Yɩɩ wá də́ dɩ̀àn mʋʋ wojijiru* tə yuu wa
27
1 Kʋ máŋá tə wa, Ba-Yígúrə́-Jə-Tiu wá tì ʋ sɩ̀ʋ́ nəfarʋ tə, kʋ nə jə dɩ̀àn, kʋ ga jə nii, ʋ ja zɩgɩ mʋʋ wojijiru* tə nə, kʋ mʋ̀ dən tə nə dəri lala. Ʋ wá zɩgɩ mʋʋ tɩdən təntə nə, kʋ nə yɩ dən gugolu, yá ʋ wá gʋ kʋ mʋ̀ wojijiru təntə, kʋ nə wulə mʋʋ wa.Ba-Yígúrə́-Jə-Tiu də ʋ divɛn tɩ̀án kárá tə yoo
2 Á dɩa gwaran kʋ dɩɩn tə nə,
divɛn tɩ̀án kárá tə yɩrɩ,
ka divɛn nə ywán, á nun, á wʋ́:
3 «À mʋ̀ Ba-Yígúrə́-Jə-Tiu nə cɩ̀ ka nə,
à ga gàrɩ̀ ka nə máŋá mama.
À cɩ̀ ka nə tɩtɩn də yɩcaʋ,
sə ba dàn ká cʋ̀gʋ̀ ka.
4 Lɩŋa tə̀lə́ à bɩcan wa.
Yá à nə nɩ casʋran də gəlu ka wa,
à wá va à mùrí tə mama, à sʋ̀rɩ́ mən wa.
5 Tə nə pɩ̀à yazurə,
sə tə kwálɩ́ tə yuu à con,
yá sìə́ wá ya à də tə pwə́rə́ wa,
à də tə pwə́rə́ wa, sìə́ wá ya lá!»
Yɩɩ kwɛn Yɩzərayɛlə lɩ̀à cʋna ʋ lɩ
6 Máŋá wa ka nə bɩ̀àn,
Zwakɔbə dwíí tə wá pɛ́n ŋʋnan,
Yɩzərayɛlə dwíí tə wá twà vʋran,
ba mà pùnə́,
yá ba bɩ̀á wá sú lʋʋ mama.
7 Ba-Yígúrə́-Jə-Tiu mà ʋ lɩ̀à tə,
ndə ʋ nə mà lɩ̀à tə yà nə mà ba nətʋ naaa?
Ʋ gʋa ʋ lɩ̀à tə, ndə ʋ nə gʋa lɩ̀à tə
yà nə gwɩ ba nətʋ naaa?
8 Ʋ bʋ̀rɩ̀ ba bʋra də ʋ bʋŋa,
ʋ ga yigu ba ʋ lɩ, ʋ dʋgʋ,
Ʋ ja ʋ vʋʋ tə nə jə dɩ̀àn, ʋ dɩŋa ba ʋ lɩ,
yɩɩ yipɩan con vʋʋa fulu dɩɩn nə.
9 Mə kʋ twá nətʋ,
Yɩɩ ma kwɛn Zwakɔbə dwíí tə cʋna ʋ lɩ,
yá dàń nəŋə kʋ tə
ba cʋna kwɩan tə nə wá ja bà:
Ba wá pʋpʋgʋ joŋi bwálá tə kapana tə mama,
ba pa tə jì mun ndə pùrú nə,
yá ba kʋ́ʋ̀ bá zɩ̀n woŋwanʋ Aswera* daceli tə,
də wusinə nəvwe tə, ba zɩgɩ yɩɩ nə lá nə.
10 Cɩ́gá, lìù kʋ́ʋ̀ tə̀lə́ dɩ̀àn dəkuu bwálɩ́ tɩʋ tə wa,
kʋ jìgə̀ bwálɩ́ ba nə vɩga ba dʋgʋ,
ndə kasɔɔ lanworu nə.
Mə lá nə nabii twi tə dɩŋɩ gaʋ,
də tə pəni tə sìí,
tə ga də́ tunə vʋran tə zwɛ̀.
11 Tɩ̀ʋ́ nɛɛ nə kʋa, ba yàá kɛ́n tə,
yá kana yàá ja tə ba kə mən.
Cɩ́gá, lalʋʋ təntə ba pubʋŋa jə.
Kʋ mʋ̀ nə pɩn Yɩɩ tə ʋ nə fwa ba,
ba ba yinəgə dəri,
Yɩɩ tə ʋ nə ma ba,
ba pubwanʋ tʋŋa ba yɩra.
Lɩ̀à tə ba nə ja va yongaʋ túrí yoo
12 Kʋ máŋá tə wa,
Ba-Yígúrə́-Jə-Tiu wá sì tɩ̀án tə,
kʋ nə zɩgɩ Əfəratə mʋnaa tə nə,
kʋ va kʋ yí Ezwipətə nacoru tə,
yá ʋ wá twɩn aba tɩa nədʋ nədʋ,
Yɩzərayɛlə lɩ̀à-ba!
13 Kʋ dɩɩn tə nə, ba wá wúrí nabwanvunu,
yá ba tə yà nə jɛ́n Asiiri lʋʋ nii wa,
də ba tə yà nə laga duən yáá nə,
Ezwipətə lʋʋ nii wa, dàń wá pìí ba bà.
Ba wá tʋ ba nadwana yuu,
Ba-Yígúrə́-Jə-Tiu yáá con, ba pa wá dun,
ʋ paan tə yuu wa, Zwerizalɛmə wa.