Bwalʋkan tə dwɛ̀ pandwɩa
Bwalʋkan tə
3
1 À gədo yuu wa, tɩtɩn nə,à twarɩ lìù tə à bɩcan nə swə.
À twarɩ wá, yá à wà wá nɩ.
2 À wá zàn, à kɩkarɩ tɩʋ tə wa,
à va coŋi tə yuu, də kanpwərən tə wa,
à twarɩ lìù tə à bɩcan nə swə.
À twarɩ wá, yá à wà wá nɩ.
3 À jəri tɩʋ nəcɩra tə,
ba nə kɩkarɩ tɩʋ tə wa,
à ma bwe ba, à wʋ́:
«Á nɩ lìù tə à bɩcan nə swə tə naaa?»
4 À tàà zə́n à kɛ̀ń ba à zwɛ̀,
də à nɩ lìù tə à bɩcan nə swə tə.
À jɩn wá, yá à kʋ́ʋ̀ ba dʋgʋ wá,
à kori à ja wá à zʋ à nuu dìə̀ wa,
kan tə ʋ nə lɩrɩ nə dibiu wa.
5 À lòrì aba pwəpwə, Zwerizalɛmə bwɩ̀ɩ́-ba,
á taa gaʋ feli tə də naŋɩ tə yɩrɩ,
á dànà ká zɩ̀n, á dànà ká zɩ̀n sonu,
də kʋ máŋá wà yí.
Bwaləkan tə
6 Wàà nə naŋa kasɔɔ lanworu con
ʋ bɩ̀àn, ndə ŋwɩn kùlì nə,
təən mala tɩralɩ, də wusinə,
də tɩralɩ mun yiri mama lwán titəŋi wa?
7 Kʋ yɩ pɩ̀ʋ́ Salʋmʋn nə ba zɩŋa, ʋ gədo yuu,
Yɩzərayɛlə kwatara babɩran tə wa,
kwatara babɩran sapwɩtwa ga kɩkarɩ kʋ.
8 Ba mama jə kwatara sɩ̀án,
ba ga mɩ̀n kʋ̀ʋ̀ tɛgʋ.
Ba lìù mama kwatara sɩ̀ʋ́ wulə ʋ ciceri nə,
sə ʋ ma cɩ̀ tɩtɩn fən nə.
9 Pɩ̀ʋ́ Salʋmʋn pɩn ba fwa dangon,
də Liban tɩ̀án dɛ̀ɛ̀.
10 Ʋ pɩn ba fwa kʋ ywəŋə tə də wárʋ́,
ba ga fwa kʋ də̀ń zɩlʋ tə də sɩ́án.
Ʋ pɩn ba fwa kʋ bwálɩ́ tə,
ʋ nə jəni tə, də gansɩan mwin,
Zwerizalɛmə bwɩ̀ɩ́ tə ga nàn kʋ waa tə də sonu.
11 Á naŋa Siyon bwɩ̀ɩ́-ba,
á ywàŋá pɩ̀ʋ́ Salʋmʋn,
də payupuu tə, ʋ nuu nə púə́ ʋ yuu nə,
ʋ kasweri tə dɩɩn nə,
dɩɩn tə nə, ʋ bɩcan nə súə́ də pupwən!