Tɩa tə mama wá cʋ̀gʋ̀
24
1 Nə̀ń, Ba-Yígúrə́-Jə-Tiu wulə tɩa tə ʋ cʋ̀gà,
lìù kʋ́ʋ̀ tə̀lə́ ka wa.
Ʋ wulə ka ʋ gugurə,
ʋ wulə ka yuu lɩ̀à tə
ʋ laga duən yáá nə.
2 Kʋ yoo tə wá yí Yɩɩ joŋwanʋ də lalʋʋ tə mɛ,
yuu-tiu də ʋ tʋtʋnbiu mɛ,
kadiənuu də ʋ tʋtʋnbʋa mɛ,
lìù tə nə yoli, də lìù tə nə joŋə ʋ yə̀ mɛ,
lìù tə nə pɩn, də lìù tə nə lòrì mɛ,
də jɩŋɩ tíú də jɩjɩŋʋ mɛ.
3 Tɩa tə wá cʋ̀gʋ̀ mɩ́ámɩ́án,
won mama bá ga ka yuu wa.
Cɩ́gá, Ba-Yígúrə́-Jə-Tiu nə pɩn nii,
sə kʋ yoo təntə tʋn.
4 Tɩa tə wulə lúə́ pʋcʋnɩ wa, ka kʋa,
lʋʋ tə kʋa, kʋ wulə kʋ cʋ̀gà.
Lʋʋ tə yáá tɩ̀án tə wulə ba bwànɩ́.
5 Tɩa tə yuu lɩ̀à tə tʋn durən yìə̀n ka wa.
Cɩ́gá, ba wà Yɩɩ nii yìə̀n* tə zìlí,
ba cʋ̀gʋ̀ yìə̀n tə,
Yɩɩ nə pɩn tə pʋ́pʋ́nɩ́ tə tún*,
ba cʋ̀gʋ̀ nimarʋ tə yà nə mɛ sə kʋ ya
ba də Yɩɩ pwə́rə́ wa máŋá mama wuuu.
6 Kʋ mʋ̀ nə pɩn Yɩɩ ma cʋ̀gʋ̀ tɩa tə,
yá kʋ yoo dàń zɩŋa ka yuu lɩ̀à tə.
Kʋ mʋ̀ nə pɩn
tɩa tə yuu lɩ̀à tə ma tɩ, ba ga mancɩn.
7 Divɛn nədʋn tə kʋa,
divɛn tɩ̀án tə pɩ̀nɩ̀.
Pupwən tɩ̀án tə mama dàń yɩ ba sìrì.
8 Mənkori pupwən tə nyʋan lá,
cànà diŋə zizigu tə zwɛ̀,
kwànʋ́ pupwən tə nyʋan lá.
9 Divɛn kʋ́ʋ̀ ba nywɩn də ba nuŋə,
sana tə nə dà jìgə̀ cɩcaʋ tə pa sanyʋra nə.
10 Tɩʋ tə kʋ lɩ̀à nə dəri ba yá kʋ cʋ̀gʋ̀.
Dìì tə mama sun, lìù kʋ́ʋ̀ ba tə wa zwɩ.
11 Ba mà bubwiə coŋi yuu,
divɛn nə tə̀lə́ yɩrɩ.
Pupwən tə mama jɛ́n,
jwɩa vìí lʋʋ nii tə wa.
12 Cʋcʋran cɩcɩ dàń nə ga tɩʋ tə wa,
yá kʋ mimien bwə̀rə̀n tə nyʋnyʋgʋ.
13 Cɩ́gá, lʋʋ nii tə wa lɩ̀à tə jìgə̀ ndə
olivə tɩ̀án lənə wogunə nə,
ba jìgə̀ ndə divɛn tɩ̀án bɩ̀á wogunə nə,
divɛn tɩ̀án bɩ̀á pʋ̀rʋ́ kwa nə.
Lɩ̀à tə gɩganɩ tə fwa pupwən də ka máŋá wà yí
14 Lɩ̀à tə gɩganɩ tə zɩ̀n ba kori yɩɩ nə,
ba mà pupwən cə̀rí.
Ba zɩgɩ yɩɩ yizwɩa con,
ba mà pupwən cə̀rí,
ba ma pɩn dun Ba-Yígúrə́-Jə-Tiu nə.
15 Kʋ mʋ̀ yɩrɩ,
á pɩan dun Ba-Yígúrə́-Jə-Tiu nə, yɩɩ yipɩan con!
Á bwɩa Ba-Yígúrə́-Jə-Tiu,
Yɩzərayɛlə lɩ̀à Yɩɩ yɩrɩ tə nə,
mʋʋ titəŋi wa lʋʋ níə́ tə wa!
16 Nə nə̀ń nuŋi, tɩa nii yígúrə́ con,
tə nə swɩ̀n, tə wʋ́:
«Cɩ́gá tíú tə mɛ də dun!»
Yá à mʋ̀ dàń swɩ̀n, à wʋ́:
«Càn yí nə! Càn yí nə! Nə̀ń à lɛɛ nyɩɛn!»
Pwìí bələ tɩ̀án tʋn pwìí bələ yoo à yɩra!
Pwìí bələ yoo!
Pwìí bələ tɩ̀án tʋn pwìí bələ yoo!
17 Bɩcapuri, də gwàlʋ́, də nyalɩ
nə dànɩ̀ aba, á mʋ̀ tɩa yuu ləzoni-ba!
18 Lìù tə ʋ nə dəri bɩcapuri bubwiə yáá nə,
ʋ wá tʋ gwàlʋ́ wa,
yá lìù tə ʋ nə nan gwàlʋ́ wa,
ʋ wá tʋ nyalɩ wa.
Cɩ́gá, lanworu nɩ́á bʋran tə súrí,
yá tɩa tə dəkurən vuvugə.
19 Tɩa tə lwe,
tɩa tə pwin,
tɩa tə sisigə,
20 tɩa tə tətəli, ndə sanyʋrʋ nə,
ka sìlì ndə vuun nə.
Ka cʋna tə dun jə ka,
ka tʋa, yá ka kʋ́ʋ̀ bá pìí ka zàn.
Payun tə tʋrɩ, də Yɩɩ pàrɩ̀ tə diŋə yoo
21 Kʋ dɩɩn tə nə, lanworu wa, Ba-Yígúrə́-Jə-Tiu wá zɩgɩ lanworu tə wa wiən* tə nə, yá tɩa yuu wa, ʋ wá zɩgɩ tɩa yuu pɛ̀gá tə nə. 22 Ba wá kə pɛ̀gá tə, də lanworu tə wa wiən tə mama duən yáá, ndə bandiə lɩ̀à nə, ba nə wulə bʋʋ wa. Ba wá sun ba bandiə wa, yá dɩan kapʋpʋ kwa nə, ba wá bʋ̀rɩ̀ ba bʋra.
23 Cànà tə wá fʋfʋlɩ,
yɩcaʋ tə wá də́ cavɩra.
Cɩ́gá, Ba-Yígúrə́-Jə-Tiu,
ʋ nə yɩ kwatara Yɩɩ də́ pàrɩ̀
Siyon paan tə yuu wa, Zwerizalɛmə wa,
yá dun wulə ʋ lalʋʋ tə yáá tɩ̀án tə yáá con.