Yɩzərayɛlə lɩ̀à mɛ sə ba jələ Ba-Yígúrə́-Jə-Tiu yuu wa
41
1 Mʋʋ titəŋi wa lʋʋ níə́-ba,á pwíə́ á nii, á ga cʋgʋ
à mʋ̀ Ba-Yígúrə́-Jə-Tiu con!
Lʋʋ dwíə́ tə pɩan ba jɩ̀àn dàn,
ba ga fwarɩ ba yí lá, ba swɩ̀n!
Nə jərə duən, nə bʋ̀rɩ̀ bʋra.
2 Wàà nə pɩn lìù tə,
cɩ́gá cwəŋə nə pɩn
ʋ vəli ka nabwɩɩ wa,
nan yɩɩ yipɩan con?
Wàà nə ken lʋʋ dwíə́ ʋ jɩɩn wa,
yá ʋ pa pɛ̀gá sɛ̀ ʋ nii?
Ʋ kwatara sɩ̀ʋ́ pɩn ba jì pùrú,
yá ʋ twan laga ba duən yáá nə,
ndə gaʋ nə, vʋʋ nə jànɩ̀.
3 Ʋ dɩŋɩ ba kwa, ʋ twá ba wa,
ʋ kɛ̀ń də yazurə,
yá ʋ nɛɛ ba tɩa dwen.
4 Wàà nə tʋn yìə̀n təntə, ʋ pa tə nii sú?
Kʋ yɩ lìù tə nə pɩn ləzoni suruduən twi,
ba lwànɩ́ duən yuu nə lʋʋ wa,
máŋá də máŋá mama wuuu,
kʋ sinti lʋʋ də̀ń laŋʋ mama.
À mʋ̀ Ba-Yígúrə́-Jə-Tiu nə yɩ təntən,
à mʋ̀ ga nə wá ya də talɩkwa lɩ̀à də.
5 Mʋʋ titəŋi wa lʋʋ níə́ lɩ̀à tə nɩ kʋ nətʋ tə,
fən ga zʋ ba.
Tɩa nii yígúrə́ lɩ̀à tə bɩ̀àn,
yá ba vɩvaga.
6 Ba saŋa duən nə,
yá ba lìù mama swɩ̀n ʋ don con,
ʋ wʋ́: «Ja wʋdɩʋ!»
7 Dasəru daŋa cɩnayarʋ jɩɩn,
lìù tə nə soli lugu yɩra də hama,
daŋa lìù tə jɩɩn, ʋ nə lwì líí wa.
Ʋ swɩ̀n won tə yoo,
ʋ nə nyɩan ʋ marɩ duən nə,
ʋ wʋ́: «kʋ ziən!»
Yá ʋ dàń yàá ja cɩan,
ʋ ma pa woŋwanʋ tə, ʋ zɩgɩ,
kʋ dàn ká vuvugu.
Dànà ká pa fən ja aba
8 Yá á mʋ̀ Yɩzərayɛlə lɩ̀à yɩ
à tʋtʋnʋ Zwakɔbə dwíí, à nə kúrí,
á yɩ à dabɛɛ Abərahamə nɩ̀án!
9 Á mʋ̀ lɩ̀à tə, à nə ja nan tɩa nii yígúrə́ wa,
á mʋ̀ lɩ̀à tə, à nə bon à lɩ lʋʋ níə́ wa, tə nə ŋʋ́ná,
á mʋ̀ lɩ̀à tə, à nə swɩ̀n á con, à wʋ́:
«Á yɩ à tʋ̀tʋ̀nà,
à kúrí aba,
yá à ba vɩ aba à dʋgʋ!»
10 Á dànà ká pa fən ja aba sɩ́ʋ́n nə.
Cɩ́gá, à wulə də aba!
Dànà ká pa twara ja aba.
Cɩ́gá, à yɩ á tíú Yɩɩ!
À daŋa á jɩɩn,
à bɩ̀àn sə à jon aba,
à jɩzən vàn tə wá san aba,
kʋ twá cɩ́gá cwəŋə nə.
11 Nəŋə, cavɩra də fʋfʋlʋ wá yí lɩ̀à tə mama,
ba lɩŋa nə zaŋa á yuu wa.
Lɩ̀à tə nə dɩ jara də aba, wá jì tʋtʋ,
ba wá jɛ́n mɩ́ámɩ́án.
12 Á wá twarɩ ba, yá á bá na ba,
ba mʋ̀ lɩ̀à tə, ba yà nə dɩ jara də aba.
Ba wá yàlà, ba jì tʋtʋ,
ba mʋ̀ lɩ̀à tə, ba yà nə tɛ aba.
13 Cɩ́gá, à mʋ̀ Ba-Yígúrə́-Jə-Tiu yɩ à tíú Yɩɩ,
à jə á jɩzən nə,
à ga swɩ̀n á con, à wʋ́:
«Á dànà ká pa fən ja aba,
à bɩ̀àn sə à san aba!»
14 Dànà ká pa fən ja aba,
Zwakɔbə dwíí-ba, á nə yɩ ndə zʋnzʋgʋ nə,
Yɩzərayɛlə lɩ̀à-ba,
á nə yɩ ndə zʋnzʋgʋ càlɩ̀ nə.
À bɩ̀àn sə à san aba!
À mʋ̀ Ba-Yígúrə́-Jə-Tiu,
á jonu tə ʋ nə yə̀ aba ʋ jon,
Yɩzərayɛlə lɩ̀à Yɩɩ tə nə yɩ parɩ*, nii sʋgʋ nə!
15 À pɩn á jì ndə dapɩpaʋ nədʋn nə,
ba nə ma lwaga mɩna,
ba nə deri kʋ yelə.
