Ba-Yígúrə́-Jə-Tiu yɩ labwanʋ yisəgə bwálɩ́
25
1 Ba-Yígúrə́-Jə-Tiu, n yɩ à Yɩɩ,à wá siən mʋ́, à wá bʋ n yɩrɩ tə nə.
Cɩ́gá, n tʋn yìə̀n tə nə jə fɩra,
n tanɩ tə n pubʋŋa wa,
kʋ máŋá ba yigə,
tə ga zɩga zəni, tə jə dɩ̀àn.
2 Cɩ́gá, n pɩn tɩʋ tə jì kapana púlí,
sadiyuu tə nə yɩ dɩ̀àn dəkuu bwálɩ́ jìgə̀ diboo.
Vərə sàń tə nə jə fɩra kʋ́ʋ̀ tə̀lə́ tɩʋ tə wa,
yá ba kʋ́ʋ̀ ba pìí ba lwà kʋ də mama.
3 Kʋ mʋ̀ nə pɩn, lalʋʋ tə nə jə dɩ̀àn pɩn mʋ́ dun,
yá wʋlʋnyɩna dwíə́ tɩan tə lɩ̀à dəri n fən.
4 Cɩ́gá, n yɩn yisəgə bwálɩ́,
n pa labwanʋ nə,
n yɩn dɩ̀àn dəkuu bwálɩ́,
n pa zʋrʋ nə,
ʋ jɩgwarʋ máŋá wa,
n yɩn yuu yikwala bwálɩ́,
n cɩ̀ dwà nɩ́á nə,
n yɩn ywárɩ́,
n cɩ̀ yɩcaʋ bárɩ́ nə.
Cɩ́gá, wʋlʋnyɩna lɩŋa yɩ
ndə dwà nə fɩrɩ bírə́,
5 nə à yə̀ə́ ndə yɩcaʋ bárɩ́ nə, tɩkʋrʋ yuu wa.
N pɩn vərə zizigu nywɩn lá.
N pɩn wʋlʋnyɩna gwaran nywɩn lá,
ndə bakwan ywárɩ́ nə yàá pa
yɩcaʋ bárɩ́ nyʋn lá nətʋ.
Dwíə́ tə mama cànà wodiu
6 Ba-Yígúrə́-Jə-Tiu, ʋ nə yɩ kwatara Yɩɩ
wá tanɩ wodiywaŋa cànà diŋə,
ʋ pa dwíə́ tə mama nə, paan ka tə yuu wa.
Kʋ yɩ divɛn nədwan cànà diŋə,
də wodiywaŋa cànà diŋə,
wodiywaŋa tə nə jə nanbwanʋ
tə nə jə nʋga,
də divɛn nədwan, kʋ nə bá durən jə.
7 Paan ka tə yuu wa nə,
ʋ wá cɩrɩ lúə́ pucʋnɩ gankɩkala tə
nə púə́ lʋʋ ləzoni mama yáá nə,
pucʋnɩ gansara tə nə piri
lʋʋ dwíə́ tə mama yuu nə.
8 Ʋ wá pa tɩan jɛ́n mɩ́ámɩ́án.
Yuu-Tiu Ba-Yígúrə́-Jə-Tiu wá mʋ̀rɩ́ yáá mama yinɩa.
Ʋ wá pa ʋ lɩ̀à tə cavɩra tə jɛ́n tɩa yuu wa mɩ́ámɩ́án.
Cɩ́gá, Ba-Yígúrə́-Jə-Tiu nə swɩ̀n kʋ!
Fʋfʋlʋ wá yí Mʋabə tɩ̀án
9 Kʋ máŋá tə wa, ba wá swɩ̀n, ba wʋ́:
«Nə̀ń nə tíú Yɩɩ nə!
Ʋ mʋ̀ yuu wa nə nə ken nə yala,
yá ʋ jon nəba.
Ba-Yígúrə́-Jə-Tiu yuu wa nə nə ken nə yala:
Nə fwaga pupwən, nə ga jwɛ,
ʋ nə jon nəba yɩrɩ!
10 Cɩ́gá, Ba-Yígúrə́-Jə-Tiu jɩɩn wulə paan ka tə yuu wa!»
Yá ba nɩŋɩ Mʋabə tɩ̀án mʋ̀ də nɛɛ,
kʋ bwálɩ́ tə wa,
ndə ba nə nɩŋɩ gaʋ də nɛɛ,
nabɩan gwàlʋ́ wa nətʋ.
11 Gwàlʋ́ təntə titəŋi wa, ba tɩɩn ba jɩ̀àn,
ndə lìù nə pugə nɩ́á nə yàá tɩɩn ʋ jɩ̀àn,
ʋ ma pugə nɩ́á nətʋ.
Yá də ba kajaŋa tə mɛ,
Ba-Yígúrə́-Jə-Tiu tə mun ba,
ba fwìə́ tə yɩrɩ.
12 Mʋabə tɩ̀án-ba,
á dɩ̀àn dəkuu bwálɩ́ biritaŋan tə dara yɩɩ nə,
yá də kʋ mɛ,
Ba-Yígúrə́-Jə-Tiu dɩga tə,
ʋ cúə́ tə tɩa,
ʋ mà tə ʋ lwá tɩa,
tə cú tə ja tɩa pùrú nə.