Dwavʋʋ tə nə wá cʋ̀gʋ̀ Samari tɩʋ tə
28
1 Nə̀ń kʋ lɛɛ nyɩɛn, kʋ pa Efərayimə dwíí təsanyʋra fwiə payupuua tə nə!
Nə̀ń kʋ lɛɛ nyɩɛn, kʋ pa tɩʋ tə nə,
kʋ nə nyən ndə pùní nə, kʋ nə pɩ̀nɩ̀,
ba nə ma nàn kʋ də dun,
ba tún vara tə ka tɩa nə ywàń yuu con!
Nə̀ń kʋ lɛɛ nyɩɛn, kʋ pa lɩ̀à tə nə,
divɛn nə bʋbʋnɩ ba!
2 Nə̀ń, Yuu-Tiu tʋn bɛɛ,
ʋ nə jə dɩ̀àn də wʋdɩʋ,
ʋ pa ʋ bɩ̀àn!
Ʋ yɩ ndə dwà nə nɩ̀ dwakafɩna,
də dwavʋʋ nəfarʋ kʋ ma cʋ̀gà wiən.
Ʋ yɩ ndə dwafarʋ nə curi nɩ́á tɩa yuu wa:
Ʋ wá ja ʋ jɩɩn, ʋ ma mà tɩʋ təntə
ʋ lwá tɩa, də dɩ̀àn.
3 Ba wá nɩŋa kʋ də nɛɛ,
kʋ mʋ̀ Efərayimə dwíí sanyʋra fwiə payupuu tə.
4 Yá kʋ pùní tə nə pɩ̀nɩ̀,
ba nə ma nàn kʋ də dun,
ba tún vara tə ka tɩa nə ywàń yuu con,
wá jì ndə kapɩrɩ nə, ba nə nɩ də kʋ bɩga,
də kapɩra bɩʋ máŋá tə wà yí:
Kʋ tàà zʋa lìù jɩɩn,
lala də ʋ dɩlɩ kʋ ʋ nii.
5 Kʋ máŋá tə wa, Ba-Yígúrə́-Jə-Tiu, ʋ nə yɩ kwatara Yɩɩ wá ya ʋ lɩ̀à tə gɩganɩ tə dun payupuu, də ba dun wonanʋ. 6 Ʋ wá ya cɩ́gá cwəŋə siŋu, ʋ pa lìù tə nə, ʋ nə jə̀ə́ sə ʋ bʋ̀rɩ̀ bʋra, ʋ pa ka twá cɩ́gá cwəŋə nə. Yá ʋ wá ya babarɩ, ʋ pa kwatara tə nə, ba nə dɩŋɩ dʋŋa, ba ja vəli ba dʋga ba tɩʋ mimii nə.
Sanyʋra pwɛ́ Yɩɩ nii sʋ̀sʋ̀nʋ̀ tə
7 Yá nə̀ń Yɩɩ joŋwana tə,
də Yɩɩ nii sʋ̀sʋ̀nà tə də nə,
divɛn viviə ba,
yá sana tə nə dà pɩn ba jwə̀rí.
Divɛn nyɩn ba,
yá sana tə nə dà jwə̀rí ba.
Ba viviə nɩʋn tə wa, Yɩɩ nə bɩrɩ ba,
ba jwə̀rí ba bʋra tə bʋrʋ wa.
8 Tabɩlan tə mama yuu súə́ də tʋtʋnan,
də durən tɩa mama,
bwálɩ́ nəzəŋu mama kʋ́ʋ̀ tə̀lə́.
9 Ba yàá bwe, ba wʋ́:
«Wàà nə Ezayi pɩ̀à sə ʋ kàrɩ̀ yənu?
Wàà nə ʋ pɩ̀à sə ʋ pa ʋ lwarɩ yoo də̀ń?
Kʋ yɩ bìsɩ́ná ba nə lɩ yɩlɩ nə sɩ́ʋ́n sɩ́ʋ́n naaa?
