2
1 À mʋ̀ yɩ Swaronə vara tɩ̀ʋ́ pùní,varɩ gapuni.
Bwalʋbɛɛ tə
2 N nə yə̀ə́ tɩ̀ʋ́ pùní, casʋran titəŋi wa,
mə à bwàlʋ́ tə nyɩɛn nə, kacɩan titəŋi wa.
Bwalʋkan tə
3 N nə yə̀ə́ pɔmə tɩ̀ʋ́, pún tɩ̀án titəŋi wa,
mə à sonu tə nyɩɛn nə, balandʋra titəŋi wa.
À swə sə à jə̀ń ʋ ywárɩ́ nə,
yá ʋ ləni ywán à nipaa wa.
4 Ʋ jɩn nə ʋ va divɛn dìə̀ wa,
yá ʋ zɩ̀n sonu mɩmɩnʋ à yuu con.
5 Á saŋa nə də divɛn tɩ̀án bɩ̀á,
ba nə cili ba kə duən nə,
á pɩan nə pɔmə, sə à ma zuri à bɩcan!
Cɩ́gá, sonu pɩn à jì yayɩŋʋ.
6 Ʋ jɩgwiə kwé à yuu nə,
ʋ jɩzən ga kaŋa nə, kʋ marɩ ʋ yɩra!
Bwalʋbɛɛ tə
7 À lòrì aba pwəpwə, Zwerizalɛmə bwɩ̀ɩ́-ba,
á taa gaʋ feli tə də naŋɩ tə yɩrɩ,
á dànà ká zɩ̀n, á dànà ká zɩ̀n sonu,
də kʋ máŋá wà yí.
Bwalʋbɛɛ tə bɩ̀àn
Bwalʋkan tə
8 Á cʋga! À sonu tə nə!
Ʋ mʋ̀ nə wulə pɛɛn də dədwələn yuu wa,
ʋ faŋa, ʋ ma bɩ̀àn.
9 À sonu tə nyən ndə felə nə,
ʋ nyən ndə naŋa bìú nə.
Nə̀ń wá nə, ʋ zɩga nə bírə́ kwa,
ʋ twá təkurə ʋ ywàŋá,
ʋ twá tɩtaʋ bʋran ʋ pàlɩ̀.
10 À sonu tə swɩ̀n à con, ʋ wʋ́:
«Zàn yɩɩ nə à bwàlʋ́, à kabwaŋʋ, n bà!
11 Cɩ́gá, yɩdɩɩn zwɛ̀,
dwà kori, ka vìí.
12 Lʋʋ nii tə wa, tɩ̀án wulə tə mà pùnə́.
Gwaran máŋá yí,
yá nə nə̀ń gunponi kori, nə lʋʋ nii tə wa.
13 Kapɩra ləni tə təntən bɩ̀á,
divɛn tɩ̀án tə mà pùnə́, tə lwán sùrì.
Zàn yɩɩ nə à bwàlʋ́, à kabwaŋʋ, n bà!
14 À pɩ̀ràn kwələ wa gunpwəkanɩ,
ka nə səgə pɩ̀ràn lulwərən wa,
pa sə à na n yáá,
pa sə à nì n kori.
Cɩ́gá, n kori bwànà, n yáá ga ziən.»
Nubɩa
15 Á jana cirəkuri tə à pa nəba,
cirəkuri nəmənbii tə nə cʋ̀gà nə divɛn tɩ̀án tə,
yá tə ga jə pùnə́!
Bwalʋkan tə
16 À sonu tə yɩ à mʋ̀ nə tɩ,
yá à də yɩ ʋ mʋ̀ nə tɩ.
Ʋ wulə ʋ jírí gapunə titəŋi wa.
17 À sonu, vəli n ga pìí n bà,
də tɩpʋrɩ vʋʋ tə wà sinti kʋ fuli,
sə yikunu dəri kʋ jɛ́n.
Ya ndə felə nə, nə à yə̀ə́ ndə naŋa bìú nə,
pɛɛn lulwərən wa!