Yuu-Tiu wá bʋ̀rɩ̀ Edomə tɩ̀án bʋra
34
1 Lʋʋ dwíə́-ba, á twənə á yí, á cʋgʋ!Lʋʋ lɩ̀à-ba, á zurə á yɩra, á cʋgʋ zəni!
Tɩa də ka yuu wiən mama,
də lʋʋ tə də kʋ wa wiən mama cʋga!
2 Cɩ́gá, Ba-Yígúrə́-Jə-Tiu lɩŋa zaŋa
lʋʋ dwíə́ tə mama yuu wa,
ʋ lɩŋa fʋrɩ ba kwatara tə mama yuu wa.
Ʋ dùə̀ də ʋ wá cʋ̀gʋ̀ ba mɩ́ámɩ́án,
ʋ pa ba dʋŋa gʋ ba ndə vàná nə.
3 Ba wá dʋgʋ ba tɩga tə tɩa mama,
ba pʋ, ba lwán sùrì,
ba jana ga dəri pɛɛn tə yuu wa.
4 Lanworu tə wa wiən* tə mama wá pʋ.
Ba wá pipini lanworu tə ndə sagɩ nə,
yá kʋ wa wiən tə mama wá tʋ, ndə divɛn tɩ̀ʋ́ vʋran,
nə à yə̀ə́ ndə kapɩrʋ vʋran nə pɩ̀nɩ̀ tə twɩ nətʋ.
5 Cɩ́gá, à kwatara sɩ̀ʋ́ tə nyʋan jana kʋ sú, lanworu tə wa.
Nə̀ń, kʋ wá cú Edomə tɩ̀án yuu wa,
lalʋʋ təntə yuu wa à nə dùə̀ də,
à wá cʋ̀gʋ̀ kʋ mɩ́ámɩ́án,
à ma bʋ̀rɩ̀ kʋ bʋra.
6 Ba-Yígúrə́-Jə-Tiu kwatara sɩ̀ʋ́ tə swɛ də jana,
kʋ ga tà də nʋga.
Kʋ swɛ də pəbii də bʋtɩlan jana,
kʋ ga tà də pabɩran tanpɩrɩbɩa nʋga.
Cɩ́gá, Ba-Yígúrə́-Jə-Tiu fwa joŋi Bɔsəra tɩʋ tə wa,
ʋ gʋa Edomə tɩ̀án ndə vàná nə.
7 Ba də ganɩan twá duən ba twɩ,
nɩan də nabɩran də twá duən tə twɩ.
Ba tɩa tə nyʋan jana ka sú,
ba nʋga ga piri pùrú tə yuu nə.
8 Cɩ́gá, kʋ yɩ Ba-Yígúrə́-Jə-Tiu lɩŋa fwiu dɩɩn,
kʋ yɩ bɩnɩ tə ʋ nə tɛ dʋŋa, Siyon* tɩ̀án yɩrɩ.
9 Edomə lʋʋ nii tə nacorən wá sú də gudəron,
kʋ pùrú ga lwàń tə jì jiribu.
Kʋ tɩa tə wá ya ndə gudəron nə kwé mən.
10 Mən tə wá də́ tɩtɩn də yɩcaʋ, tə ba də̀ŋì,
tə ŋwɩn ga dɩ̀ yɩɩ, máŋá mama wuuu.
Lʋʋ nii tə wá cʋ̀gʋ̀, kʋ jì dibwərən,
máŋá də máŋá mama wuuu,
yá lìù kʋ́ʋ̀ bá twá lá ʋ kɛ̀ń də mama.
11 Caŋwarɩ də sarɩkwɩɩ nə wá tɩnɩ kʋ.
Kunkwəbasiri də batɩɛnkanan nə wá ya lá.
Ba-Yígúrə́-Jə-Tiu wá cʋ̀gʋ̀ lʋʋ nii tə,
ʋ pa kʋ jì woru nəfarʋ*,
ndə máŋá tə wa, ʋ yà tə nə wà lʋʋ fwa.
12 Kʋ tɩʋ tɩ̀án tə kʋ́ʋ̀ bá ya lá,
sə ba ma túŋə́ pɩ̀ʋ́,
kʋ pàbɩ̀á tə mama kʋ́ʋ̀ bá ya lá.
13 Casʋran tuni wá nan kʋ padii tə wa,
cwalʋ də dankasɩla ga pú
kʋ dɩ̀àn dəkuu bwálá tə yuu nə.
Kʋ wá ya cirəkuri də tɛɛtɛɛ bwálɩ́.
14 Gaʋ gəlirən wá jəri buyurən lá,
bʋtɩlan də ga wá bon tə kə duən nə lá.
Mə lá nə tɩtɩn wiən tə wá ya də yazurə,
yá kʋ wá ya sìə́ bwálɩ́ kʋ pa tə.
15 Mə lá nə dən wá fwa kʋ pwalʋ,
kʋ dɩ kʋ càlà, kʋ vàlɩ̀,
kʋ lwen bɩ̀á, kʋ ywàń tə yuu.
Mə lá nə dələn də wá kun duən nə,
dəlu mama də kʋ twadon.
16 Á twara Ba-Yígúrə́-Jə-Tiu sagɩ tə, á kàrɩ̀:
Kʋ nədʋ mama bá mùrì,
kʋ nədʋ mama bá kwɩ̀n kʋ twadon nə.
Cɩ́gá, Ba-Yígúrə́-Jə-Tiu nə pɩn nii təntə,
ʋ Siŋu tə nə wá kə tə duən yáá nə.
17 Ʋ mʋ̀ jɩɩn nə jɩn ŋwənə
ʋ ma man tɩa tə ʋ tara, ʋ pa tə.
Ʋ mʋ̀ nə dɩlɩ pwárʋ́,
ʋ ma pa tori kʋ nədʋ mama nə.
Tə wá tɩnɩ ka, máŋá mama wuuu,
yá tə wá ya lá, máŋá də máŋá mama wuuu.