Tʋtʋnaa tə Yɩɩ nə zɩga ka nə
30
1 Nə̀ń kʋ lɛɛ nyɩɛn, kʋ pa bɩ̀á tə nə, ba nə vɩ nii!Ba-Yígúrə́-Jə-Tiu nii sʋgʋ nə!
Ba yàá vʋrɩ duən nə,
ba tanɩ sə ba tʋn yìə̀n,
tə nə tà à mʋ̀ nə bɩrɩ ba,
ba ga túŋə́ nimarʋ də lɩ̀à,
yá kʋ tà à mʋ̀ nə pɩn ba kʋ pubʋŋa təntə.
Kʋ nətʋ tə dàń pɩn ba tʋŋa cʋna, ba pàlɩ́ duən yuu.
2 Ba vələ Ezwipətə lʋʋ nii wa,
sə ba pɩ̀à yisəgə bwálɩ́
Farawon dɩ̀àn dəkuu bwálɩ́ tə wa,
ba kwálɩ́ ba yuu Ezwipətə lʋʋ nii ywárɩ́ nə,
yá ba wà nə bwe!
3 Farawon dɩ̀àn dəkuu bwálɩ́ tə wá jì á cavɩra.
Yuu yikwala bwálɩ́ tə á nə pɩ̀à,
Ezwipətə lʋʋ nii ywárɩ́ wa, wá fʋfʋlɩ aba.
4 Á pɩ̀ʋ́ tʋ̀tʋ̀nà yuun tɩ̀án tə manwarɩ ba wulə Sowan nə,
yá ʋ tʋntʋna ga yí Hanɛsə.
5 Ba mama wá də́ cavɩra,
dwíí təntə nə bá ja sáŋʋ́ mama, kʋ pa ba yɩrɩ.
Kʋ wàrɩ̀ ba kʋ joŋə, kʋ ma wàrɩ̀ ba kʋ saŋa,
yá kʋ dàń wá ya cavɩra də fʋfʋlɩ, kʋ pa ba.
Lɩ̀à tə nə vəli sə ba yə̀ sáŋʋ́ Ezwipətə tɩ̀án con
6 Yɩɩ sʋgʋ tə nə zɩga Negɛbə nagwanaa vàná tə nə:
Ba zɩŋa ba jɩjə wiən bɩ̀nɛ̀ taŋa wa,
ba ga goli ba wiən tə, tə kwənə nə dáá,
nyʋgʋmɛ taŋa kulu nə,
ba ja twá tɩa wa,
ka nə yɩ jɩgwarʋ də twara bwálɩ́,
gəbɩran də gəkana nə wulə lá,
kʋ ga yɩ bancanan də tɩdən tə nə piri bwálɩ́,
ba vələ sə ba pa dwíí nə,
kʋ nə bá ja sáŋʋ́ mama kʋ pa ba!
7 Cɩ́gá, Ezwipətə sáŋʋ́ yɩ tʋtʋ,
kʋ ba nywarɩ jə.
Kʋ mʋ̀ nə pɩn à dɩ lʋʋ nii təntə yɩrɩ,
«Rahavə, mʋʋ wojijiru tə kʋ nə ba won mama tʋŋa.»
Dwíí tə kʋ zɩɩn nə ba sʋgʋ nə̀ń
8 Ba-Yígúrə́-Jə-Tiu kʋ́ʋ̀ swɩ̀n Ezayi con, ʋ wʋ́:
«Sɩ́ʋ́n nə, n dàń bà, n pʋ́pʋ́nɩ́ yìə̀n tə tə,
Zwerizalɛmə tɩ̀án yáá con, daborubiə yuu,
n ga bɩ̀rɩ̀ tə n tún sagɩ wa,
sə tə ya dansɩa won, máŋá də máŋá mama wuuu,
máŋá tə wa ka nə bɩ̀àn.»
9 Cɩ́gá, ba yɩ dwíí tə ba nə vɩ nii,
ba yɩ bɩ̀á tə ba nə yɩ níə́ bələ tɩ̀án,
ba yɩ bɩ̀á tə ba nə ba pɩ̀à sə ba cʋgʋ
Ba-Yígúrə́-Jə-Tiu nii yìə̀n tə.
10 Ba swɩ̀n Yɩɩ yinara con, ba wʋ́:
«Á kʋ́ʋ̀ dànà ká na yìə̀n nɩʋn wa!»
Ba ga swɩ̀n Yɩɩ nii sʋ̀sʋ̀nà con, ba wʋ́:
«Á dànà ká swɩ̀n yìə̀n tə nə yɩ cɩ́gá nə con,
á swɩan yìə̀n tə nə poli pùə́, á bɩrɩ nəba,
tə nə swə tə yɩ kʋ̀nkʋ̀n də!
11 Á vivirə á yá cɩ́gá cwəŋə,
á dʋga cwəŋə nəzəŋu tə,
á yágá Yɩzərayɛlə lɩ̀à Yɩɩ tə nə yɩ parɩ* yoo nə, nə yáá con!»
Tʋrɩ tə nə ba tɩ̀ʋ́ jə
12 Kʋ mʋ̀ nə pɩn,
Yɩzərayɛlə lɩ̀à Yɩɩ tə nə yɩ parɩ swɩ̀n, ʋ wʋ́:
«Á vɩga sʋgʋ təntə,
á ga pìí á jələ fɩfɩan də gɩgɩra yuu wa,
sə á ma na sáŋʋ́.
Kʋ mʋ̀ yɩrɩ,
13 yolwan təntə wá ya ndə luloo nə,
biritaŋʋ yɩra, kʋ yuu nə dara yɩɩ nə,
kʋ nə wàlɩ̀ wuuu, kʋ jə vələ máŋá tə,
bərətaŋʋ tə nə wá buburi duən yuu, naa nədʋ.
14 Kʋ wá pʋpʋgʋ, ndə nəkənmarʋ wùrú nə,
ba nə pʋpʋgʋ, ba wà kukwən,
yá cucoo wàrɩ̀ kʋ kɩkaran tə wa kʋ nɩ,
sə ba ma tùŋə̀ mən kúrə́ wa,
nə à yə̀ə́ sə ba ma kwaŋa nɩ́á, nɩ́á gwàlʋ́* wa.
Ka jələ Yɩɩ yuu wa nə joŋə lìù
15 Cɩ́gá, nəŋə kʋ tə Yuu-Tiu Ba-Yígúrə́-Jə-Tiu,
Yɩzərayɛlə lɩ̀à Yɩɩ tə nə yɩ parɩ, nə swɩ̀n:
Kʋ yɩ á nə pìí á bà à con,
á ga yá á sìí nə, à wá jon aba.
Kʋ yɩ á nə yá á tɩ̀àn à jɩɩn wa sənbwen,
á ga jələ à yuu wa nə, á wá na dɩ̀àn.
Yá á wà kʋ nətʋ tə sɛ̀!
16 Á swɩ̀n á wʋ́: «Ɔn ɔn!
Nə wá dəri də səsən!»
Kʋ mʋ̀ nə pɩn á cɩ́gá wá dəri.
Á swɩ̀n á súrí lá, á wʋ́:
«Nə wá dɩ̀ səsen yuu, tə nə dəri lala!»
Kʋ mʋ̀ nə pɩn, lɩ̀à tə nə wá dɩŋɩ á kwa,
wá dəri lala, ba doni aba.
17 Dʋŋa tə ləzwəndʋa bagʋ wá pa,
á lɩ̀à mʋ̀rʋ̀ dəri,
yá ba lɩ̀à bonu bagʋ wá pa,
á mama dəri á jɛ́n.
Á gɩganɩ tə wá ya ndə yoŋi nə,
ba nə cwɛn paan yupara wa,
nə à yə̀ə́ ndə kʋ̀ʋ̀ mɩmɩnʋ nə,
dədolu yuu wa.
Máŋá bɩ̀àn Yɩɩ nə wá jon ʋ lɩ̀à tə
18 Kʋ mʋ̀ nə pɩn Ba-Yígúrə́-Jə-Tiu dànɩ̀,
sə ʋ fwa pubwanʋ á yɩra,
yá ʋ wá bɩrɩ də ʋ dəri á yinəgə.
Cɩ́gá, Ba-Yígúrə́-Jə-Tiu yɩ Yɩɩ tə,
ʋ nə bʋ̀rɩ̀ bʋra, kʋ twá cɩ́gá nə,
ndə kʋ nə mɛ nətʋ.
Pupwən lɩ̀à nə yɩ lɩ̀à tə mama,
ba nə ken ba waa ʋ nə!
19 Á mʋ̀ Siyon* tɩ̀án-ba,
á mʋ̀ Zwerizalɛmə tɩ̀án-ba,
á kʋ́ʋ̀ bá kwi!
Á nə bubwi á kə Ba-Yígúrə́-Jə-Tiu nə,
ʋ wá fwa pubwanʋ á yɩra.
Ʋ nə nì á kori, ʋ wá le aba.
20 Yuu-Tiu wá pa aba wodiu jɩgwarʋ máŋá wa,
ʋ ga pa aba nɩ́á fɩfɩan máŋá wa.
Á karnyɩna tə kʋ́ʋ̀ bá səgə á yáá nə,
á wá na wá də á yɩ́á, nəpon nəpon.
21 Máŋá tə á nə mɛ sə á va jɩgwiə,
nə à yə̀ə́ jɩzən,
á wá nì sʋgʋ kʋ tə á zɩan wa,
kʋ swɩ̀n, kʋ wʋ́:
«Nə̀ń cwəŋə tə, á nə mɛ sə á tì!»
22 Á wá jələ wárʋ́ tə,
ba nə ma nàn á woŋwanan tə ba nə sə̀,
də sɩ́án tə, ba nə ma mwàlɩ̀ á woŋwanan tə,
ba nə nyɩan lugu ba ma fwa,
ndə durən wiən nə.
Á mɛ sə á dɩlɩ tə á dʋgʋ,
ndə durən wiən nə,
á ga swɩ̀n tə con, á wʋ́:
«Naŋa bwálɩ́ kʋ tə wa!»
23 Ba-Yígúrə́-Jə-Tiu wá pa
dwà nà wodwii tə yuu wa,
á nə wá dù á kə tɩa,
yá wodiu tə tɩa tə nə wá lənə,
wá ya wodizəŋu, kʋ nə kʋ̀nɩ̀ lɩ̀à.
Kʋ máŋá tə wa, á vàná wá va tə də́ gaʋ,
vàná gaʋ tɩɩ wa, tə nə wala.
24 Nɩan tə də bɩnɛ tə nə varɩ tɩa tə,
wá də́ wopulə tə nə jə nəkuə,
ba nə cə̀rì də fɩyaʋ də zʋbiri.
25 Lagʋrɩ nəfarʋ tə dɩɩn nə,
máŋá tə wa dəyuu dìì nədaran tə nə wá tʋ,
nàgwàlán fìrə̀n də nacoŋi wá pàlɩ̀,
paan nədarʋ mama yuu wa,
də dədolu nədarʋ mama yuu wa.
26 Máŋá tə wa Ba-Yígúrə́-Jə-Tiu
nə wá ywarɩ ʋ lɩ̀à tə nʋran tə, ʋ pa tə zuri,
cànà poni wá jì ndə yɩcaʋ poni nə,
yá yɩcaʋ poni wá súrí nɛɛ barpɛ,
ndə dɩan barpɛ poni nə.
Ba-Yígúrə́-Jə-Tiu bɩ̀àn Asiiri tɩ̀án nə
27 Nə̀ń, Ba-Yígúrə́-Jə-Tiu naŋa yiŋʋnɩ ʋ bɩ̀àn!
Ʋ lɩŋa zàn tə pupwin,
ʋ nii súə́ də lɩŋa sʋ̀ràn,
yá ʋ nəndəli yɩ ndə mənvwə nə kwé kə̀lə̀kə̀lə̀.
28 Ʋ siŋu yɩ ndə nacoru nə súə́ kʋ pàlɩ̀,
yá kʋ nɩ́á tə dɩ̀ tə yí bɩan.
Ʋ wá liləgə dwíə́ nəkaran* tə,
də cʋcʋran mun liləgu,
ʋ ga kə kwiən lʋʋ dwíə́ tə nipaa wa,
kʋ nə wá dʋgʋ ba.
29 Á wá nun gwaran, ndə cànà diŋə dɩɩn tɩtɩn nə, yá á waa wá ya ywánɩ́, ndə lìù nə twá wii kwərə nə, ʋ ma vəli, á ja va Ba-Yígúrə́-Jə-Tiu paan tə yuu wa, Yɩɩ tə con, ʋ nə yɩ Yɩzərayɛlə lɩ̀à pɩ̀ʋ̀.
30 Ba-Yígúrə́-Jə-Tiu wá pa
ba nì ʋ kori tə nə baa,
ʋ wá bɩrɩ ʋ vàn tə nə mà
də lɩŋa tə nə fʋrɩ,
də mənvwə ka nə kwé kə̀lə̀kə̀lə̀,
də dwà ka nə nɛ̀ də dɩ̀àn,
də dwakafɩna tə nə fɩrɩ də dɩ̀àn.
31 Yá Asiiri tɩ̀án nə wá nì Ba-Yígúrə́-Jə-Tiu kori,
Ba-Yígúrə́-Jə-Tiu nə wá mà ba
də ʋ dangolu tə, fən wá gən ba.
32 Gungwɛn də banan kwərə nə wá kwé dangolu yii mama, Ba-Yígúrə́-Jə-Tiu nə wá mà ba. Ʋ wá zɩ̀n ʋ jɩɩn ba yuu wa, ʋ ta ʋ zɩgɩ ba nə.
33 Mən bwálɩ́ tanɩ fuən mama,
ba tanɩ kʋ Asiiri pɩ̀ʋ́ tə də yɩrɩ.
Kʋ yɩ bʋʋ kʋ də̀ń nə lu, kʋ ga wala,
dɛ̀ɛ̀ də mən nə súə́ kʋ nii.
Ba-Yígúrə́-Jə-Tiu siŋu tə wá dɩ mən kʋ nə,
ndə jiribu mən nacoru nə.