Ezwipətə tɩ̀án də yɩ ləzoni, ba tà Yɩɩ
31
1 Nə̀ń kʋ lɛɛ nyɩɛn, kʋ pa lɩ̀à tə,ba nə vələ Ezwipətə, sə ba pɩ̀à sáŋʋ́!
Ba jələ səsen yuu wa,
ba ken ba yala səsen kòrə̀n nə,
tə nə dáá zənzən yɩrɩ,
də səsədɩra nə, ba nə jə dɩ̀àn zənzən yɩrɩ.
Yá ba ba Yɩzərayɛlə lɩ̀à Yɩɩ tə mʋ̀,
ʋ nə yɩ parɩ* yuu wa jələ,
kʋ pa, ba ba Ba-Yígúrə́-Jə-Tiu twarɩ!
2 Yá Ba-Yígúrə́-Jə-Tiu yɩ wʋbʋnyiən,
kʋ mʋ̀ nə pɩn, ʋ pa lɛɛ bà,
yá ʋ wà ʋ sʋ̀ràn tə kwɛ̀.
Ʋ zàn ʋ zɩga wʋlʋnyɩna dìə̀ nə,
ʋ ga tɛ ʋ zɩga yolwafana sáŋʋ́ nə.
3 Ezwipətə tɩ̀án yɩ ləzoni, ba tà Yɩɩ.
Ba səsen tə yɩ vàná, tə tà jə̀rí.
Máŋá tə Ba-Yígúrə́-Jə-Tiu nə te ʋ jɩɩn,
lìù tə nə saŋa, wá mà ʋ naa ʋ tʋ,
lìù tə də ba nə saŋa ʋ nə, wá tʋ,
yá ba mɛ bələ wá twá duən ba tɩ.
Ba-Yígúrə́-Jə-Tiu wá ta ʋ jon Zwerizalɛmə
4 Nə̀ń sʋgʋ tə Ba-Yígúrə́-Jə-Tiu nə swɩ̀n à con:
«Gəru, nə à yə̀ə́ gəbala yàá baa,
kʋ ma cɩ̀ kʋ nàŋʋ́ nə,
yá vàná nəcɩra nə bon duən,
ba bà kʋ nə,
ba bagʋ tə wàrɩ̀ kʋ pɩn fən zwɩ kʋ,
ba dánɩ́ tə də ma wàrɩ̀ kʋ kʋ fugə.
Mə nətʋ nə à mʋ̀ Ba-Yígúrə́-Jə-Tiu,
à nə yɩ kwatara Yɩɩ wá cú,
à ta kʋ̀ʋ̀ Siyon paan tə,
də ka dədolu tə yuu wa.»
5 Ba-Yígúrə́-Jə-Tiu wá larɩ ʋ sáŋʋ́ tə,
Zwerizalɛmə yuu con, ʋ ma cɩ̀ kʋ nə,
ndə zuŋə nə yàá larɩ ka vànà,
ka ma piri ka bɩ̀á yuu nə.
Ʋ wá cɩ̀ tɩʋ tə nə, ʋ ga jon kʋ.
Ʋ wá jon kʋ ʋ dʋgʋ,
sə dʋŋa dàn ká cʋ̀gʋ̀ kʋ.
6 Yɩzərayɛlə lɩ̀à-ba, á pìrə́ á bà Yɩɩ tə con, á nə vɩga á dʋgʋ mɩ́ámɩ́án! 7 Kʋ máŋá tə wa, á lìù mama wá dʋgʋ ʋ woŋwanan tə, ba nə fwa də wárʋ́, də tə tə ba nə fwa də sɩ́án, tə nə yɩ á jɩ̀àn tə nə tʋŋa cʋna, nə fwa tə pa aba.
8 Yá kwatara sɩ̀ʋ́,
kʋ nə tà ləzwənə kwatara sɩ̀ʋ́,
wá za Asiiri lʋʋ nii tə kʋ dɩ.
Kwatara sɩ̀ʋ́,
kʋ nə tà ləzwənə kwatara sɩ̀ʋ́ wá də́ kʋ.
Asiiri tɩ̀án wá dəri,
sə ba jɛ́n kwatara sɩ̀ʋ́ tə yáá nə,
yá dʋŋa wá kálɩ́ ba balandʋra tə,
ba pa ba tʋn tʋtʋncaran.
9 Fən wá zʋ ba lìù tə,
ba yà nə jələ ʋ yuu wa, ndə pɩ̀ʋ̀ nə,
kʋ pa ʋ dəri ʋ jɛ́n,
yá fən wá gən ba yáá tɩ̀án tə,
Ba-Yígúrə́-Jə-Tiu kʋ̀ʋ̀ mɩmɩnʋ tə yáá con.
Ba-Yígúrə́-Jə-Tiu nii sʋgʋ nə!
Ʋ mən wulə Siyon* tɩʋ tə wa,
ʋ mənvwəsɩʋn bʋʋ wulə Zwerizalɛmə wa.