Kʋ yɩ bìsɩ́ná ba nə dʋgʋ ba nuu yɩlɩ sɩ́ʋ́n sɩ́ʋ́n naaa?
10 Kʋ yɩ níə́ nə pɩn tə dɛ̀ duən yuu,
coŋi nə túŋə́ tə pàlɩ́ duən yuu,
bʋrabʋra tɩa mama!»
11 Kʋ ziən, kʋ wá twá də kʋkwɛ nii,
də nəndəli sʋgʋ yiri don,
Ba-Yígúrə́-Jə-Tiu ma swɩ̀n lalʋʋ kʋ tə con.
12 Ʋ yà dí yáá ʋ swɩ̀n ba con, ʋ wʋ́:
«Nəŋə sìə́ bwálɩ́ nə!
Á yágá sə lɩ̀à tə nə gwàrɩ̀ pə̀ń lá ba sìí.
Kʋ yɩ yazurə bwálɩ́!»
Yá ba wà lá tan.
13 Kʋ mʋ̀ yɩrɩ,
Ba-Yígúrə́-Jə-Tiu də wá swɩ̀n ba con
də sʋgʋ kʋ nə yɩ,
níə́ nə pɩn tə dɛ̀ duən yuu,
də coŋi tə nə túŋə́ tə pàlɩ́ duən yuu,
bʋrabʋra tɩa mama.
Kʋ nətʋ wá pa ba nə vəli,
ba wá mà ba nɛɛ,
ba tʋ ba kwa yara, ba yarɩ,
yá ba wá tʋ nyalɩ wa,
ba pa ba dʋŋa nə ba ja.
Dìə̀ nigwancɩn wárɩ́
14 Kʋ mʋ̀ yɩrɩ, á dàń cʋga
Ba-Yígúrə́-Jə-Tiu nii sʋgʋ,
á mʋ̀ bɩyɩrɩdərə tə nə də́ dɩ̀àn
Zwerizalɛmə lalʋʋ tə yuu wa!
15 Á swɩ̀n, á wʋ́:
«Nə də tɩan tún nimarʋ,
nə də ciru* kàn nii nə pa duən nə.
Máŋá tə yojanʋ nəfarʋ nə twi,
kʋ bá yí nəba.
Cɩ́gá, gɩgɩra yɩ nə yuu yikwala bwálɩ́,
kʋ̀nkʋ̀n ga yɩ nə yisəgə bwálɩ́.»
16 Kʋ mʋ̀ nə pɩn, nəŋə kʋ tə,
Yuu-Tiu Ba-Yígúrə́-Jə-Tiu nə swɩ̀n, ʋ wʋ́:
«À tún dìə̀ dəkuu kapan Siyon tɩʋ tə wa,
kʋ yɩ dìə̀ nigwancɩn kapan, kʋ nə dà,
kʋ ga tígə́, kʋ dəkuu zʋ tɩa zəni.
Lìù tə ʋ nə nyɩ́n kʋ yuu wa,
fən bá ja wá, kʋ pa ʋ dəri.
17 À tún cɩ́gá cwəŋə,
sə ka ya ndə dìlòrú ŋwənə nə,
ʋ nə ma maŋa wiən dànɩ̀,
à ga tún ka mənəmənə,
sə kʋ ya ndə dìlòrú won nə,
ʋ nə ma túŋə́ wiən tə mɛ duən.
Yá dwakafɩna wá jàn kʋkʋn yuu yikwala bwálɩ́ tə,
nɩ́á ga piri yisəgə bwálɩ́ mama yuu nə.
18 Yá á də tɩan nimarʋ tə dàń wá cʋ̀gʋ̀,
á də ciru nikanɩ tə kʋ́ʋ̀ bá ya lá.
Máŋá tə yojanʋ nəfarʋ tə nə wá bà,
kʋ wá tɩtaga aba kʋ nɛɛ də̀ń.
