Bwɩ̀ɩ́ tə
6
1 N sonu tə yɩ ʋ vəli yə̀n?Swɩ̀n n bɩrɩ nəba,
n mʋ̀ kana wa kabwaŋʋ!
Yə̀n nə n sonu tə twá ʋ vìí,
sə nə san mʋ́ nə twarɩ wá?
Bwalʋkan tə
2 À sonu cúə́ ʋ tɩ̀án kárá wa,
bwálɩ́ nə, vʋran tə lwán nə ywán nə súə́ lá,
sə ʋ jírí tɩ̀án kárɩ́ tə wa,
ʋ ga pʋ̀rɩ́ gapunə.
3 À yɩ à sonu tə nə tɩ,
yá à sonu tə yɩ à də nə tɩ.
Ʋ wulə ʋ jírí gapunə titəŋi wa.
Bwalʋkan nyɩnyɩga
Bwalʋbɛɛ tə
4 N yɩ kabwaŋʋ, à bwàlʋ́,
ndə Tirəsa tɩʋ tə nə.
N jə fɩra ndə Zwerizalɛmə tɩʋ tə nə,
n ga jə bɩcapuri ndə kwatara púlí nə,
ba nə zɩga ba kʋ̀ʋ̀ mɩmɩnan də̀ń nə.
5 Vəvəri n yɩ́á n kə kwa, dàn ká ywàń nə:
Cɩ́gá, n yiywaŋa tə wʋwalɩ nə.
N yukʋran yɩ ndə bʋ̀nɩ̀ kapʋpʋ nə,
tə nə gəgəli tə naŋa Galadə
pɛɛn tə yuu, tə cwí.
6 N yelə yɩ nəponi
ndə pee nə ba nə swɛ.
Kʋ nədʋ mama jə kʋ yɩyɔdon,
yeli mama wà kʋ yɩyɔdon nə kwɩ̀n.
7 N pakulə yɩ ndə gərenadə bɩ̀á faan nə,
n gankɩkala də̀ń nə.
8 Pakana nə swə sə ba yí sapwɩtwa,
də kabii sapwɩnɩa,
də kacɩan, ba nə wàrɩ̀ ba gàlɩ̀,
9 à mʋ̀ con nə, kan don tə̀lə́,
ʋ nə yɩ ndə à gunpwəkanɩ tə nə,
ʋ nə yɩ ndə à kazəŋu tə nə.
Ʋ yɩ ʋ nuu bʋ̀á tə, ʋ nə yɩ ʋ cɩcɩ,
ʋ yɩ kan tə nə lɩrɩ wá, bʋswənə.
Kacɩan nə nɩ wá,
ba yàá swɩ̀n də ʋ mʋ̀ sìí.
Pakana də kabii nə nɩ wá,
ba yàá bwɩ̀ ʋ nə, ba wʋ́:
10 «Wàà nə yɩ kan wà tə,
ʋ nə pɛ́n ndə tɩbɩlakʋnʋ nə,
ʋ ziən ndə cànà nə,
ʋ pɩpɩlɩ ndə yɩcɔɔ nə,
ʋ ga jə bɩcapuri ndə kwatara púlí nə,
ba nə zɩga ba kʋ̀ʋ̀ mɩmɩnan də̀ń nə?»
11 À cwí bɩlalʋrʋ tɩ̀án kárá wa,
sə à ywàń tɩ̀án nə pɛ́n nacoru tə wa,
sə à jə́n də divɛn tɩ̀ʋ́ tə nə twà,
də gərenadə tɩ̀án tə nə pùnì.
12 À yəri nətʋ tə kʋ nə twá,
à pùə́ fɩra ma yigu nə,
kʋ pa à zʋ à jə̀ə́ à pabiu tə
kwatara səsen kòrə̀n titəŋi wa!