Bwalʋbɛɛ tə
5
1 À zwɩ à tɩ̀án kárá wa, à nakʋa, à kadʋrʋ,à wulə à goni à təən,
də à tɩ̀án duən tə lwán nə ywán.
À də́ à tʋnyɩnɩ də à tʋ̀ràn,
à nywɩ̀n à divɛn də à nayɩla.
Dabara
Á díə́ à dabara-ba, á nywɩan!
Á nywɩan sonu á sú, á bʋbʋnɩ!
Bwalʋkan tə súrí ʋ mimii ʋ pa bwalʋbɛɛ tə nə
Bwalʋkan tə
2 À yà dwɛ̀, yá à bɩcan ba dwɛ̀.
Kʋ yɩ à sonu tə nə mà mimii nə:
« Súrí mimii n pa nə, à nakʋa, à bwàlʋ́,
à gunpwəkanɩ, à kazəŋu!
Cɩ́gá, à yuu piri də nyʋ̀nʋ̀,
à yukʋran vigə də tɩtɩn nɩ́á tə nə toli!
3 À lɩ à gànàn, kʋ mɛ sə à pìí à zʋ tə naaa?
À sɩ̀n à nɛɛ, kʋ mɛ sə à pìí à beri tə naaa?»
4 À sonu tɩrɩ ʋ jɩɩn mimii bʋʋ tə wa,
yá à bɩcan didigə ʋ yɩrɩ.
5 À zàn sə à súrí mimii, à pa à sonu nə,
yá nʋga ba nə fwa də təən mala,
pàlɩ̀ à jɩ̀àn yuu wa.
À jɩfwɩ nʋga tə toli boru tə
jɩɩn yijana bwálɩ́ tə yuu wa.
6 À súrí mimii à pa à sonu nə, yá ʋ tə̀lə́ lá:
À sonu yà viviri ʋ kwa, ʋ pìí ʋ vìí.
À nan à pú ʋ kwa,
à twarɩ wá, yá à wà wá nɩ.
À bon wá, yá ʋ wà nə le.
7 À jəri tɩʋ nəcɩra tə,
ba nə kɩkarɩ tɩʋ tə wa,
yá ba mà nə ba cɛŋa,
ba ga kʋ̀rɩ̀ à yùkwàlá,
ba mʋ̀ biritaŋan tə nəcɩra tə.
8 À lòrì aba pwəpwə, Zwerizalɛmə bwɩ̀ɩ́-ba,
á nə nɩ à sonu tə,
bɛ̀ɛ̀ nə á wá swɩ̀n ʋ con?
À swɩan ʋ con də, sonu pɩn à jì yayɩŋʋ!
Bwɩ̀ɩ́ tə
9 Bɛ̀ɛ̀ nə n sonu tə jə ʋ doni ʋ duən?
Swɩn n bɩrɩ nəba,
n mʋ̀ kana wa kabwaŋʋ!
Bɛ̀ɛ̀ nə n sonu tə jə ʋ doni ʋ duən,
kʋ pa n lòrì nəba pwəpwə nətən?
Bwalʋkan tə
10 À sonu tə yɩra zurə, ʋ ga yɩ nəsɩan,
ʋ swɩ́án wàá kʋ lwarɩ, lɩ̀à mʋ̀rʋ̀ fugə wa.
11 Ʋ yuu yɩ ndə sɩ́án nə,
tə nə ba durən jə,
ʋ yukʋran pipini,
tə ga yɩ nəzonən ndə batɩɛnkanʋ nə.
12 Ʋ yɩ́á yɩ ndə nacorən nii gunpwəkana nə.
Tə yɩ ndə tə nə pugə nayɩla wa,
tə ga tígə́ tə sìí jɩjə nəfarʋ wa.
13 Ʋ pakulə yɩ ndə bwálɩ́ nə,
vʋran tə lwán nə ywán nə súə́ lá,
tə yɩ ndə dəyuu dìì nədaran nə,
ba nə sʋ̀rɩ́ wusinə tə wa.
Ʋ nipənən yɩ ndə gapunə nə,
təən mala nʋga nə pàlɩ̀ tə naŋa lá.
14 Ʋ vànà yɩ ndə sɩ́án vala nə,
ba nə nàn də kapan cɩ́nʋ́ cɩcɩlʋ sagʋ nɩ́á səmun.
Ʋ pùə́ yɩ səsolu ndə tuu yelə yɩra nə,
ba nə nàn də kapan cɩ́nʋ́ cɩcɩlʋ bʋla.
15 Ʋ ciən yɩ ndə pɩ̀ràn nəpwənə ywəŋə nə,
tə nə zɩga zɩlan yuu,
ba nə fwa də sɩ́án tə nə ba durən jə.
Ʋ yáá yɩ ndə Liban pún tə nə,
ʋ swɩ́án wàá kʋ lwarɩ ndə sɩsaban tɩ̀ʋ́ nə.
16 Ywánɩ́ wulə ʋ nii wa,
yá ʋ yɩra tə mama jə fɩra.
Mə à sonu tə yɩ nətʋ,
mə à twadon tə yɩ nətʋ, Zwerizalɛmə bwɩ̀ɩ́-ba!