Lɛɛ wá yí cʋcʋnyiən
33
1 Nə̀ń kʋ lɛɛ nyɩɛn,kʋ pa n mʋ̀ lìù tə nə, n nə cʋ̀gà,
yá ba wà mʋ́ cʋ̀gʋ̀,
n mʋ́ lìù tə nə tʋŋa níə́ bələ yìə̀n lɩ̀à yɩra,
yá ba wà níə́ bələ yoo n yɩra tʋn!
N nə cʋ̀gʋ̀ n zwɛ̀ máŋá tə wa,
ba wá cʋ̀gʋ̀ n də.
N nə tʋn níə́ bələ yìə̀n lɩ̀à yɩra
n zwɛ̀ máŋá tə wa,
ba wá tʋn níə́ bələ yoo n də yɩra.
2 Ba-Yígúrə́-Jə-Tiu, dəri nə yinəgə!
Nə ken nə yala n nə.
Ya nə dɩ̀àn jɩjʋ mama,
n ga ya nə jonu də, jɩgwarʋ máŋá wa!
3 Lɩ̀à nə nì n bagʋ,
ba yàá dəri ba səgə.
N nə zàn n zɩgɩ yɩɩ nə,
lʋʋ dwíə́ tə yàá laga duən yáá nə.
4 Ba jànɩ̀ á wiən,
ndə jə̀rə̀n nə jànɩ̀ kárɩ́ wiən nətʋ.
Ba púə́ tə yuu nə, ndə kayɩra púlí nə.
5 Ba-Yígúrə́-Jə-Tiu wulə tə mɛ yuu wa,
cɩ́gá, ʋ sàń wulə yɩɩ nə baan baan.
Ʋ pɩn kʋ tə nə yɩ mənəmənə,
də cɩ́gá cwəŋə sú Siyon* tɩʋ tə.
6 Yɩɩ wá pa n lʋʋ yanʋ ja yazurə.
Wʋbʋŋa də yənu yɩ jɩjə wiən,
tə nə joŋə lìù.
Ka dəri Ba-Yígúrə́-Jə-Tiu fən
nə wá ya n jɩjə won.
Ba-Yígúrə́-Jə-Tiu zàn yɩɩ nə
7 Á cʋga! Ba kwatara babɩran tə mà cə̀rí kàrá wa.
Sìə́ ŋwɛn tʋntʋna kwi yinɩa.
8 Lìù mama tə̀lə́ coŋi tə yuu wa,
lìù mama kʋ́ʋ̀ ba cwəmɩnɩ tə twá.
Ba cʋ̀gʋ̀ nimarʋ tə,
ba vɩga tɩan tə ba dʋgʋ,
ba yáá kʋ́ʋ̀ tə̀lə́ də lìù mama.
9 Lʋʋ nii tə wulə lúə́ pucʋnɩ wa, kʋ bwànɩ́.
Cavɩra zʋa Liban paan tə, kʋ pa ka pɩ̀nɩ̀.
Swaronə vara tə jìgə̀ ndə digə nə.
Baswan nagwanaa tə də Karəmɛlə paan tə
kwɩ̀n tɩ̀án vʋran nə.
10 Sɩ́ʋ́n nə, à dàń wá zàn,
sɩ́ʋ́n nə, à dàń wá zàn à zɩgɩ yɩɩ nə,
sɩ́ʋ́n nə, à dàń wá bɩrɩ à dun tə.
Ba-Yígúrə́-Jə-Tiu nə swɩ̀n nətʋ.
11 Á pubʋŋa yìə̀n tə yɩ ndə gakʋrʋ nə,
yá tə nə jìgə̀, tə yàá yɩ ndə wosanan nə.
Á mɩɩ vʋʋ tə wá də́ aba ndə mən nə.
12 Jiribu mən wá də́ lʋʋ dwíə́ tə,
mən wá də́ ba ndə casʋran nə,
ba nə za ba sʋ̀rɩ́ mən wa.
13 Á mʋ̀ lɩ̀à tə á nə wulə yiŋʋnɩ,
á cʋga kʋ tə à nə fwa!
Á mʋ̀ lɩ̀à tə də, á nə wulə bwə́lə́ bwə́lə́,
á ywàŋá à dɩ̀àn nə mɛ nətʋ!
14 Fən jə yolwafwana tə Siyon* tɩʋ tə wa,
vɩvagʋ zʋa cʋna lɩ̀à tə,
yá ba swɩ̀n, ba wʋ́:
«Nə wàà nə wá wànɩ́ ʋ zɩgɩ mənvwə yáá con,
ka nə kwé kə̀lə̀kə̀lə̀?
