44
1 Ba-Yígúrə́-Jə-Tiu kʋ́ʋ̀ swɩ̀n, ʋ wʋ́:«Sɩ́ʋ́n nə, à tʋtʋnʋ Zwakɔbə dwíí-ba, á cʋga!
Á mʋ̀ Yɩzərayɛlə lɩ̀à tə à nə kúrí!
2 Nəŋə kʋ tə à mʋ̀ Ba-Yígúrə́-Jə-Tiu,
Yɩɩ tə à nə fwa aba,
Yɩɩ tə à nə ma aba á nuu pùə́ wa,
Yɩɩ tə à nə yɩ á sáŋʋ́ nə swɩ̀n:
Á dànà ká pa fən ja aba,
à tʋtʋnʋ Zwakɔbə dwíí-ba,
á mʋ̀ Yeswurunəa bɩ̀á tə à nə kúrí.
3 À wá gàrɩ̀ nɩ́á tɩa tə yuu wa, dwakʋrɩ nə jə,
à ga pa nacoŋi pàlɩ̀ tɩkʋrʋ tə yuu wa.
À wá kə à Siŋu tə á dwíí tə yuu wa,
à ga fwa zəni á bɩ̀á yɩra.
4 Ba wá pɛ́n ba nan ndə tɩ̀ʋ́ nə, garan titəŋi wa,
ba ga wá bori ndə nacoŋi nii tɩ̀án nə.
5 Ba lìù don wá swɩ̀n, ʋ wʋ́:
À yɩ Ba-Yígúrə́-Jə-Tiu nə tɩ.
Ʋ don də wá swɩ̀n ʋ wʋ́ ʋ yɩrɩ nə yɩ Zwakɔbə.
Ʋ don də wá pʋ́pʋ́nɩ́ ʋ jɩɩn yuu wa, ʋ wʋ́:
“À yɩ Ba-Yígúrə́-Jə-Tiu nə tɩ!”
Yá ʋ don də wá swɩ̀n də ʋ yɩrɩ nə yɩ Yɩzərayɛlə!
Ba-Yígúrə́-Jə-Tiu cɩcɩ nə yɩ Yɩɩ
6 Nə̀ń kʋ tə Ba-Yígúrə́-Jə-Tiu,
Yɩzərayɛlə lɩ̀à pɩ̀ʋ́ tə ʋ nə yə̀ ba ʋ jon,
Ba-Yígúrə́-Jə-Tiu, ʋ nə yɩ kwatara Yɩɩ, nə swɩ̀n:
«À mʋ̀ nə yɩ təntən,
à mʋ̀ ga nə yɩ talɩkwa də.
Yɩɩ don tə̀lə́ kʋ ma dà à nə.
7 Wàà nə nyən ndə à nə?
Sə kʋ tíú bɩrɩ ʋ tɩ̀àn!
Sə kʋ tíú man ʋ bɩrɩ nə,
yìə̀n tə mama tə nə tʋn tə kɛ̀ń,
kʋ nə zɩgɩ máŋá tə
à nə fwa təntən ləzoni tə!
Sə kʋ tíú ga swɩ̀n yìə̀n tə də,
tə nə wá tʋn zə̀n máŋá ka tə wa,
də yìə̀n tə nə wá tʋn,
máŋá wa ka nə bɩ̀àn!
8 Á dànà ká pa fən ja aba,
á dànà ká vɩvaga.
À wà kʋ swɩ̀n à pa á nì fuən mama naaa?
Á yɩ à dansɩa lɩ̀à:
Yɩɩ don wulə kʋ ma dà à nə naaa?
Pɩ̀ʋ̀ don tə̀lə́,
à yəri pɩ̀ʋ̀ don mama nii nə!»
Lɩ̀à tə nə fwa woŋwanan
9 Lɩ̀à tə mama ba nə fwa woŋwanan yɩ tʋtʋ,
yá ba wozəŋə tə ba funə jə.
Tə yɩ ba dansɩa wiən,
yá tə yɩ́á ba na,
tə ma ba yənu jə.
