Yɩɩ sʋgʋ tə nə zɩga Zwerizalɛmə tɩ̀án nə
22
1 Yɩɩ sʋgʋ tə nə zɩga nɩʋn vara tə nə:Kʋ yɩ nətə Zwerizalɛmə,
n də n lalʋʋ tə mama ma dɩ̀ dəyun wa,
2 yá tɩʋ tə dwana dàń dwanɩ,
kʋ ga sú də lɩ̀à zizigu,
ba nə wulə pupwən wa?
N tɩga tə tà kwatara sɩ̀ʋ́ nə gʋa ba,
kʋ ma tà kʋ̀ʋ̀ tɛgʋ wa nə ba tɩga.
3 N kwatara yun tɩ̀án tə mama twá duən, ba dəri.
Twan tárá jɩn ba, ba ma fwa bandiə lɩ̀à.
Dʋŋa jɩn n lɩ̀à tə mama,
ba yà nə wulə yiŋʋnɩ, ba dəri sə ba jɛ́n,
ba ma fwa bandiə lɩ̀à.
4 Kʋ mʋ̀ nə pɩn à ma swɩ̀n, à wʋ́:
«Á vivirə á yáá á kə kwa,
á kʋ́ʋ̀ dànà ká ywàń nə.
Á yaga nə sə à kwi tantan,
á dànà ká kòrì nə,
à lɩ̀à tə lʋʋ nii nəzəŋu tə nə cʋ̀gʋ̀ yɩrɩ.»
5 Cɩ́gá, zə̀n kʋ tə,
Ba-Yígúrə́-Jə-Tiu, kwatara Yɩɩ tə
nə yɩ Yɩzərayɛlə lɩ̀à Yɩɩ
ken fən nəfarʋ, də cʋcʋran,
də pucʋnɩ nəfarʋ nɩʋn vara tə wa.
Biritaŋan buburi duən yuu,
lɩ̀à mà bubwiə,
ba pɩ̀à sáŋʋ́ paan tə vàn con.
6 Elamə tɩ̀án palɩ cwen,
ba bɩ̀àn də səsen, də kwatara səsen kòrə̀n.
Kirə tɩ̀án lɩ ba natanan poni nə.
7 N varɩ tə nə ziən zənzən
nii súə́ də səsen kòrə̀n,
yá səsen kòrə̀n tə wa kwatara tə tanɩ
ba zɩga kʋ̀ʋ̀ zɩgʋ, tɩʋ tə mimii nə.
8 Ba-Yígúrə́-Jə-Tiu lɩ won tə
yà nə kwálɩ́ Zwida payuu tə yuu nə.
Kʋ dɩɩn tə nə, á jələ kwatarɩ zɩla tə yuu wa,
tə nə wulə Pún Dìə̀ tə wa.
9 Á nɩ bírə́ lulwərən kapʋpʋ tə,
ba nə tún Davidə sadiyuu tə biritaŋʋ tə yɩra,
yá á cɩ̀gà nɩ́á á kə tɩa con nɩ́á gwàlʋ́ nəfarʋ tə wa.
10 Á gàlɩ̀ Zwerizalɛmə dìì tə,
yá á gwɛrɩ tə duən,
á ma kwɛn á lwà biritaŋʋ tə,
sə kʋ ja dɩ̀àn zənzən.
11 Á fwa nɩ́á gwàlʋ́ nəfarʋ
biritaŋan bələ tə pwə́rə́ wa,
sə nɩ́á gwàlʋ́ nədwan tə nɩ́á zʋ lá.
Yá á wà á yáá viviri á kə Yɩɩ tə con,
ʋ nə tʋn kʋ nətʋ tə.
Á ba Yɩɩ tə na,
ʋ nə tanɩ kʋ nətʋ tə fuən mama.
12 Kʋ máŋá tə wa,
Yuu-Tiu Ba-Yígúrə́-Jə-Tiu,
ʋ nə yɩ kwatara Yɩɩ bon aba
sə á kwi, á ga dɩ lúə́ pucʋnɩ gwaran,
sə á pàrɩ́ á yun, á ga zʋ ganlɔɔ gànʋ̀a,
13 yá nə̀ń kʋ nə,
kʋ yɩ jwɩa də pupwən nə fwa!
