀n,
sə ba pɩ̀à nə woru wa!
À mʋ̀ Ba-Yígúrə́-Jə-Tiu yɩ kʋ tə
nə yɩ cɩ́gá nə à swɩ̀n,
kʋ tə nə yɩ mənəmənə nə à bòrì à bɩrɩ.»
Dwíə́ nəkaran* tə wá sɛ̀ Yɩɩ
20 Á bɩ̀án duən yáá nə,
á twá duən á bà á yí á yɩra,
á mʋ́ dwíə́ nəkaran gɩganɩ* tə!
Ba ba yənu jə,
ba mʋ̀ lɩ̀à tə nə zɩŋa ba dàʋ̀ woŋwanʋ,
ba ga boŋə ba kəni yɩɩ nə,
kʋ nə wàrɩ̀ ba kʋ joŋə.
21 Á swɩan kʋ á bɩrɩ,
á ga bɩrɩ á pubʋŋa kʋ yuu wa!
Ba vʋra, ba pa kwìə̀ duən nə!
Wàà nə dí yáá ʋ pa ba nì yìə̀n təntə fuən mama,
ʋ ga swɩ̀n tə ʋ bɩrɩ, kʋ máŋá nə ba yigə?
Kʋ tà à mʋ̀ Ba-Yígúrə́-Jə-Tiu naaa?
À mʋ̀ kwa nə, Yɩɩ don kʋ́ʋ̀ tə̀lə́.
Yɩɩ don tə̀lə́, ʋ nə yɩ cɩ́gá tíú, ʋ ga yɩ jonu,
à mʋ̀ kwa nə, Yɩɩ don mama kʋ́ʋ̀ tə̀lə́.
22 Á viviri á yáá á kə à con,
yá à wá jon aba, á mʋ̀ lɩ̀à tə mama,
á nə wulə tɩa tə nii yígúrə́ wa!
Cɩ́gá, à mʋ̀ nə yɩ Yɩɩ,
yá Yɩɩ don tə̀lə́, kʋ ma dà à nə.
23 À dùə̀ də à tətə,
cɩ́gá nə naŋa à nii wa,
kʋ yɩ sʋgʋ, kʋ nə ba kwɛ̀:
Ləzwənə mama wá tʋ ʋ nadwana yuu à yáá con,
ʋ ga súrí ʋ nii ʋ dù,
ʋ ma pa dun à mʋ̀ Yɩɩ nə.
24 Ba wá swɩ̀n à yoo, ba wʋ́:
«Ba-Yígúrə́-Jə-Tiu cɩcɩ con nə,
cɩ́gá cwəŋə də dɩ̀àn wulə.»
Lɩ̀à tə mama ba lɩŋa yà nə zaŋa à yuu wa,
wá pìí ba bà à con də cavɩra.
25 Ba-Yígúrə́-Jə-Tiu wá pa
Yɩzərayɛlə dwíə́ tə mama jì cɩ́gá tɩ̀án,
yá ba wá bʋ ba tɩ̀àn nə kʋ yɩrɩ.