Bwalʋbɛɛ tə
4
1 N yɩ kabwaŋʋ tamʋ, à bwàlʋ́, n yɩ kabwaŋʋ!N yɩ́á yɩ ndə gunponi nə,
n gankɩkala də̀ń nə.
N yukʋran yɩ ndə bʋ̀nɩ̀ kapʋpʋ nə,
tə nə gəgəli tə naŋa Galadə
pɛɛn tə yuu, tə cwí.
2 N yelə yɩ nəponi ndə pee nə,
ba nə fɩnɩ tə bɔɔ,
ba ga swɛ tə.
Kʋ nədʋ mama jə kʋ yɩyɔdon,
yeli mama wà kʋ yɩyɔdon nə kwɩ̀n.
3 N nipənən yɩ ndə gaŋwənə nəsɩan nə,
yá n nii ziən.
N pakulə yɩ ndə gərenadə bɩ̀á faan nə,
n gankɩkala də̀ń nə.
4 N bɩan yɩ ndə pɩ̀ʋ́ Davidə dəyuu dìə̀ nədarʋ nə,
ba nə lwə̀ sə ka ya kwatarɩ zɩla dìə̀:
Mə lá nə, ba goli nàtànɩ̀ mʋ̀rʋ̀ tə,
də kwatara tə cwen tə mama.
5 N yɩla bələ tə yɩ ndə bʋbii bələ nə,
tə yɩ ndə felə bɩ̀á yɩywɛɛ bələ nə,
tə nə də́ gaʋ, gapunə titəŋi wa.
6 À wá va təən mala tɩralɩ paan tə yuu,
də wusinə dədolu tə yuu,
də tɩpʋrɩ vʋʋ tə wà sinti kʋ fuli,
sə yikunu dəri kʋ jɛ́n.
7 N yɩ kabwaŋʋ tamʋ, à bwàlʋ́,
won tə̀lə́ n yɩra, kʋ nə lwara.
8 Nan Liban pɛɛn tə wa, à kadʋrʋ,
nan Liban pɛɛn tə wa, n bà à con!
Nan Amana paan tə yupara wa,
də Senirə də Ɛrəmon pɛɛn tə yupara wa,
tə nə yɩ gərən yipaa bwálá,
də gwiə pɛɛn, n bà à con.
9 N pɩn à waa ywán, à nakʋa, à kadʋrʋ!
N viviri n ywàń nə, naa nədʋ cɩcɩ,
də n bɩan zanan tə zanbiu nədʋ mama,
yá kʋ pɩn à waa ywán.
10 N kʋkwalʋ ywán tamʋ, à nakʋa, à kadʋrʋ!
N kʋkwalʋ ywán kʋ doni divɛn,
yá n tɩralɩ tə lwán ywán
kʋ doni wusinə yiri mama!
11 N nipənən tə nyinyiŋi tʋ̀ràn,
ndə tʋnyɩnɩ nə, à kadʋrʋ.
Tʋ̀ràn də nayɩla wulə n nəndəli də̀ń nə,
yá n gànàn tə lwán yɩ ndə Liban pún lwán nə.
12 N yɩ à mʋ̀ cɩcɩ tɩ̀án kárá,
kʋ nii nə sun, à nakʋa, à kadʋrʋ,
à vɩlɩ kʋ nii nə sun,
à nabuliyii kʋ nii nə koni.
13 N nandaran tə yɩ ndə gərenadə
tɩ̀án kárá nə, tə lənə nə ywán.
Lele də pakana gəbuu,
14 pakana gəbuu də kwɩan síí,
də sitəronɛlə də sinamomə tɩ̀án,
də wusinə tɩ̀án yiri mama,
də təən də alʋwɛsə,
də tɩ̀án yiri mama,
tə lwán nə ywán zənzən, naŋa lá.
15 N yɩ tɩ̀án kárá nabuliyii,
vɩlɩ kʋ nɩ́á nə dəri,
tə pàlɩ̀ tə naŋa Liban pɛɛn tə yuu, tə cwí.
Bwalʋkan tə
16 Zàn, jɩzən saparʋ con vʋʋ!
Bàá, jɩgwiə saparʋ con vʋʋ!
Fuli à tɩ̀án kárá tə yuu wa,
sə ka tɩralɩ lwán nan!
À sonu tə zʋ ʋ tɩ̀án kárá tə wa,
ʋ də́ ka lənə tə nə ywán!