Ywə́ŋə́ kapʋpʋ túrí yoo
35
1 Kasɔɔ lanworu tə də tɩkʋrʋ tə lara!Sə digə tə jwɛ, ka ga pùnə̀ pùnə́ nəzəŋə!
2 Digə tə yuu wá piri də pùnə́,
ka ga dɩ pupwən gwaran,
də ka mà pupwən cə̀rí.
Ba wá pa ka Liban dun tə,
də Karəmɛlə də Swaronə zəni tə.
Ba wá na Ba-Yígúrə́-Jə-Tiu dun tə,
ba wá na nə tíú Yɩɩ dun tə nə jə fɩra nətʋ.
3 Á daŋa jɩ̀àn tə nə gwàrɩ̀,
á ga dàn nadwana tə nə vɩvaga.
4 Á swɩan lɩ̀à tə con,
ba bɩcan nə mà gùlú, á wʋ́:
«Á yana babara,
á dànà ká pa fən ja aba.
Nəŋə á tíú Yɩɩ tə nə,
ʋ bɩ̀àn sə ʋ fwi á lɩŋa,
ʋ ga ŋwɩ́n á dʋŋa tə lwanɩ tə,
ba nə tʋn á yɩra ŋwɩ́rán ba yɩra.
Ʋ tətə nə wá bà ʋ jon aba.»
5 Lilirən yɩ́á dàń wá pori,
zɩbʋŋa zɩan ga wá súrí.
6 Gwànɩ́ wá fan, ndə bɩnɩ mama ka pɛ́n nyʋʋ nə,
yá bìrə̀n nəndələ wá mà pupwən cə̀rí.
Cɩ́gá, nɩ́á wá pɛ́n tə nan kasɔɔ lanworu wa,
yá nacorən wá pàlɩ̀ digə wa.
7 Bwálɩ́ tə nə lɩŋa bábá wá lwàń kʋ jì buu,
yá nabuli lʋʋ nii lwàń kʋ jì nabuliyɩa bwálɩ́.
Mɩncanɩ də sangaʋ wá jon cirəkuri yipaa bwálɩ́.
8 Ba wá tún cwəŋə lá nə,
ba dɩ ka yɩrɩ “cwəŋə tə nə yɩ parɩ”.
Durən lìù mama bá twá ka,
ləbibənu mama də ma bá jɛ́n, ʋ zʋ ka wa.
Ka wá ya Ba-Yígúrə́-Jə-Tiu lɩ̀à tə cɩcɩ nyiən,
ba va ka wa.
9 Gəru bá ya ka wa,
wojankadiu mama bá twá ka.
Ba bá jəri won mama ka wa.
Lɩ̀à tə Ba-Yígúrə́-Jə-Tiu nə jon tə cɩcɩ,
nə wá va ka wa.
10 Mə cwəŋə təntə nə,
lɩ̀à tə Ba-Yígúrə́-Jə-Tiu nə jon wá twá,
ba ma pìí ba bà.
Ba wá bà Siyon* tɩʋ tə wa, də pupwən cə̀rí.
Ba wá sú də pupwən, ka nə bá zwɛ̀,
ndə ba púə́ payupuu ba yuu nə.
Jwɩa də pupwən wá nan tə jəri ba,
yá pucʋnɩ də súrə́ dəri tə jɛ́n mɩ́ámɩ́án.