Dɩ̀àn dəkuu bwálɩ́ tɩʋ
26
1 Kʋ máŋá tə wa, ba wá nun nuŋə ka tə,Zwida lʋʋ nii tə wa, ba wʋ́:
«Nə jə dɩ̀àn dəkuu bwálɩ́ tɩʋ!
Yɩɩ tətə nə cɩ̀ nə nə,
ndə waa con biritaŋʋ,
də kàrá con biritaŋʋ nə.
2 Á súrə́ mimiən,
á yágá á pa lʋʋ dwíí tə
nə wulə cɩ́gá cwəŋə wa,
ba ga yɩ pùə́ nədʋ tɩ̀án zʋ!
3 N mʋ̀ Ba-Yígúrə́-Jə-Tiu pɩn sìə́,
n pɩn bɩcan sìə́ lɩ̀à tə nə,
ba bɩcan nə yɩ nədʋ,
ba nə ken ba waa n nə yɩrɩ.
4 Á kənə á waa Ba-Yígúrə́-Jə-Tiu nə,
máŋá mama wuuu.
Cɩ́gá, Ba-Yígúrə́-Jə-Tiu, Ba-Yígúrə́-Jə-Tiu
nə yɩ pɩ̀ʋ̀ tə nə wulə, máŋá mama wuuu.
5 Ʋ yigu lɩ̀à tə,
ba sànɩ́ yà nə wulə baan baan, ʋ dɩ tɩa.
Ʋ mun tɩʋ tə kʋ yà nə cɩ̀gà kʋ tɩ̀àn nə,
ʋ cúə́ kʋ tɩa.
Ʋ mà kʋ ʋ lwá tɩa pùrú wa,
6 ʋ pa ba yinənyɩna nɩŋa də nɛɛ,
ʋ pa labwana tɩtaga ba nɛɛ də̀ń.»
Lalʋʋ tə Yɩjʋnɩ
7 Cɩ́gá tíú cwəŋə yɩ mənəmənə.
Ba-Yígúrə́-Jə-Tiu, n yɩ mənəmənə,
yá n yàá kwɛn cɩ́gá tíú cwəŋə,
n pa ka yɩ mənəmənə.
8 Ba-Yígúrə́-Jə-Tiu, nə cɩ́gá ken nə yala n nə,
cwəŋə tə yuu wa, n nə pɩn nəba nii, sə nə twá.
Nə nə bʋŋa n yoo,
nə ga boŋə nə kəni n yɩrɩ tə nə,
yɩ nə fɩra yoo nəfarʋ.
9 Tɩtɩn nə, n fɩra yàá jə nə,
yá à sìrì à ma pɩ̀à mʋ́ də à waa mama.
Cɩ́gá, máŋá tə n nə bʋ̀rɩ̀ bʋra tɩa yuu wa,
lʋʋ ləzoni yàá kwè cɩ́gá cwəŋə tʋtʋnɛɛ.
10 Ba nə tʋn pubwanʋ wʋlʋnyiən yɩra,
ʋ yàá ba cɩ́gá cwəŋə tʋtʋnɛɛ kwè.
Yá lʋʋ nii tə də tətə wa,
yìə̀n nə twá cɩ́gá nə ndə kʋ nə mɛ nətʋ,
wʋlʋnyɩna tʋtʋnɛɛ tə ba cɩ́gá cwəŋə tì,
yá ba yáá tə̀lə́ də Ba-Yígúrə́-Jə-Tiu pàrɩ̀ tə.
11 Ba-Yígúrə́-Jə-Tiu, n zɩ̀n n jɩɩn yɩɩ nə,
yá wʋlʋnyɩna tə ba kʋ na.
Ba wá na n badoli sonu tə,
n nə jə n pa n lalʋʋ tə nə,
yá kʋ wʋgwɩʋ wá ja ba.
Mə nətʋ nə, mən tə n nə tanɩ
n tún n dʋŋa nə, wá də́ ba.
12 Ba-Yígúrə́-Jə-Tiu, n pɩn nəba bɩcan sìə́.
Cɩ́gá, kʋ tə mama nə nə tʋŋa,
yɩ n mʋ̀ nə pɩn kʋ nii swí, kʋ pɩn nəba.
13 Ba-Yígúrə́-Jə-Tiu, nə tíú Yɩɩ,
yuu-tɩan duən də tɩnɩ nəba,
yá kʋ dàń nə yɩ n mʋ̀ cɩcɩ yɩrɩ tə nə nə,
nə boŋə nə kəni.
14 Tɩga ba pìí ba zaŋa,
cirə ba pìí ba twi.
Cɩ́gá, n zɩgɩ ba nə, n cʋ̀gʋ̀ ba,
n pa ba yɩrɩ jɛ́n mɩ́ámɩ́án.
15 Ba-Yígúrə́-Jə-Tiu, n pɩn lalʋʋ tə pùlì!
N pɩn lalʋʋ tə pùlì, n pɩn dun n yɩrɩ tə nə.
N pɩn lʋʋ nii tə sɩswɩan tə mama wàlɩ̀.
16 Ba-Yígúrə́-Jə-Tiu, ba jɩgwarʋ máŋá wa,
ba viviri ba yáá ba te n con.
Ba bʋbʋrɩ ba yɩjʋnɩ,
máŋá tə wa n nə pɛ́ ba n kəni cwəŋə wa.
17 Ba-Yígúrə́-Jə-Tiu, nə yɩn n yáá con,
ndə kapuə nə, ʋ nə pɩ̀à sə ʋ lɩra,
yá ʋ pùə́ tə yɩŋa tə dàń pa ʋ na càn,
yá ʋ bubwi.
18 Nə də yɩn ndə nə nə jə pùə́,
ka yɩ̀gà nəba,
yá nə lɩrʋ máŋá nə yí,
nə càn tə mama yɩn tʋtʋ, ndə vʋʋ nə.
Nə wà tʋtʋŋɩ tʋn, kʋ nə wá jon tɩa tə,
yá nə wà won mama fwa,
kʋ nə wá pa mɩɩ lʋʋ ləzoni nə.
Yɩɩ bʋra tə yoo
19 Á tɩga tə wá pìí ba bwin!
Á tɩga tə wá pìí ba zàn!
Á zaŋa dwiən nə, á mà pupwən cə̀rí,
á mʋ̀ lɩ̀à tə nə tígə́ pùrú wa!
Cɩ́gá, Ba-Yígúrə́-Jə-Tiu wá pa aba poni nyʋ̀nʋ̀,
yá tɩa tə wá pa cirə pìí ba bà lʋʋ.
20 Vəli, à lalʋʋ, vəli n zʋ n dìì wa,
n ga sún n mimiən n nii nə.
Səgə n tɩ̀àn máŋá mancɩn wa,
kʋ ja va kʋ yí máŋá tə,
à lɩŋa tə nə wá tʋ.
21 Cɩ́gá, Ba-Yígúrə́-Jə-Tiu naŋa
ʋ wúlú bwálɩ́ tə wa,
sə ʋ pa tɩa yuu ləzoni tún ba nii,
ba yolwana tə yɩrɩ.
Tɩa tə wá súrí jana tə yuu nə, ba nə lwá,
ka kʋ́ʋ̀ bá sun tɩga tə yuu nə, ba nə gʋa.