19 Máŋá mama kʋ nə twi, kʋ wá ja aba. Cɩ́gá, kʋ wá bà jɩjʋ mama, də yɩcaʋ mama, də tɩtɩn mama. Yá kʋ zizigu cɩcɩ wá pa fən gən aba.
20 Gədo wá ya kukuə,
sə lìù tɩn ʋ tɩ̀àn kʋ yuu wa,
yá gansara wá ya pɩpɩan,
sə lìù piri ka.
21 Cɩ́gá, Ba-Yígúrə́-Jə-Tiu wá zàn,
ndə ʋ nə zàn Perasiməb paan tə yuu wa nətʋ,
ʋ wá pupwin də lɩŋa,
ndə ʋ nə pupwin də lɩŋa nətʋ,
Gabawonc vara tə wa,
sə ʋ ma tʋn ʋ tʋtʋnaa tə,
ʋ tʋtʋnaa tə lìù mama nə yəri,
sə ʋ ma tʋn ʋ tʋtʋŋɩ tə, ʋ pa kʋ nii sú,
ʋ tʋtʋŋɩ tə lìù nə wà dí yáá ʋ nì kʋ yoo.
22 Sɩ́ʋ́n nə, á dànà ká də́ bɩyɩrɩ, kʋ nə tà nətʋ, ba wá van ŋoni tə nə vwə aba, ba pa tə kwɛn tə ja. Cɩ́gá, lʋʋ nii tə mama cʋna sírí ken kʋ zwɛ̀. Yuu-Tiu Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n kʋ à con.
Valʋ wʋbʋŋa də Yɩɩ wʋbʋŋa
23 Á gunə á zɩan, á cʋgʋ à kori!
Á zurə á yɩra, á cʋgʋ à sʋgʋ zəni!
24 Lìù nə vàrɩ̀ sə ʋ dù,
yɩ ʋ yàá vàrà wuuu naaa?
Kʋ yɩ ʋ yàá bɩ̀rɩ̀ gwàlán, ʋ kárá tə wa,
də ʋ mà tɩran kukulə, ʋ lwe wuuu naaa?
25 Kʋ tà ʋ yàá dí yáá ʋ kwɛn tɩa tə,
ʋ pa ka mɛ duən, ʋ zwɛ̀,
ʋ dàń ga zɩgɩ lá ʋ dù lacɛɛ bɩ̀á,
ʋ ga mɩ́n nyanswalʋ bɩ̀á,
ʋ dù dipɛn mɩna tə fwee fwee,
ʋ ga kúrí bwálɩ́ don,
ʋ ma dù dipɛn mɩna yiri don,
yá ʋ dù dipɛn mɩna yiri tə kʋ nə dà,
ʋ ma kɩkarɩ kárá tə naaa?
26 Ʋ Yɩɩ tə nə bɩrɩ wá, sə ʋ tʋn nətʋ,
ʋ mʋ̀ nə pɩn wá kwìə̀, kʋ nətʋ tə yuu wa.
27 Ba ba lacɛɛ bɩ̀á lwaga də lugu màlɩ́,
ba ma ba nyanswalʋ nɩŋɩ də lugu kòrù nɛɛ.
Yá lacɛɛ bɩ̀á dàń nə yɩ ba mà də daʋ,
ba ga mà nyanswalʋ də dafɩla.
28 Kʋ yɩ cɩ́gá, ba yàá gà dipɛn mɩna,
ba ma fwa dipɛn,
yá kʋ dàń nə tà ba yàá mà tə wuuu, kʋ ba zwɛ̀.
Ba yàá yigu səsen də tə kòrù,
ba kə dipɛn mɩna wa, sə tə lwaga tə,
yá tə dàń nə ba tə nɩŋɩ tə lwe.
29 Kʋ nətʋ də yɩ kʋ nan Ba-Yígúrə́-Jə-Tiu,
ʋ nə yɩ kwatara Yɩɩ con.
Ʋ kwìə̀ jə fɩra,
ʋ wʋbʋŋa ga dáá zənzən!