BƏLƏ NII BWALƖ
YƖƖ DAŊA YƖZƏRAYƐLƏ LƖA JƖƖN
(40—55)
Yɩɩ pɩn nii sə ba dàn ʋ lɩ̀à tə jɩɩn
40
1 Á kwə̀rə̀, á kwə̀rə̀ à lɩ̀à tə,á tíú Yɩɩ nə swɩ̀n nətʋ.
2 Á swɩan Zwerizalɛmə tɩ̀án bɩcan wa,
á bwərə á swɩ̀n ba con,
də ba tʋtʋncaran tə yí tə yígúrə́,
də ba ŋwɩ́n ba yolwan jɩŋɩ ba zwɛ̀,
də Ba-Yígúrə́-Jə-Tiu ken càn ba nə
nɛɛ bələ ba cʋna tə mama yɩrɩ.»
3 Lìù bòrì kasɔɔ lanworu wa, ʋ wʋ́:
«Á cɛŋa Ba-Yígúrə́-Jə-Tiu cwəŋə tə,
á kwɩan cwəŋə digə tə wa,
á pa nə tíú Yɩɩ nə.
4 Buu gwàlʋ́ mama wá sùń,
paan mama, də dədolu mama ga gwɛrɩ,
tə cú tə ja tɩa!
Pɛɛn tɩa wá lwàń ka jì digə,
pɩ̀ràn tɩa ga lwàń ka jì tɩtalʋ!
5 Ba-Yígúrə́-Jə-Tiu dàń wá bɩrɩ ʋ dun tə,
yá lɩ̀à mama wá na tə,
ba ga wá lwarɩ də,
Ba-Yígúrə́-Jə-Tiu cɩ́gá nə swɩ̀n kʋ!»
6 Lìù wá swɩ̀n, ʋ wʋ́: «Bòrì!»
Lìù don ga swɩ̀n, ʋ wʋ́:
«À wá bòrì à swɩ̀n à wʋ́ bɛ̀ɛ̀?»
Təntən lìù tə pìí ʋ le, ʋ wʋ́:
«Ləzwənə mama yɩ ndə gaʋ nə,
yá ʋ dun tə mama yɩ ndə gapuni nə.
7 Gaʋ yàá kʋ̀, yá kʋ pùní tə pɩ̀nɩ̀,
máŋá tə wa Ba-Yígúrə́-Jə-Tiu siŋu tə
nə twá kʋ yuu con kʋ kɛ̀ń.
Cɩ́gá mama, ləzoni yɩ ndə gaʋ nə.
8 Gaʋ yàá kʋ̀, kʋ pùní tə pɩ̀nɩ̀,
yá nə tíú Yɩɩ sʋgʋ tə mʋ̀ wulə
máŋá mama wuuu.»
Sʋywáŋʋ́ tə, ba nə mɛ sə ba bòrì ba bɩrɩ
9 Á dɩa paan nədarʋ yuu,
Siyon tɩ̀án-ba, á mʋ̀ lɩ̀à tə,
á nə jə sʋywáŋʋ́, sə á bòrì á bɩrɩ!
Á baga á kə yɩɩ nə də dɩ̀àn,
Zwerizalɛmə tɩ̀án-ba, á mʋ̀ lɩ̀à tə,
á nə jə sʋywáŋʋ́, sə á bòrì á bɩrɩ!
Á zɩan á kori yɩɩ nə,
á dànà ká pa fən ja aba.
Á swɩan Zwida tɩ̀án tə wa, á wʋ́:
«Nəŋə á tíú Yɩɩ tə nə!
10 Yuu-Tiu Ba-Yígúrə́-Jə-Tiu nə,
ʋ bɩ̀àn də dɩ̀àn,
yá ʋ vàn dɩ̀àn pɩn ʋ də́ pàrɩ̀.
Ʋ jə ʋ ŋwɩ́rán ʋ con,
tə dí ʋ yáá tə bɩ̀àn.
11 Ʋ wá yɩ̀rɩ̀ ʋ vàná, ndə payɩrʋ nə,
ʋ wá ja ʋ vàn ʋ ma kə pəbii tə duən yáá nə,
ʋ tì ʋ kə ʋ nyʋnɩ nə,
yá pee tə, tə bɩ̀á nə ŋʋ̀à,
ʋ wá ywàń tə yuu zəni.»
Ba-Yígúrə́-Jə-Tiu ba kamandon jə
12 Wàà nə man mʋʋ nɩ́á tə ʋ jɩbwa wa,
ʋ ga jələ lanworu tə wanɩ də ʋ jɩvaŋɩ?
Wàà nə man tɩa pùrú tə mama də canbo,
ʋ ga kəri pɛɛn tə də dədwələn tə səkəri yuu wa?
13 Wàà nə tún Ba-Yígúrə́-Jə-Tiu Siŋu* tə nii máŋá?
Wàà nə yɩ ʋ kwenu, ʋ pɩn wá kwìə̀?
14 Wàà nə Ba-Yígúrə́-Jə-Tiu bwe,
sə ʋ ma lwarɩ yoo də̀ń zəni?
Wàà nə bɩrɩ wá ka twá cɩ́gá nə,
ndə kʋ nə mɛ nətʋ?
Wàà nə kàrɩ̀ wá yənu,
ʋ ga bɩrɩ wá pubʋŋa cwəŋə?
