Ba-Yígúrə́-Jə-Tiu yɩ Yɩzərayɛlə lɩ̀à jonu
43
1 Sɩ́ʋ́n nə, Zwakɔbə dwíí-ba,Yɩzərayɛlə lɩ̀à-ba, á nəŋə kʋ tə
Ba-Yígúrə́-Jə-Tiu, Yɩɩ tə ʋ nə dɩga aba,
Yɩɩ tə ʋ nə fwa aba ʋ kə lʋʋ wa, nə swɩ̀n:
«Á dànà ká pa fən ja aba.
Cɩ́gá, à yə̀ aba à jon.
À bon á yɩrɩ,
á dàń yɩ à mʋ̀ nə tɩ!
2 Á nə bɩn nɩ́á, à wá ya də aba,
yá mʋnɛɛ nɩ́á bá pú á yuu nə.
Á nə zʋa mən wa, tə bá də́ aba,
yá tə mənvoo tə bá fwa aba won mama.
3 Cɩ́gá, à mʋ̀ nə yɩ Ba-Yígúrə́-Jə-Tiu, á tíú Yɩɩ,
Yɩzərayɛlə lɩ̀à Yɩɩ tə, à nə yɩ parɩ*,
à ga yɩ á jonu.
À pɩn Ezwipətə lʋʋ nii tə,
sə kʋ ya á mɩɩ kwənə,
à ga ja Kuswə də Seba lʋʋ níə́ tə,
à ma lárɩ́ á yuu nə.
4 Á jə funə zənzən, á pa nə,
kʋ mʋ̀ nə pɩn, à ba á yoo sɛ̀.
À swə á yáá yoo zənzən,
kʋ mʋ̀ nə pɩn à janɩ ləzoni
à ma lárɩ́ á yuu nə,
à ga pɩn dwíə́ nəkaran* á mɩɩ kwənə yɩrɩ.
5 Á dànà ká pa fən ja aba.
Cɩ́gá, à wulə də aba!
À wá pìí à ja á dwíí tə
à nan yɩɩ yipɩan con à bà,
à ga zɩgɩ yɩɩ yizwɩa con,
á kə aba duən yáá nə.
6 À wá swɩ̀n jɩzən saparʋ con,
à wʋ́: “Pa!”
À ga swɩ̀n jɩgwiə saparʋ con,
à wʋ́: “Dàn ká cɩ̀ ba nə!”
Yágá á pa à bɩ̀á tə nan yiŋʋnɩ ba bà,
á pɩan à bwɩ̀ɩ́ tə nan tɩa nii yígúrə́ wa ba bà.
7 À yɩrɩ tə nə ba ma boŋə lɩ̀à təntə mama.
À mʋ̀ nə ma ba, à mʋ̀ nə dɩga ba,
à mʋ̀ nə fwa ba à kə lʋʋ wa,
sə ba pa nə dun.»
Jonu don tə̀lə́ də kʋ nə tà Ba-Yígúrə́-Jə-Tiu
8 Ba lɩa lalʋʋ tə nə jə yɩ́á, yá tə ba lá na,
də ba tə nə jə zɩan, yá tə ba nə̀ń,
ba kə poni nə.
9 Lʋʋ dwíə́ tə mama bɩ̀àn duən yáá nə,
ləzoni tə mama bɩ̀àn ba kun duən nə!
Ba wàà nə wàá tə yìə̀n tə ʋ swɩ̀n, ʋ bɩrɩ?
Ba wàà nə wàá dí yáá yìə̀n ʋ maŋa,
ʋ bɩrɩ nəba?
Kʋ tɩ̀án nə wulə,
sə ba bɩrɩ ba dansɩa lɩ̀à,
ba ma swɩ̀n ba jon ba tɩ̀àn!
Dansɩa lɩ̀à tə wá cʋgʋ ba,
yá ba wá wànɩ́ ba swɩ̀n,
də kʋ nə yɩ cɩ́gá!
10 Á mʋ̀ nə yɩ à dansɩa lɩ̀à,
á mʋ́, à tʋ̀tʋ̀nà tə à nə kúrí,
sə á yəni, á ga kə á waa à nə,
yá á lwarɩ də,
à mʋ̀ nə yɩ Ba-Yígúrə́-Jə-Tiu.
Yɩɩ don mama wà à yáá dí, ʋ ya lá,
Yɩɩ don də ma ba ya lá, à kwa nə.
À mʋ̀ Ba-Yígúrə́-Jə-Tiu nii sʋgʋ nə!
11 Kʋ yɩ à mʋ̀,
à mʋ̀ cɩcɩ nə yɩ Ba-Yígúrə́-Jə-Tiu!
Jonu don tə̀lə́, kʋ ma dà à nə.
12 À mʋ̀ nə swɩ̀n à bɩrɩ,
à mʋ̀ nə yɩ jonu,
à mʋ̀ nə bòrì à bɩrɩ,
kʋ tà yɩɩ nəkaʋ nə wulə á titəŋi wa.
Kʋ mʋ̀ yɩrɩ, á yɩ à dansɩa lɩ̀à,
də à mʋ̀ nə yɩ Yɩɩ.
Ba-Yígúrə́-Jə-Tiu nii sʋgʋ nə!
13 À yɩ Yɩɩ máŋá mama wuuu,
yá lìù tə̀lə́, ʋ nə wàá lìù ʋ joŋə à jɩɩn wa.