Á wá tɩtaga pɛɛn,
á ga nyʋnyʋgʋ dədwələn,
á pa tə jì ndə gapulə nə.
16 Á wá cə̀rì tə,
yá vʋʋ wá jàn tə,
kùlì ga laga tə duən yáá nə.
Yá á mʋ̀ wá jwɛ Ba-Yígúrə́-Jə-Tiu yɩrɩ,
á ga fwa pupwən
Yɩzərayɛlə lɩ̀à Yɩɩ tə yɩrɩ, ʋ nə yɩ parɩ.
17 Zʋra də yinənyɩna pɩ̀à nɩ́á
ba gɛ, sə ba nyʋn.
Nanyʋnɩ pɩn ba nəndəli kʋ̀.
Yá à mʋ̀ Ba-Yígúrə́-Jə-Tiu wá le ba,
à mʋ̀ Yɩzərayɛlə lɩ̀à Yɩɩ tə
bá vɩ ba, à dʋgʋ.
18 À wá pa mʋnɛɛ pwin tə nan pɛɛn yuparɩ wa,
à ga pa nabuliyɩa pwin tə nan varnɛɛ titəŋi wa.
À wá lwàń kasɔɔ lanworu tə, à pa kʋ jì buu,
à ga lwàń digə tɩa, à pa ka jì bwálɩ́,
nɩ́á nə bùlì tə naŋa tɩa.
19 À wá cwɛn sɩsaban, də sɩnjʋna, də kawalʋ,
də olivə tɩ̀án, kasɔɔ lanworu tə wa.
À wá kə nyənbori, də lən, də zɩnɛɛ,
digə tə wa, à pa tə mama ya duən nə,
20 sə lɩ̀à mama na, ba ga yəni,
sə ba balɩ, ba ga lwarɩ,
də kʋ yɩ Ba-Yígúrə́-Jə-Tiu jɩɩn
nə tʋn yìə̀n təntə mama,
də kʋ yɩ Yɩzərayɛlə lɩ̀à Yɩɩ tə
nə yɩ parɩ nə fwa tə.
Ba jɩn kʋ̀nkʋ̀n yɩa tə də̀ń nə
21 Ba-Yígúrə́-Jə-Tiu swɩ̀n, ʋ wʋ́:
«Á mʋ́ dwíə́ nəkaran* yɩa tə,
á bɩ̀án á swɩ̀n á jon á tɩ̀àn!»
Zwakɔbə pɩ̀ʋ́ tə swɩ̀n, ʋ wʋ́:
«Á bɩra won tə nə bɩrɩ də, á jə cɩ́gá!»
22 Tə bɩra kʋ,
tə ga swɩ̀n tə bɩrɩ nəba,
yoo tə nə mɛ sə kʋ tʋn.
Á maŋa dí yáá yìə̀n nə yɩn nətʋ,
á bɩra nəba,
yá nə wá bʋ́n zəni,
nə ma lwarɩ yìə̀n tə nə bɩ̀àn.
Nə à yə̀ə́ á maŋa jwɩan yìə̀n, á bɩrɩ nəba.
23 Á swɩan yìə̀n tə nə wá tʋn,
máŋá wa, ka nə bɩ̀àn, á bɩrɩ nəba,
yá nə wá sɛ̀ də á cɩ́gá yɩ yɩa.
Á dàń ya tʋŋa yozəŋu,
nə à yə̀ə́ yolwan cɩcɩ,
sə nə súrí nə yɩ́á, nə mama na kʋ.
24 Á tà won mama,
yá á tʋ̀tʋ̀nán tə ba funə mama jə.
Lìù nə tə ja aba ʋ fwa ʋ yɩa, tʋŋa yobalwarʋ.
25 À pɩn bɛɛ nan jɩzən saparʋ con, ʋ bà.
Ʋ sinti yɩɩ yɩpɩan con,
ʋ boŋə ʋ kəni à yɩrɩ tə nə.
Ʋ nɩŋɩ yáá tɩ̀án tə, ndə tɩtɛɛ nə,
ʋ nɩŋɩ ba, ndə daʋ nə, nəkənmarʋ nə nɩŋɩ.
26 Wàà nə dí yáá, ʋ swɩ̀n kʋ ʋ bɩrɩ,
kʋ də̀ń laŋʋ mama,
sə ʋ pa nə lwarɩ kʋ?
Wàà nə dí yáá, ʋ swɩ̀n kʋ ʋ bɩrɩ,
máŋá wa, ka nə ba yigə,
sə nə ma swɩ̀n nə wʋ́: «Kʋ yɩ cɩ́gá»?
Lìù mama wà dí yáá, ʋ swɩ̀n kʋ,
lìù mama wà dí yáá, ʋ pa nə nì kʋ,
yá lìù mama wà dí yáá, ʋ nì á sʋ̀ràn.
27 À mʋ̀ Ba-Yígúrə́-Jə-Tiu nə yɩn təntən
à swɩ̀n Siyon tɩ̀án con, à wʋ́:
«Nə̀ń ba nə!»
À tʋn tʋntʋnʋ, sə ʋ ja sʋywáŋʋ́
ʋ va ʋ swɩ̀n Zwerizalɛmə wa.
28 À ywàń, yá à wà lìù mama nɩ.
Lìù tə̀lə́ ba wa, ʋ nə wàá kwìə̀ ʋ pɩn,
lìù tə̀lə́ à nə wá bwe,
yá lìù tə̀lə́ ʋ nə wá le nə!
29 Nə̀ń ba nə, ba mama yɩ tʋtʋ,
ba tʋ̀tʋ̀nán tə ba funə mama jə,
ba woŋwanan tə yɩ vʋʋ də woru.