Vanfaran gwɩ,
sɩ̀ʋ́ kəni vanmɩnɩ bɩan nə,
nàŋʋ́ də́, divɛn nywɩn,
yá á swɩ̀n, á wʋ́:
«Nə díə́, nə ga nyʋn,
nə jwɩan nə wá tɩ yɩrɩ!»
14 Ba-Yígúrə́-Jə-Tiu, ʋ nə yɩ kwatara Yɩɩ
pɩn à lwarɩ kʋ:
Yolwan təntə bá kwɛn kʋ lɩ á titəŋi wa də mama,
kʋ ja vələ á tɩan.
Yuu-Tiu Ba-Yígúrə́-Jə-Tiu,
ʋ nə yɩ kwatara Yɩɩ nə swɩ̀n kʋ.
Yɩɩ sʋgʋ tə nə zɩga pɩ̀ʋ́ tʋtʋnʋ Swebəna nə
15 Nə̀ń kʋ tə Yuu-Tiu Ba-Yígúrə́-Jə-Tiu, ʋ nə yɩ kwatara Yɩɩ nə swɩ̀n: «Vəli n na Swebəna, ʋ mʋ̀ bɛɛ təntə, ʋ nə ywàŋá pɩ̀ʋ́ sàń tʋ̀tʋ̀nán yuu, n swɩ̀n ʋ con, n wʋ́:
16 Bɛ̀ɛ̀ nə n tɩ yəbə?
Yá wàà nə n tɩ yəbə,
n ma kwɩ n ləbəri yəbə?
Nə̀ń wá, ʋ ma kwɩ ʋ ləbəri dədəlu yuu wa,
ʋ sè ʋ yipaa bwálɩ́ pɩ̀ʋ̀ wa!
17 Ba-Yígúrə́-Jə-Tiu wá dɩlɩ mʋ́ ʋ dʋgʋ yiŋʋnɩ.
Ʋ wá vwa n nii nə,
yá ʋ vwa mʋ́ ʋ kə duən nə də ŋoni,
18 ʋ pa n bibili ndə balə nə,
lʋʋ nii wa, kʋ nə wala zənzən.
Mə lá nə n wá tɩ,
yá mə lá nə n səsen kòrə̀n tə nə jə dun wá ya,
n mʋ̀ lìù tə nə yɩ n yuu-tiu dìə̀ tə cavɩra!
19 À wá dɩŋa mʋ́ à lɩ n yizɩga bwálɩ́ tə wa,
à wá lɩ mʋ́ n tʋtʋŋɩ tə wa.
20 Kʋ máŋá tə wa,
à wá bon à tʋtʋnʋ Eliyakimə,
ʋ nə yɩ Hiləkiya bìú.
21 À wá ja n gànʋ̀ tə à ma zʋ wá,
yá à wá vwa n voru tə ʋ taŋa nə,
à ga kə n dɩ̀àn tə ʋ jɩɩn wa,
yá ʋ wá ya Zwerizalɛmə tɩ̀án,
də Zwida payuu tə lɩ̀à nyɩna.
22 À wá dɩ Davidə dìə̀ tə borubiu ʋ pàrà wa.
Ʋ nə súrí, lìù mama wàrɩ̀ ʋ suŋə,
yá ʋ nə sun, lìù mama wàrɩ̀ ʋ súrí.
23 À wá pa ʋ dəkuu zʋ tɩa ndə párɩ́ nə,
bwálɩ́ wa kʋ nə jə dɩ̀àn,
yá ʋ wá ya ndə dun padaʋ nə, ʋ nyɩna dìə̀ tə wa.»
24 Ʋ nyɩna dìə̀ dun tə mama wá goli ʋ nə, ndə tɩ̀ʋ́ pɩna də kʋ naywalan nə gwə kʋ dəkuu nə nətʋ, ndə dìə̀ zʋbii nə gwə párɩ́ nə nətʋ, kʋ nə zɩgɩ tasɛ nə, kʋ va kʋ yí kwàrɩ́. 25 Kʋ máŋá tə wa, Ba-Yígúrə́-Jə-Tiu nə swɩ̀n kʋ, ba wá mùrí párɩ́ tə nə pa bwálɩ́ tə wa, kʋ nə jə dɩ̀àn. Ba wá mà kʋ ba gùrì ba dɩ, yá zɩlɩ tə yà nə gwə kʋ nə, wá sori kʋ tʋ. Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə!