Yɩɩ jon Zwerizalɛmə tɩ̀án
29
1 Nə̀ń kʋ lɛɛ nyɩɛn, kʋ pa Ariyɛlə nə,Ariyɛlə, kʋ mʋ̀ Zwerizalɛmə sadiyuu tə,
Davidə nə púə́ ʋ kə də kʋ̀ʋ̀!
Bɩnɩ mama, á nə swə á də́ cànɩ̀ tə mama
tə máŋá wa, ndə kʋ nə mɛ nətʋ,
á ba cànà nədʋ tətə yá á pɩn ka kɛ̀ń,
2 à tə wá fɩfɩn Ariyɛlə.
Ŋʋŋwɩa də kwirə wá ya lá,
yá kʋ cɩ́gá wá ya ndə joŋi bwálɩ́a nə, kʋ pa nə.
3 À wá kə à kwatara sàń à ja kɩkarɩ mʋ́,
yá à wá zɩgɩ kwatara, à pa ba pú mʋ́ ba kə,
à ga lwà kukurə nacana, à zɩgɩ n biritaŋʋ tə nə,
à ma pú mʋ́ à kə də kʋ̀ʋ̀.
4 N wá tʋ tɩa mɩ́ámɩ́án,
yá tɩa pùrú tə də̀ń nə ba wá nì n kori,
n sʋ̀ràn nə wá ya tɩa, tə doni tɩa pùrú yɩrɩ.
N kori wá nan tɩa tə də̀ń nə, ndə ciru kori nə,
yá tɩa pùrú tə wa nə, n wá sʋsʋnɩ n sʋ̀ràn.
5 N dʋŋa kapʋpʋ tə wá ya ndə pùrú bʋ́á nə,
wʋlʋnyɩna kapʋpʋ təntə wá ya ndə
gakʋrʋ nə, vʋʋ nə jànɩ̀,
yá kʋ nətʋ tə wá tʋn naa nədʋ,
ndə yii nə púə́ kʋ ga súrí nə.
6 Ba-Yígúrə́-Jə-Tiu, ʋ nə yɩ kwatara Yɩɩ
wá bà ʋ jon mʋ́ də dwà bagʋ,
də tɩa vuvugu, də zizigu nəfarʋ,
də kùlì, də dwavʋʋ,
də mənvwə ka nə kwé kə̀lə̀kə̀lə̀.
7 Lʋʋ dwíə́ kapʋpʋ tə mama,
ba nə wá ta kʋ̀ʋ̀ ba zɩgɩ Ariyɛlə nə,
də ba tə mama, ba nə wá ta Ariyɛlə,
də kʋ dɩ̀àn dəkuu tə, sə ba cʋ̀gʋ̀ kʋ,
wá jɛ́n ndə pandwɩa nə,
nə à yə̀ə́ ndə tɩtɩn nɩʋn nə.
8 N nə yə̀ə́ lìù tə niən nə jə,
nə dwɛ̀ pandwɩa, də ʋ wulə wodiu ʋ də́,
yá ʋ súrí ʋ yɩ́á, ʋ na də won tə̀lə́ ʋ pùə́ wa,
nə à yə̀ə́ ndə lìù tə nanyʋnɩ nə jə,
nə dwɛ̀ pandwɩa, də ʋ wulə nɩ́á ʋ nywɩn,
yá ʋ súrí ʋ yɩ́á, ʋ na də nanyʋnɩ tə jə wá, ʋ ga gwàrɩ̀,
mə kʋ wá ya nətʋ,
kʋ pa lʋʋ dwíə́ kapʋpʋ tə mama nə,
ba nə wá ta ba zɩgɩ Siyon paan tə nə.
Lalʋʋ tə kʋ nə ba yoo də̀ń nə̀ń
9 Á pɩan kʋ dɩ̀ á yuu, kʋ kələ aba!
Á pwíə́ á yɩ́á, á jì lilirən!
Á bʋbʋna, yá á wà divɛn nywɩn.
Á tətələ, yá á wà sana tə nə dà nywɩn.
10 Cɩ́gá, Ba-Yígúrə́-Jə-Tiu pɩn á pubʋŋa dwɛ̀.
Ʋ púə́ á yɩ́á nə, á mʋ̀ Yɩɩ nii sʋ̀sʋ̀nà tə.
Ʋ púə́ won á yuu nə, á mʋ̀ Yɩɩ yinara tə.
11 Yosəgu tə nə wulə nɩʋn kʋ tə mama wa, yɩ ndə ba nə pʋ́pʋ́nɩ́ yìə̀n ba kə sagɩ wa, ba koni kʋ nii, yá ba tì ba pa lìù nə, ʋ nə wàá ʋ kàrɩ̀, ba ga swɩ̀n ʋ con, ba wʋ́: «À lòrì sə n kàrɩ̀ kʋ!» Yá ʋ le, ʋ wʋ́: «À wàrɩ̀, sagɩ tə nii koni!» 12 Kʋ tə yɩ ndə ba nə pɩn sagɩ tə lìù nə, ʋ nə yəri kàrà, ba ga swɩ̀n ʋ con, ba wʋ́: «À lòrì sə n kàrɩ̀ kʋ!» Yá ʋ le, ʋ wʋ́: «À yəri kàrà!»
Yìə̀n tə nə dɩ̀ yuu wà zwɛ̀
13 Yuu-Tiu swɩ̀n, ʋ wʋ́:
«Lalʋʋ kʋ tə nə yí à yɩra,
ba yàá pɩn nə dun də ba nii sʋ̀ràn cɩcɩ,
yá ba bɩcanɩ ga ŋʋ́ná də nə.
Ba nə dəri à fən tə yɩ ləzoni yofwamɩnan,
ba nə pɩn nii tə yuu wa, sə ba twá tə nə.
14 Kʋ mʋ̀ nə pɩn,
à tə wá tʋn yogwaran də yomɩlan kapʋpʋ,
à ma kələ lalʋʋ kʋ tə.
Wʋbʋnyɩna wʋbʋŋa wá jɛ́n,
yá pubʋnyɩna pubʋŋa wá dəri ka səgə.»
15 Nə̀ń kʋ lɛɛ nyɩɛn, kʋ pa lɩ̀à tə nə,
ba nə səgə yiŋʋnɩ, Ba-Yígúrə́-Jə-Tiu yáá nə,
ba ma tʋŋa ba yìə̀n!
Ba tʋŋa ba tʋ̀tʋ̀nán tə yikunu wa,
ba ga swɩ̀n, ba wʋ́:
«Wàà nə na nəba?
Wàà nə yə̀ə́ kʋ tə nə nə tʋŋa?»
16 Á dwá á tɩ̀àn tamʋ!
Kʋ mɛ sə ba jələ nəkənmarʋ ndə daʋ nə naaa?
Won tə lìù nə fwa,
wàá lìù tə nə fwa kʋ con kʋ swɩ̀n,
də ʋ mʋ̀ nə wà kʋ fwa naaa?
Nəkənə wàá ka nəkənmarʋ con ka swɩ̀n,
də ʋ ba ʋ tʋtʋŋɩ tə yənu jə naaa?
17 Á yəri də máŋá mancɩn wa,
Liban pún tə wá lwàń kʋ jì tɩ̀án kárá,
yá ba jələ tɩ̀án kárá ndə pún nə naaa?
18 Kʋ máŋá tə wa,
zɩbʋŋa zɩan wá nì sagɩ tə wa sʋ̀ràn tə,
yá lilirən yɩ́á wá na lá,
ba ga nan tɩtɩn də yikunu wa.
19 Lɩ̀à tə nə muŋə ba tɩ̀àn
pupwən wá súrí wuuu, Ba-Yígúrə́-Jə-Tiu con,
yá ləzoni wa lalaŋa tə wá jwɛ,
Yɩzərayɛlə lɩ̀à Yɩɩ tə yɩrɩ, ʋ nə yɩ parɩ*.
20 Cɩ́gá, lìù tə nə tʋŋa dɩ̀àn lɩ̀à yɩra kʋ́ʋ̀ bá ya lá,
yá yigwənyiən də wá jɛ́n.
Lɩ̀à tə mama nə swə yolwan fwaŋʋ wá nyʋn lá.
21 Ba yɩ lɩ̀à tə, ba nə yàá kʋ̀nà kʋ̀nkʋ̀n,
ba kəni lìù nii nə, sə bʋra ja wá.
Ba yàá dwɛ́ lìù tə nə bʋ̀rɩ̀ bʋra, tɩʋ tə mimii nə,
yá ba pɩn cɩ́gá tíú kwɩ̀n cɩ́gá nə.
22 Kʋ mʋ̀ nə pɩn Ba-Yígúrə́-Jə-Tiu,
Abərahamə jonu tə swɩ̀n
Zwakɔbə dwíí tə con, ʋ wʋ́:
«Sɩ́ʋ́n nə, cavɩra kʋ́ʋ̀ bá ja Zwakɔbə dwíí tə,
yá ba yáá kʋ́ʋ̀ bá cʋ̀gʋ̀.
23 Cɩ́gá, máŋá tə ba bɩ̀á nə wá na
à jɩɩn tʋ̀tʋ̀nán tə ba titəŋi wa,
ba wá lwarɩ də à yɩrɩ tə yɩ parɩ,
ba wá lwarɩ də Zwakɔbə Yɩɩ tə yɩ parɩ,
yá ba wá dəri à mʋ̀, Yɩzərayɛlə lɩ̀à Yɩɩ tə fən.
24 Lɩ̀à tə ba pubʋŋa yà nə gugurə, wá pìí ba ja pubʋŋa,
yá ba tə yà nə ŋʋŋwɩn, dàń wá sɛ̀ bɩra.