Yɩɩ sʋgʋ tə nə zɩga Tirə tɩʋ tə nə
23
1 Yɩɩ sʋgʋ tə nə zɩga Tirə tɩʋ tə nə:Á dɩa lúə́ pucʋnɩ gwaran,
nɩ́á yuu bwərə nəfaran tɩ̀án-ba,
tə nə vəli yiŋʋnɩ!
Cɩ́gá, ba cʋ̀gʋ̀ á tɩʋ tə.
Dìə̀ kʋ́ʋ̀ tə̀lə́! Mimii kʋ́ʋ̀ tə̀lə́!
Swipərə lʋʋ nii wa nə
ba zɩgɩ ba nì kʋ ŋwɛn.
2 Á pɩan fən gən aba, á mʋ̀ mʋʋ nii lɩ̀à tə,
Sidon tɩ̀án baywələ tə nə jírí mʋʋ yuu
nə pɩn wiən bʋ́rɩ́ aba!
3 Shihorə nagwanaa mɩna tə,
də wiən tə ba nə vàrɩ̀ Nilə mʋnaa tə nii nə,
yà yɩ Sidon tɩ̀án nə tɩ.
Sidon tɩʋ tə dàń yà nə yɩ lʋʋ dwíə́ tə yəə.
4 Á pɩan cavɩra ja aba, Sidon tɩ̀án-ba!
Cɩ́gá, nə̀ń kʋ tə mʋʋ tə nə swɩ̀n,
nə̀ń kʋ tə mʋʋ dɩ̀àn dəkuu bwálɩ́ tɩʋ tə nə swɩ̀n:
«À wà càn dí,
à wà lɩrɩ,
à wà balandʋra kʋ̀nɩ̀,
à wà kacɩan kʋ̀nɩ̀.»
5 Máŋá tə Ezwipətə tɩ̀án nə wá nì ŋwɛn təntə,
ba wá vɩvaga ndə ba nə vɩvaga nətʋ,
máŋá tə wa ba nə nì yoo tə nə yí Tirə tɩʋ tə.
6 Á bɩan mʋʋ tə, á nan á va Tarəsisə.
Á dɩa lúə́ pucʋnɩ gwaran, mʋʋ nii lɩ̀à-ba!
7 Mə á tɩʋ tə, ba yà nə fwa pupwən kʋ wa nə jìgə̀ nətən?
Kʋ nə yɩn lá, kʋ máŋá ba yigə,
yá kʋ lɩ̀à yà vəli yiŋʋnɩ, ba lwà sànɩ́.
8 Wàà nə tʋn yoo təntə Tirə tɩʋ tə yɩra,
kʋ mʋ̀ tɩʋ tə, kʋ yà nə tarɩ payupurən,
kʋ pɩn pɛ̀gá nə,
kʋ baywələ yà nə yɩ pàbɩ̀á,
lʋʋ lɩ̀à mama nə zìlí?
9 Ba-Yígúrə́-Jə-Tiu, ʋ nə yɩ kwatara Yɩɩ nə tʋn kʋ,
sə ʋ ma cʋ̀gʋ̀ kʋ zəni tə mama
nə pɩn kʋ fwa fwìə́,
ʋ ga mun lɩ̀à tə mama,
ba nə kəni dun ba yuu wa, tɩa yuu wa.
10 Tarəsisə tɩ̀án-ba, á swíə́ á lʋʋ nii tə,
ndə nɩ́á nə súə́ Nilə mʋnaa tə, tə pàlɩ̀,
á ma vàrà kʋ.
Cɩ́gá, nɩ́á yuu bwərə yizɩga bwálɩ́ kʋ́ʋ̀ tə̀lə́!
11 Ba-Yígúrə́-Jə-Tiu te ʋ jɩɩn mʋʋ tə yuu con,
ʋ pɩn payun vuvugu,
ʋ pɩn nii Kanaan tɩ̀án nə,
sə ba cʋ̀gʋ̀ ba dɩ̀àn dəkuu bwálá tə.
12 Ʋ swɩ̀n, ʋ wʋ́:
«Sidon tɩ̀án-ba, á mʋ̀ lɩ̀à tə
ba nə tʋn dɩ̀àn á yɩra,
á yágá cànà diŋə nə!
Á nə swə á zàn á va Swipərə lʋʋ nii wa,
á tə bá na sìə́ lá də.
13 Nə̀ń Kaləde* tɩ̀án lʋʋ nii tə,
ba dwíí tə kʋ́ʋ̀ tə̀lə́.
Asiiri tɩ̀án pɩn Kaləde lʋʋ nii tə
kasɔɔ lanworu ganaŋa nə.
Ba lwə̀ kwatara dəyuu dìì nədaran,
ba ma pú tɩʋ tə nə də kʋ̀ʋ̀.
Ba gwɛrɩ Tirə tɩ̀án padii tə,
ba pɩn tə jì dibwərən dədwələn.
14 Á dɩa lúə́ pucʋnɩ gwaran,
nɩ́á yuu bwərə nəfaran tɩ̀án-ba,
tə nə vəli yiŋʋnɩ!
Cɩ́gá, á dɩ̀àn dəkuu bwálɩ́ tə cʋ̀gʋ̀!»
15 Kʋ máŋá tə wá, ba wá swɛ̀ɛ́ Tirə yoo, bɩna sapwɩtwa də fugə, ndə pɩ̀ʋ́ bɩna dánɩ́ nə yɩ nətʋ. Bɩna sapwɩtwa də fugə tə nii nə, Tirə wá ya ndə kacwarʋ tə nə, nuŋə ka tə nə swɩ̀n ʋ yoo:
16 Kacwarʋ tə ba nə swɛ̀ɛ́ n yoo,
tí kwànʋ́ n dú, n ja kɩkarɩ tɩʋ tə!
Dú zəni, nun nuŋi kapʋpʋ,
sə ba pìí ba lìí n yoo!
17 Bɩna sapwɩtwa də fugə nii nə, Ba-Yígúrə́-Jə-Tiu wá lìí Tirə tɩʋ tə yoo. Kʋ kʋ́ʋ̀ wá pìí kʋ sinti kʋ tʋŋa kʋ tʋtʋnkʋkwɩnan tə, yá kʋ kʋ́ʋ̀ wá cwàrɩ̀ də tɩa yuu payun tə mama, sə kʋ ma na səbiu. 18 Yá nywarɩ tə də ŋwɩ́rán tə kʋ nə wá na, yɩ ba wá tún tə vàn nə, ba pa Ba-Yígúrə́-Jə-Tiu nə. Ba bá nyɩ́n tə ba tún duən yuu, ba ma bá cɩ̀ tə nə ba tún. Cɩ́gá, kʋ ŋwɩ́rán tə yɩ ba wá pa tə lɩ̀à tə, ba nə wulə Ba-Yígúrə́-Jə-Tiu dìə̀ tə wa, sə ba ma yə̀ wodiu ba də́ ba sú, ba ga ma yə̀ ganmʋla ba zʋ.