Kana də bwɩ̀ɩ́
7
1 Pìí bà, pìí bà, Sulamitəa!Pìí bà, pìí bà, sə nə ywàń mʋ́!
Bɛ̀ɛ̀ nə pɩn á ywàŋá Sulamitə tə,
ndə lìù nə, ʋ nə sɛ púlə́ bələ pwə́rə́ wa?
Bwalʋbɛɛ tə
2 N nɛɛ ziən n natɩra wa tamʋ, pabʋa!
N cicerə yɩ kukuli ndə zanan nə,
jɩɩn tʋtʋŋɩ yənu tíú nə fwa!
3 N wuri yɩ ndə wùrú zʋŋa kəkəlu nə,
divɛn kʋ lwán nə ywán nə ba ka wa kwɛ̀.
N pùə́ yɩ ndə mɩna púlí nə,
ba nə tún gapunə ba ma kɩkarɩ tə.
4 N yɩla bələ tə yɩ ndə bʋbii bələ nə,
tə yɩ ndə felə bɩ̀á yɩywɛɛ bələ nə.
5 N bɩan yɩ ndə dəyuu dìə̀ nədarʋ nə,
ba nə nàn də won,
kʋ nə yɩ ndə tuu yelə yɩra nə.
N yɩ́á yɩ ndə Ɛswəbon nɩ́á càrán nə,
Batə-Rabimə tɩʋ tə mimii nə.
N mɩɩ səswələ ndə Liban dəyuu dìə̀ nədarʋ nə,
ka nə zɩga Damasə tɩʋ tə yáá con.
6 N yuu zɩga n pàrà wa, ndə Karəmɛlə paan tə nə,
yá n yukʋran tə pɩnʋ tə yɩ ndə pɛ̀gá ganmʋlɩ nə.
Tə pípínə́n tə wàá pɩ̀ʋ́ tə vwe!
7 N yɩ kabwaŋʋ tamʋ, n jə fɩra tamʋ,
à sonu, à fɩra kan!
8 N mɩna ndə təməru tɩ̀ʋ́ nə,
yá n yɩla yɩ ndə təməru bɩ̀á ziu nə.
9 À swɩ̀n, à wʋ́:
«À wá dɩ̀ təməru tɩ̀ʋ́ tə,
à zi kʋ bɩ̀á tə!»
N yɩla tə ya ndə divɛn tɩ̀án bɩ̀á ziu nə,
sə n siŋu tə lwán tə ga ya ndə pɔmə bɩ̀á lwán nə!
10 N nii tə ya ywánɩ́ ndə divɛn nə...!
Bwalʋkan tə
Kʋ pàlɩ̀ zəni, kʋ pɩn à sonu tə nə,
kʋ ga lè dʋndwana nipənən yuu.
11 À yɩ à sonu tə nə tɩ,
yá à fɩra jə wá zənzən.
Sonu ywánɩ́
Bwalʋkan tə
12 Bà, à sonu, nə naŋa
nə va kasɔɔ con,
nə jʋ lele tɩ̀ánb tə wa!
13 Jɩjʋ fuən fuən, nə wá va divɛn tɩ̀án kárɩ́ tə wa,
nə jə́n də divɛn tɩ̀án tə nə twè,
nə jə́n də tə pùnə́ tə nə súrí,
də gərenadə tɩ̀án tə nə pùnì.
Mə lá nə, à wá kʋkwalɩ mʋ́.
14 Sonu bwalʋ bɩ̀á lwán sùrì.
Tɩ̀án lənə yiri mama, tə nə ywán,
wulə nə mimien nə,
tə nədʋra də tə nədwara.
À sonu, n mʋ́ nə nə à tún tə.