Nə wàà nə wá wànɩ́ ʋ zɩgɩ líí mən yáá con,
ba nə cəgə máŋá mama wuuu?»
15 Kʋ yɩ lìù tə nə vəli cɩ́gá cwəŋə wa,
ʋ nii sʋgʋ ga yɩ mənəmənə.
Ʋ vɩ sə ʋ tʋn gɩgɩra lìù yɩra, ʋ ma jon won,
ʋ ga kɩkaga ʋ jɩɩn, ʋ ba sɛ̀ ʋ joŋə vwiŋə.
Ʋ swɩn ʋ zɩan, sə ʋ dàn ká nì lagʋrɩ sʋ̀ràn,
ʋ ga pwí ʋ yɩ́á nə, sə ʋ dàn ká na yolwan.
16 Kʋ lìù təntə wá ya bwálɩ́ nə,
kʋ nə wulə baan baan.
Pɩ̀ràn kwə̀lə́ nə wá ya ʋ yisəgə bwálɩ́.
Ʋ wá ja wodiu kʋ yí wá,
yá nɩ́á də bá mùrì wá.
Ba-Yígúrə́-Jə-Tiu jon Zwerizalɛmə
17 Zwerizalɛmə tɩ̀án-ba,
á yɩ́á wá na pɩ̀ʋ́ tə, ʋ dun tə wa,
tə wá ywàń lʋʋ nii tə yáá wanɩ tə mama.
18 Á wá bʋ́n fuən bɩcapʋri tə yoo,
á ga bwe á tɩ̀àn, á wʋ́:
«Lanpoo lɛnʋ tə wa yə̀n nə?
Lìù tə yà nə gàlɩ̀ tə wa yə̀n nə?
Lìù tə yà nə gàlɩ̀ dəyuu dìì nədaran tə wa yə̀n nə?»
19 Á kʋ́ʋ̀ ba na lalʋʋ tə nə jə yɩrʋ tə,
ba nəndəli sʋgʋ də̀ń nə ba nə̀ń.
Ba yɩ dí yáá lɩ̀à sʋgʋ nə ba swɩ̀n,
kʋ pa ba sʋgʋ ba də̀ń mama jə.
20 Ywàŋá Siyon*, nə jə́rí nəfaran tɩʋ tə!
Á yɩ́á wá na Zwerizalɛmə,
sìə́ bwálɩ́ tə kʋ nə yɩ ndə gansili nə,
ba nə kʋ́ʋ̀ bá gwɛrɩ.
Ba kʋ́ʋ̀ bá van kʋ párá ba mùrí,
yá ba kʋ́ʋ̀ ba kʋ̀rɩ̀ kʋ ŋoni tə.
21 Mə lá nə Ba-Yígúrə́-Jə-Tiu jə fɩra,
ʋ pa nəba.
Ʋ yɩ ndə mʋnɛɛ nə,
nə à yə̀ə́ ndə nacoŋi nəfaran nə,
won mama nə ba tə nɩ́á yáá nə cɩ̀.
Nɩ́á yuu bwərə tə danyungulən nə kəni cwəŋə nə,
bá zʋ lá,
yá nɩ́á yuu bwərə nəfaran də bá twá lá tə kɛ̀ń.
22 Cɩ́gá, Ba-Yígúrə́-Jə-Tiu nə bʋ̀rɩ̀ nə bʋra,
Ba-Yígúrə́-Jə-Tiu nə pɩn nəba nii yìə̀n yuu wa,
Ba-Yígúrə́-Jə-Tiu nə yɩ nə pɩ̀ʋ́,
ʋ mʋ̀ nə joŋə nəba.
23 Asiiri tɩ̀án-ba,
ba kʋ̀rɩ̀ á nɩ́á yuu bori tə ŋoni ba dʋgʋ,
tə kʋ́ʋ̀ ba á nɩ́á bori tə yoŋi jə də dɩ̀àn,
kʋ pa á kʋ́ʋ̀ wàrɩ̀ kʋ̀ʋ̀ mɩmɩnʋ á zɩ̀n yɩɩ nə.
Yá ba dàń wá tara wiən kapʋpʋ,
ba nə ta ba jon kʋ̀ʋ̀ wa.
Gwànɩ́ də tətə wá twá ba jàn wiən.
24 Tɩʋ tə wa lìù mama kʋ́ʋ̀ bá swɩ̀n, ʋ wʋ́:
«À yɩra ba zurə!»
Ba-Yígúrə́-Jə-Tiu yá Zwerizalɛmə cʋna tə,
ʋ pa tə kɛ̀ń.