15 Lʋʋ dwíə́ tə yɩ ndə canbo nɩ́á nə toli,
yá tə funə yɩ ndə pùrú nə, səkəri yuu wa.
Mʋʋ titəŋi lʋʋ níə́ tə yɩ ndə pùrú bʋ́á nə, vʋʋ nə jànɩ̀.
16 Liban pún tə mama wà yí,
sə ba ma sʋ̀rɩ́ joŋi mən,
yá kʋ ganaŋa tə də mama wà yí,
sə ba ma fwa joŋi ba nə sʋ̀rɩ́*.
17 Lʋʋ dwíə́ tə mama yɩ tʋtʋ, ʋ yáá con,
tə yɩ ndə vʋʋ nə, tə ba funə mama jə tə pa wá.
Yɩɩ ba kamandon jə
18 Wàà nə á wá tì á ma man də Yɩɩ?
Bɛ̀ɛ̀ nyɩnyɩga nə á wá ma man də wá?
19 Lìù tə nə nyɩŋa wiən nə fwa woŋwanʋ,
yá cɩnayarʋ ja sɩ́án ʋ piri kʋ,
ʋ ga nyɩan wárʋ́ banzala nəmɩnɩ, ʋ ma nàn kʋ.
20 Lìù nə yɩ zʋrʋ zənzən,
kʋ pa ʋ wàrɩ̀ wárʋ́ də sɩ́án nə ʋ yí,
ʋ yàá kúrí dɔ̀ɔ̀, kʋ nə ba də́,
ʋ pɩ̀à dasəru, ʋ pa ʋ sà woŋwanʋ,
ʋ zɩgɩ zəni, kʋ dàn ká vuvugu.
21 Á yəri kʋ naaa?
Á wà kʋ nì naaa?
Ba wà kʋ á con swɩ̀n kʋ də̀ń laŋʋ mama naaa?
Á wà lwàrɩ̀ nətʋ tə Yɩɩ nə lan lʋʋ dəkuu naaa?
22 Yɩɩ nə də́ pàrɩ̀ tɩa tə kəkəlu tə mama yuu wa,
ka yuu ləzoni tə nə yɩ ndə jə̀rə̀n nə.
Ʋ larɩ lanworu tə ndə gantwan kɩkala nə,
ʋ tɩn kʋ ndə gansili nə,
sə ʋ ma fwa ʋ wúlú bwálɩ́.
23 Ʋ mʋ̀ nə pɩn tɩa yuu pàbɩ̀á jì tʋtʋ,
ʋ ga pɩn lɩ̀à tə nə bʋ̀rɩ̀ bʋra tɩa yuu wa, ba funə jə.
24 Də ba tə wà ba cwɛn tətə,
də ba tə wà ba dwì tətə,
də ba dəkuu ŋʋnʋ tə wà tɩa zwɩ tətə,
ʋ fwi vʋʋ ʋ kə ba nə, yá ba kʋa,
kùlì ga jàn ba, ndə wosanan nə.
25 Yɩɩ tə nə yɩ parɩ* bwe, ʋ wʋ́:
«Wàà nə á wàá, á ma maŋa də nə,
də à də kʋ tíú nyən duən?»
26 Á zɩan á yɩ́á yɩɩ nə, á ywàń!
Wàà nə fwa lanworu tə wa wiən tə,
ʋ pɩn tə naŋa tə cé, ndə kwatara púlí nə?
Ʋ boŋə kʋ nədʋ mama də kʋ yɩrɩ,
kʋ twá də ʋ wanʋ nəfarʋ tə, də ʋ dɩ̀àn nəfarʋ tə.
Won mama wà tə nii nə mùrì.
Lɩ̀à tə nə gwàrɩ̀ dɩ̀àn pìí tə súrí
27 Zwakɔbə dwíí-ba, bɛ̀ɛ̀ nə pɩn á ma swɩ̀n,
Yɩzərayɛlə lɩ̀à-ba, bɛ̀ɛ̀ nə pɩn á ma swɩ̀n
də á bwɛ́, á wʋ́:
«Nə jwɩan yoo tə səgə Ba-Yígúrə́-Jə-Tiu yáá con,
nə tíú Yɩɩ ba yoo tə na, kʋ nə mɛ də nəba»?
28 Á yəri kʋ naaa?
Á wà kʋ nì naaa?
Kʋ yɩ Ba-Yígúrə́-Jə-Tiu,
Yɩɩ tə ʋ nə wulə máŋá mama wuuu,
ʋ mʋ̀ nə fwa lʋʋ sapara banɩa tə.
Ʋ yɩra ba gɛ, ʋ ma ba gwàrɩ̀,
ʋ wʋbʋŋa tə máŋá wàrɩ̀ kʋ maŋa.
29 Ʋ pɩn dɩ̀àn lìù tə nə, ʋ nə gwàrɩ̀,
ʋ ga súrí lìù tə dɩ̀àn, ʋ yɩra nə ga.
30 Balandʋra yɩra gɛ, ba gwàrɩ̀,
ləzwəndʋn mà ba nɛɛ, ba twɩ.
31 Yá lɩ̀à tə nə jələ Ba-Yígúrə́-Jə-Tiu yuu wa dɩ̀àn pìí tə bwin.
Ba nyɩ́n ba zaŋa ndə zənpurən nə,
ba dəri, ba ga ba gwàrɩ̀,
ba vəli, ba yɩra ga ba gɛ.