Wàà nə wàá kʋ tə à nə tʋŋa yáá nə ʋ cɩ̀?
Ba-Yígúrə́-Jə-Tiu tʋn jonu
14 Nə̀ń kʋ tə Ba-Yígúrə́-Jə-Tiu,
Yɩɩ tə nə yə̀ aba ʋ jon,
Yɩzərayɛlə lɩ̀à Yɩɩ tə nə yɩ parɩ* nə swɩ̀n:
«Á mʋ̀ yɩrɩ nə à sugu lìù
à kə Babɩlɔnə tɩ̀án nə.
À wá pa ba mʋ̀ lɩ̀à təntə mama,
ba nə dəri sə ba jɛ́n,
ba mʋ̀ Kaləde tɩ̀án tə,
ba yà nə zwɩ nɩ́á yuu bwərə wa,
ba ga mà pupwən cə̀rí, cú nɩ́á də̀ń.
15 À mʋ̀ nə yɩ Ba-Yígúrə́-Jə-Tiu,
á tíú Yɩɩ tə à nə yɩ parɩ,
à mʋ̀ nə fwa á mʋ̀ Yɩzərayɛlə lɩ̀à,
à kə lʋʋ wa, à yɩ á pɩ̀ʋ́.»
Cwəŋə nədʋn kasɔɔ lanworu wa
16 Nə̀ń kʋ tə Ba-Yígúrə́-Jə-Tiu nə swɩ̀n,
ʋ mʋ̀ Yɩɩ tə ʋ nə tún cwəŋə mʋʋ wa,
ʋ mʋ̀ Yɩɩ tə ʋ nə tún cwəŋə
nakulə tə nə jə dɩ̀àn titəŋi wa.
17 Ʋ mʋ̀ nə pɩn səsen, də səsen kòrə̀n,
də kwatara púlí, də kwatara babɩran,
twá duən ba naŋa ba tɛ kʋ̀ʋ̀.
Ba tʋa, yá ba kʋ̀ʋ́ ba pìí ba zàn,
ba dí ba də̀ŋə̀, ndə caŋwənə nə.
18 Ʋ swɩ̀n, ʋ wʋ́:
«Á dànà ká lìí dí yáá yìə̀n,
á dànà ká jələ yodwara.
19 Nə̀ń à wulə à tʋŋa yodʋn,
yá kʋ manwarɩ kʋ wulə kʋ pɛ́n.
Á yəri kʋ naaa?
À wá tún cwəŋə kasɔɔ lanworu wa,
à ga pa mʋnɛɛ pàlɩ̀ tɩkʋrʋ wa.
20 Ganaŋa wá pa nə dun,
cirəkuri də tɛɛtɛɛ wá bʋ à nə.
Cɩ́gá, à wá kə nɩ́á kasɔɔ lanworu wa,
à ga pa mʋnɛɛ pàlɩ̀ tɩkʋrʋ wa,
à pa à lalʋʋ tə à nə kúrí nyʋn.
21 Yá lalʋʋ tə à nə fwa à pa à tɩ̀àn nə,
dàń wá bʋ à nə.»
Bʋra, Yɩɩ də ʋ lɩ̀à tə pwə́rə́ wa
22 Ba-Yígúrə́-Jə-Tiu swɩ̀n, ʋ wʋ́:
«Kʋ tà à mʋ̀ nə nə á bon á kə,
Zwakɔbə dwíí-ba!
Á waa nan nə, Yɩzərayɛlə lɩ̀à-ba!
23 Kʋ tà à mʋ̀ nə nə
á fwa á pəbii jwəŋə tə ba nə sʋ̀rɩ́* á pɩn.
Á jwəŋə tə yà tà á fwa á ma pɩn nə dun.
À wà aba kálɩ́ sə á pa nə zìlə́ wiən*,
à ma wà aba wʋwalɩ
sə á sʋ̀rɩ́ wusinə á pa nə.
24 Á wà cɩnba dabii yə̀ də səbiu, á pa nə,
á ma wà pɩn à də́ á jwəŋə vàná nwɩɩ tə à sú.
Yá á wʋwalɩ nə də á cʋna tə,
á pɩn à yɩra ga də á yolwana tə.
25 Kʋ yɩ à mʋ̀,
à mʋ̀ cɩcɩ nə kúrí à tìà tɩ̀àn nə,
sə à púpùgú á cʋna tə à lɩ,
yá à kʋ̀ʋ́ ba pìí à lìí á lwanɩ tə yoo.
26 Á lìə́ nə yoo tə, á nə zɩga à nə kʋ yɩrɩ,
sə nə mɛ ja kʋ yoo tə nə zʋ bʋra wa.
Á tətə swɩan, á bɩrɩ də á jə cɩ́gá.
27 Á təntən nɩbɛɛ tə tʋn cʋna,
yá lɩ̀à tə nə joŋə á nii sʋ̀ràn ba swɩ̀n,
zàn ba zɩgɩ à nə.
28 Kʋ mʋ̀ nə pɩn
à jələ à wúlú bwálɩ́ yáá tɩ̀án tə,
ndə durən lɩ̀à nə.
À yá Zwakɔbə dwíí tə,
sə ba dʋŋa cʋ̀gʋ̀ ba mɩ́ámɩ́án*,
à ga yá à pa ba fʋfʋlɩ Yɩzərayɛlə lɩ̀à tə.»