Sonu gwaran
Sonu gwaran
1
1 Salʋmʋn sonu gwaran,tə ywánɩ́ nə dwə gwaran mama.
Bwàlá viə
Bwalʋkan tə
2 Kʋkwalɩ nə, n ga mu à nii!
Cɩ́gá, n nə pèrì à yɩra tə ywán kʋ pa nə,
kʋ doni divɛn.
3 N tɩralɩ tə lwán ywán zənzən!
N yɩrɩ tə yɩ ndə tɩralɩ nə,
kʋ lwán nə sùrì,
kʋ mʋ̀ nə pɩn kacɩan ma swə mʋ́.
4 Ja nə n kə n kwa! Nə dərə!
Pɩ̀ʋ́ ja nə ʋ zʋ ʋ padii tə wa.
Nə wá jwɛ, nə ga fwa nə fɩra n yɩrɩ.
Nə wá fwa pupwən n kʋkwalʋ tə yɩrɩ,
nə doni divɛn.
N cɩ́gá mɛ sə kana sóní mʋ́!
5 À yɩ nəzonu, yá à ziən,
Zwerizalɛmə bwɩ̀ɩ́-ba!
À ziən ndə Kedarə tɩ̀án gansilə nə,
ndə Salʋmʋn tapwələ nə.
Zwerizalɛmə bwɩ̀ɩ́-ba,
6 á dànà ká ywàń nə,
à nə yɩ bibiru yɩrɩ:
Kʋ yɩ yɩcaʋ nə beri nə.
À nuu bɩ̀á tə lɩŋa zàn à yuu wa,
ba pa à cɩ̀ divɛn tɩ̀án nə.
Yá à tətə divɛn tɩ̀án tə, à wà tə nə cɩ̀.
7 N mʋ̀ lìù tə à bɩcan nə swə,
swɩn bwálɩ́ tə n nə yɩ̀rɩ̀ n vàná, n bɩrɩ nə,
bwálɩ́ tə n nə pɩn tə pə̀ní tə sìí, yɩcaʋ wa,
sə à dàn ká twá lá à ywan,
n twaduən vàná nii nə.
Payɩra
8 Də n nə yəri kʋ,
n mʋ̀ kana wa kabwaŋʋ,
nan n tì vanmɩnɩ nɛɛ,
n va n yɩ̀rɩ̀ n bʋbii tə,
payɩra vunən bɩan nə.
Bwalʋbɛɛ tə
9 À bwàlʋ́, n vəli jə fɩra, ndə səsənkan nə,
ba nə ken Farawon səsen kòrə̀n nə.
10 N pakulə ziən, n zɩnkwana titəŋi wa,
n bɩan ziən, n bɩan zanan titəŋi wa.
Payɩra
11 Nə wá fwa sɩ́án zɩnkwana nə pa mʋ́,
tə yɩra nə jə wárʋ́ pʋ̀pʋ̀nà.
Bwalʋkan tə
12 Pɩ̀ʋ́ tə tígə́ ʋ ganpurə wa,
yá à pakana gəbuu tɩralɩ lwán sùrì.
13 À sonu tə yɩ ndə
təən mala nə, ʋ pa nə.
Ʋ tígə́ à yɩla titəŋi wa, ʋ sìí.
14 À sonu tə yɩ ndə lele pùnə́ nə,
Eyin-Gedi divɛn tɩ̀án kárɩ́ wa.
Bwalʋbɛɛ tə
15 N yɩ kabwaŋʋ tamʋ, à bwàlʋ́, n yɩ kabwaŋʋ!
N yɩ́á yɩ ndə gunponi nə.
Bwalʋkan tə
16 N yɩ nanʋnbɛɛ, à sonu, n bwànà!
Galɩʋ nə yɩ nə gədo.
17 Nə dìì baŋɩ yɩ sɩsaban daran,
nə ywəŋə yɩ nyənbori daran.