Kʋ mʋ̀ nə pɩn ba wá də́ cavɩra.
10 Lìù nə sə̀ woŋwanʋ,
nə à yə̀ə́ ʋ nə nyɩan lugu
ʋ ma fwa woŋwanʋ,
kʋ nywarɩ nə yɩ bɛ̀ɛ̀ kʋ pa wá?
11 Kʋ kwa lɩ̀à tə mama wá də́ cavɩra.
Lɩ̀à tətə ba nə sè tə yɩ ləzoni.
Ba mama bɩ̀án duən yáá,
ba bɩrɩ ba tɩ̀àn,
yá fən də cavɩra wá zʋ ba mama.
12 Yarʋ yàá kə lugu məncala wa,
ʋ ma lù dèrí.
Ʋ yàá ja hama ʋ mà lugu tə
də ʋ vàn dɩ̀àn mama.
Yá niən nə jə wá,
ʋ dɩ̀àn yàá zwɛ̀.
Nanyʋnɩ nə jə wá,
ʋ yàá gwàrɩ̀.
13 Lìù tə nə sə̀ dɛ̀ɛ̀ yàá tɩɩn ŋwənə,
ʋ ja pɩra ʋ ma bɩ̀rɩ̀ nyɩnyɩga,
ʋ ja dèrí sə̀rə́ ʋ ma sà kʋ,
ʋ ga ja mɩ̀ʋ́n ʋ ma soli kʋ.
Ʋ yàá fwa kʋ, ʋ pa kʋ nyən də bɛɛ,
ʋ yàá pa kʋ ləzwənə nyɩnyɩga,
sə kʋ ya dìə̀ wa.
14 Ʋ yàá goŋə sɩsaban,
ʋ kúrí nyənbori də sɩsanan,
ʋ nə yá ʋ pa tə bori pún tɩ̀án tə wa,
nə à yə̀ə́ tɩ̀án ʋ tətə nə cwɛn,
dwà ga pa tə bori.
15 Ləzwənə yàá tì tɩ̀án təntə dɛɛ,
ʋ ma kə mən, ʋ ma lɩŋɩ ʋ yɩra.
Ʋ ja tə ʋ kəni mən, ʋ ma fwa wodiu,
ʋ ga ja tə ʋ fwa yɩɩ də,
ʋ twɩ ʋ nadwana yuu kʋ yáá con,
ʋ pɩn kʋ dun.
Ʋ yàá ja tə ʋ fwa woŋwanʋ,
ʋ twɩ kʋ yáá con, ʋ pɩn kʋ dun.
16 Ʋ yàá kə dàʋ̀ tə vàn don mən wa,
yá kʋ mʋ̀ nə wá pa ʋ wànɩ́ ʋ də́ nàŋʋ́ tə
ʋ nə wá wà, ʋ sú.
Ʋ yàá lɩŋɩ ʋ yɩra də, ʋ ga swɩ̀n ʋ wʋ́:
«Aa! À yɩra lɩŋɩ! Mənvwə tə jə fɩra!»
17 Yá ʋ ja dàʋ̀ tə gɩganɩ tə ʋ ma fwa yɩɩ,
kʋ nə yɩ ʋ woŋwanʋ,
ʋ twɩ ʋ nadwana yuu kʋ yáá con,
ʋ pɩn kʋ dun,
ʋ boŋə ʋ kəni kʋ nə, ʋ wʋ́:
«Jon nə! Cɩ́gá, n yɩ à yɩɩ!»
18 Lɩ̀à tə nə tʋŋa kʋ nətʋ tə,
ba yənu jə, ba ma ba pubʋŋa jə.
Ba yɩ́á sun, sə ba dàn ká na,
ba bɩcanɩ ga sun,
sə ba dàn ká yəni yoo də̀ń.
19 Ba lìù mama ba bʋŋa,
ba lìù mama ba yənu,
nə à yə̀ə́ pubʋŋa jə,
sə ʋ swɩ̀n, ʋ wʋ́:
«À ken dàʋ̀ tə faan mən wa,
à ja kʋ məncala à fwa wodiu,
à ga wà nàŋʋ́ tə yuu wa, à də́.
