Pɩ̀ʋ́ tə nə fwa zəni lɩ̀à yɩra
32
1 Nə̀ń, pɩ̀ʋ́ tə wá də́ pàrɩ̀,kʋ twá cɩ́gá cwəŋə nə,
yá pàbɩ̀á tə wá kə lɩ̀à cwəŋə wa,
ka nə yɩ mənəmənə.
2 Ba lìù mama wá ya ndə yuu yikwala bwálɩ́ nə,
kʋ nə cɩ̀ vʋʋ nə,
nə à yə̀ə́ ndə yisəgə bwálɩ́ nə,
kʋ nə cɩ̀ dwavʋʋ nə,
nə à yə̀ə́ ndə nàgwàlán fìrə̀n nə,
tɩkʋrʋ yuu wa,
nə à yə̀ə́ ndə pɩ̀ʋ̀ nəfarʋ ywárɩ́ nə,
yɩcakʋrʋ tɩa wa.
3 Lɩ̀à tə ba yɩ́á nə na lá, kʋ́ʋ̀ bá fəfəli ba yɩ́á,
yá lɩ̀à tə ba zɩan nə nə̀ń, wá súrí ba zɩan, ba cʋgʋ.
4 Lɩ̀à tə nə ba yoo lilini ba ga swɩ̀n,
wá ja pubʋŋa ba ma lwarɩ yoo də̀ń,
yá lɩ̀à tə nə yɩ kʋkwaran,
nəndəli wá swɩ̀n lala,
ba sʋgʋ də̀ń ga wá nì zəni.
5 Ba kʋ́ʋ̀ bá pa yɩrɩ zəŋu ləbibənu nə,
ba ga bá bʋ gɩgɩrɩnyiən də nə.
6 Cɩ́gá, ləbibənu swɩ̀n bibənsʋran,
yá ʋ bɩcan swə yolwan fwaŋʋ.
Ʋ swə ka tʋn yobalwaran,
də ʋ swɩ̀n sʋkʋkwɩnan,
ʋ zɩga Ba-Yígúrə́-Jə-Tiu nə.
Ʋ ba wodiu pɩn lìù tə nə niən nə jə,
ʋ ga ba nɩ́á pɩn lìù tə nə nanyʋnɩ nə jə.
7 Gɩgɩrɩnyiən gɩgɩrɩyiən tə lwara.
Ʋ yàá mà gɩgɩra sawara,
sə ʋ ma gɩgarɩ yinənyiən,
ʋ dʋgʋ də kʋ̀nkʋ̀n sʋ̀ràn,
də ba mʋ̀ lalaŋa təntə nə swə ba jə cɩ́gá də.
8 Yá ləzwənzəŋu mʋ̀ yàá mà sawara tə nə ziən,
ʋ ga tʋŋa kʋ tə nə ziən máŋá mama.
Yɩɩ sʋgʋ tə nə zɩga Zwerizalɛmə tɩ̀án kana nə
9 Á mʋ̀ kana tə á nə swə á tɩ̀àn,
á zaŋa á cʋgʋ à con!
Á mʋ̀ bwɩ̀ɩ́ tə yoo mama nə ba aba wʋwalɩ,
á gunə á zɩɩn, á cʋgʋ à sʋgʋ!
10 Bɩnɩ də dɩan bagalɩ pwə́rə́ wa,
á wá vɩvaga, á mʋ̀ kana tə
yoo mama nə ba aba wʋwalɩ.
Cɩ́gá, divɛn tɩ̀án lənə pʋ̀rʋ́ wá zwɛ̀,
yá woceri kʋ́ʋ̀ bá ya lá.
11 Á vɩvaga, á mʋ̀ kana tə á nə swə á tɩ̀àn!
Á pɩan twara ja aba, á mʋ̀ bwɩ̀ɩ́ tə
yoo mama nə ba aba wʋwalɩ!
Á kʋra á gànàn, á yá yaswələ,
á ga jí ganlɔɔ gànʋ̀a á tàŋá nə!
12 Á maga á jɩ̀àn á yɩla nə,
á ga kwi kárɩ́ tə nə ziən,
divɛn tɩ̀án tə ga lənə zənzən yɩrɩ.
13 Á kwíə́, səni də casʋran nə nan
à lalʋʋ tə tɩa tə wa yɩrɩ.
Tə nan dìì tə də tətə mama wa,
tə nə wulə tɩʋ tə wa, kʋ nə jwɛ.
14 Cɩ́gá, ba vɩga padiə tə ba dʋgʋ,
ba vɩga tɩʋ tə kʋ zizigu nə dáá, ba dʋgʋ.
Ofɛlə* sanii tə də dəyuu didarʋ tə jìgə̀
paan bʋran, máŋá mama wuuu,
tə pa gaʋ bɩ̀nɛ̀ nə, tə ma fwa tə fɩra,
də bwálɩ́ vàná nə də́ gɔɔ.
Yìə̀n tə lwànʋ́ yoo
15 Máŋá don wa, Ba-Yígúrə́-Jə-Tiu wá pa
ʋ Siŋu tə nan yɩɩ nə, kʋ cú nə yuu wa,
yá kasɔɔ lanworu dàń wá lwàń kʋ jì tɩ̀án kárá,
tɩ̀án kárá ga lwàń ka jì pún.
16 Ka twá cɩ́gá nə ndə kʋ nə mɛ nətʋ,
dàń wá ya kasɔɔ lanworu wa,
cɩ́gá cwəŋə ga ya tɩ̀án kárá wa.
17 Tʋtʋŋɩ tə nə tì cɩ́gá cwəŋə wá lənə bɩcan sìə́,
yá cɩ́gá cwəŋə tʋtʋnɛɛ wá ja yazurə
də ywánɩ́ tə bà, máŋá mama wuuu.
18 À lalʋʋ tə wá ya sìə́ bwálɩ́ nə,
dìì wa, bɩcan sìə́ nə wulə lá,
bwálɩ́ nə, won mama nə bá wʋwalɩ ba.
19 Yá dwakafɩna wá mà pún tə tə cʋ̀gʋ̀,
tɩʋ tə ga tʋ tɩa mɩ́ámɩ́án.
20 Pupwən lɩ̀à nə yɩ á mʋ̀ lɩ̀à tə,
á nə wàá wiən á dwì bwálɩ́ mama, nɩ́á nii nə,
á ga kʋ̀rɩ̀ naʋ də bɩ̀nà á dʋgʋ,
á pa tə tɩnɩ tə tɩ̀àn.