8
1 Aaa! N yà nə yɩ à nabʋa,n yà nə ŋʋ̀à à nuu nyɩlɩ nə!
À yà wá jəri mʋ́ kàrá con,
à kʋkwalɩ mʋ́,
yá lɩ̀à bá fʋfʋlɩ nə.
2 À yà wá van mʋ́,
à ja zʋ à nuu dìə̀ wa,
à pa n kàrɩ̀ nə,
yá à wá pa n nyʋn divɛn,
kʋ lwán nə ywán,
də à gərenadə tɩ̀án bɩ̀á nɩ́á.
3 Ʋ jɩgwiə kwé à yuu nə,
ʋ jɩzən ga kaŋa nə, kʋ marɩ ʋ yɩra!
4 À lòrì aba pwəpwə, Zwerizalɛmə bwɩ̀ɩ́-ba,
á dànà ká zɩ̀n, á dànà ká zɩ̀n sonu,
də kʋ máŋá wà yí.
Sonu dɩ̀àn
Bwɩ̀ɩ́ tə
5 Wàà nə yɩ kan wà tə,
ʋ nə saa ʋ sonu yɩra,
ʋ ja naŋa kasɔɔ lanworu con, ʋ bɩ̀àn?
Bwalʋkan tə
À zɩ̀n mʋ́, pɔmə tɩ̀ʋ́ tə də̀ń nə,
bwálɩ́ tə nə, n nuu nə jɩn n pùə́,
bwálɩ́ tə nə, ʋ nə lɩrɩ mʋ́.
6 Tún nə ndə jɩtuŋu nə, n bɩcan yuu,
ndə jɩtuŋu nə, n vàn nə.
Cɩ́gá, sonu jə dɩ̀àn ndə tɩan nə,
sonu jalɩʋ jə dɩ̀àn ndə ciru nə.
kʋ lɩŋa, kʋ ga də́ ndə mən nə,
ndə Ba-Yígúrə́-Jə-Tiu mənvwə nə.
7 Nɩ́á kapʋpʋ wàrɩ̀ sonu tə dəŋi,
yá mʋnɛɛ wàrɩ̀ kʋ tə jànɩ̀.
Bɛɛ nə pɩn ʋ dìə̀ jɩjə mama sonu də̀ń nə,
ʋ wá fʋfʋlɩ ʋ tɩ̀àn.
Nubɩa tə
8 Nə jə nakʋa nəmənbiə,
ʋ tə nə ba yɩla jə.
Bɛ̀ɛ̀ nə nə wá fwa nə pa nə nakʋa tə nə,
dɩɩn tə nə, bɛɛ nə wá pɩ̀à wá sə ʋ swe?
9 Ʋ nə yɩ biritaŋʋ,
nə wá ja wárʋ́
nə ma lwà kiru, ʋ yuu con.
Ʋ nə yɩ mimii,
nə wá ja sɩsaban dapɩpɔɔ,
nə ma sun kʋ.
Bwalʋkan tə
10 À yɩ biritaŋʋ,
yá à yɩla tə yɩ ndə dəyuu dìì nə.
Ʋ mʋ̀ yáá con, à yɩ kan tə à nə pɩn bɩcan sìə́.
Bwalʋbɛɛ tə
11 Salʋmʋn yà jə divɛn tɩ̀án kárá,
Balə-Hamon nə.
Ʋ tì lɩ̀à ʋ kə kárá tə wa,
sə ba ywàń ka yuu.
Səbilurən mʋ̀rʋ̀ nə lìù mama yàá ŋwɩ́n,
sə ʋ ga pʋ̀rɩ́ divɛn tɩ̀án tə lənə.
12 À mʋ̀ divɛn tɩ̀án kárá tə wulə à yáá con.
Səbilurən mʋ̀rʋ̀ tə yɩ n mʋ̀ Salʋmʋn nə tɩ,
yá səbilurən biələ yɩ lɩ̀à tə
nə ywàŋá ka lənə tə yuu nyiən!
13 N mʋ́ lìù tə nə wulə tɩ̀án kárɩ́ wa,
twaduən cʋga n con:
Pa sə à nì n kori!
14 Dəri, à sonu!
Ya ndə felə nə,
nə à yə̀ə́ ndə naŋa bìú nə,
pɛɛn tə yuu wa,
vʋran tə lwán nə ywán nə wulə lá!