Yá à wá ja dàʋ̀ tə gɩganɩ tə,
à ma fwa wolwan!
À wá tʋ à nadwana yuu dàʋ̀ yáá con,
à pa kʋ dun!»
20 Ʋ yɩ ndə lìù nə,
ʋ nə dɩŋɩ tʋntʋnan kwa.
Ʋ bɩcan gugurə,
kʋ pa kʋ gɩgarɩ wá kʋ dʋga.
Ʋ yɩɩ tə bá jon wá,
yá ʋ bá bwe ʋ tɩ̀àn sə ʋ jə́n:
«Won tə à nə jə à jɩɩn wa, tà gɩgara?»
Yɩzərayɛlə lɩ̀à yɩ Ba-Yígúrə́-Jə-Tiu tʋ̀tʋ̀nà
21 Á lìə́ á tɩ̀àn yoo təntə, Zwakɔbə dwíí-ba,
á lìə́ á tɩ̀àn kʋ nətʋ tə, Yɩzərayɛlə lɩ̀à-ba.
Cɩ́gá, á yɩ à tʋ̀tʋ̀nà.
À fwa aba, sə á tʋn á pa nə.
Yɩzərayɛlə lɩ̀à-ba, à ba swɛ̀ɛ́ á yoo.
22 À púpùgú á yolwana tə à lɩ, ndə bakwan nə,
à ga púpùgú á cʋna tə à lɩ, ndə fun nə.
Á pìrə́ á bà à con.
Cɩ́gá, à yə̀ aba à jon.
23 Lanworu, mà pupwən cə̀rí!
Cɩ́gá, Ba-Yígúrə́-Jə-Tiu tʋn!
Tɩa dəkurən-ba, á maga cə̀rí!
Pɛɛn-ba, á maga pupwən cə̀rí!
Pún-ba, á də á tɩ̀án tə mama jwɩa!
Cɩ́gá, Ba-Yígúrə́-Jə-Tiu yə̀ Zwakɔbə dwíí tə ʋ jon,
yá ʋ bɩrɩ ʋ dun tə Yɩzərayɛlə lɩ̀à nə.
24 Nəŋə kʋ tə Ba-Yígúrə́-Jə-Tiu,
Yɩɩ tə ʋ nə yə̀ aba ʋ jon,
Yɩɩ tə ʋ nə ma aba á nuu pùə́ wa, nə swɩ̀n:
«À mʋ́ Ba-Yígúrə́-Jə-Tiu nə fwa won mama.
À mʋ̀ cɩcɩ nə larɩ lanworu tə,
yá à mʋ̀ nə larɩ tɩa tə à tɩ̀àn nə.
25 À pɩn jwɩan yìə̀n tə kʋ̀nkʋ̀na nə swɩ̀n, ba jì,
à ga pɩn vʋra jì nyɩnyanan.
À pɩn wʋbʋnyɩna twəni ba kəni ba kwa,
à ga pɩn ba yənu tə jì ləyiri.
26 À pɩn à tʋtʋnʋ tə sʋgʋ nii swí,
à ga pɩn à tʋntʋna tə pubʋŋa yìə̀n jì.
À swɩ̀n Zwerizalɛmə yoo, à wʋ́:
“Lɩ̀à wá pìí ba ya kʋ wa!”
À ga swɩ̀n Zwida tɩan tə yoo, à wʋ́:
“Ba wá pìí ba lwà tə,
yá à wá pìí à zɩ̀n tə dibwərən tə!”
27 À pɩn nii naluŋə nə, à wʋ́:
“Á wɩa,
à pɩn nii sə á mʋnɛɛ tə kʋ̀!”
28 À swɩ̀n pɩ̀ʋ́ Sirusə yoo, à wʋ́:
“Ʋ yɩ à payɩrʋ!
Ʋ wá tʋn à fɩra yìə̀n mama, ʋ pa tə nii sú.
Ʋ wá pa ba pìí ba lwà
Zwerizalɛmə tɩʋ tə, də Yɩɩ dìə̀ tə!”»