Babɩlɔnə tɩʋ tə tʋrɩ yoo
21
1 Yɩɩ sʋgʋ tə nə zɩga mʋʋ nii kasɔɔ lanworua tə nə:Dʋŋʋ tə nan lʋʋ nii wa,
kʋ nə ba kamandon jə,
ʋ twá kasɔɔ lanworu tə wa, ʋ bɩ̀àn,
ndə kùlì nə, kʋ nə twá Negɛbə nagwanaa tə wa, kʋ kɛ̀ń.
2 Yɩɩ pɩn à na nɩʋn, kʋ nə jə fən zənzən:
Níə́ bələ tíú tʋŋa níə́ bələ yìə̀n lɩ̀à yɩra,
cʋcʋnyiən də ga cʋ̀gà cʋcʋran.
Vələ á ta kʋ̀ʋ̀, Elamə tɩ̀án-ba!
Vələ á pú á kə də kʋ̀ʋ̀, Medi tɩ̀án-ba!
À pɩn súrə́ tə mama nyʋn lá.
3 Kʋ mʋ̀ nə pɩn à taŋa yɩ̀,
yɩŋa yí nə, ndə kan pùə́ nə yɩ̀, sə ʋ lɩra.
À pùə́ pípínú tə pɩn, à ba sʋgʋ mama nə̀ń,
fən gən nə kʋ pa, à ba won mama na.
4 À bɩcan viviə,
fən gən nə, kʋ pa à vɩvaga.
Didənbibirə tə à yà nə jə ka yala,
lwàń ka jì vɩvagʋ ka pa nə.
5 Ba tún wodiu,
nəcɩra cɩ̀,
lɩ̀à də́, yá ba nywɩn.
Zaŋa yɩɩ nə, kwatara yáá tɩ̀án-ba!
Á ja nʋga á ma tùrì natana!
6 Cɩ́gá, Yuu-Tiu swɩ̀n à con, ʋ wʋ́:
«Vəli n zɩgɩ lìù tə nə pàlɩ̀, ʋ bwálɩ́ nə,
sə ʋ swɩ̀n kʋ tə ʋ nə na, ʋ bɩrɩ.
7 Ʋ nə nɩ səsen kòrù,
səsen bələ nə vaŋa,
də kwatara, ba nə jə̀ə́ bɩnɛ yuu,
də ba duən, ba jə̀ə́ nyʋgʋmɛ yuu,
ʋ mɛ sə ʋ zuri ʋ yɩra,
ʋ mɛ sə ʋ zuri ʋ yɩra zəni!»
8 Yá ʋ baa ndə gəru nə, ʋ wʋ́:
«Yuu-tiu, yɩtʋrɩ tə mama,
à zɩgɩ dəyuu dìə̀ nədarʋ tə yuu wa,
yá tɩtɩn tə mama, à zɩgɩ yɩɩ nə, à yizɩga bwálɩ́ nə.
9 Yá à nɩ lìù də ʋ bɩ̀àn də səsen kòrù,
səsen bələ nə vaŋa!»
Yá ʋ dàń swɩ̀n, ʋ wʋ́:
«Kʋ tʋa, kʋ tʋa, Babɩlɔnə tʋa!
Kʋ woŋwanan tə mama tʋa tɩa, tə pʋpʋgʋ.»
10 Ooo, à lʋʋ lɩ̀à-ba, á mʋ̀ lɩ̀à tə
Yuu-Tiu nə mà ndə mɩna nə tʋa wa,
yoo tə à nə nì Ba-Yígúrə́-Jə-Tiu con,
kwatara Yɩɩ tə ʋ nə yɩ Yɩzərayɛlə lɩ̀à Yɩɩ,
à swɩ̀n kʋ à bɩrɩ aba.
Yɩɩ sʋgʋ tə nə zɩga Duma lʋʋ nii tə nə
11 Yɩɩ sʋgʋ tə nə zɩga Duma lʋʋ nii tə nə:
Kori boŋə kʋ kəni à nə, Seyirə con, kʋ wʋ́:
«Nəcɩrʋ, tɩtɩn tə yɩ nətə?
Nəcɩrʋ, tɩtɩn tə yɩ nətə?»
12 Nəcɩrʋ tə le, ʋ wʋ́:
«Jɩjʋ bɩ̀àn, tɩtɩn də ga pìí kʋ bɩ̀àn.
Á nə pɩ̀à á bwe bwie,
sə á pìí á bà, á bwe!
Á pìrə́ á bà!»
Yɩɩ sʋgʋ tə nə zɩga Arabi lʋʋ nii tə nə
13 Yɩɩ sʋgʋ tə nə zɩga Arabi lʋʋ nii tə nə:
Á mʋ̀ Dedan ganbələ tɩ̀án-ba,
á wá jʋ Arabi gaʋ tə wa!
14 Á naŋa á jəri lɩ̀à tə nanyʋnɩ nə jə ba,
á jana nɩ́á á va á pa ba.
Tema lʋʋ lɩ̀à-ba, á naŋa á jəri
lɩ̀à tə nə dəri sə ba jɛ́n,
á jana wodiu á va á pa ba.
15 Cɩ́gá, ba dəri sə ba jɛ́n kwatara sɩ̀án yáá nə,
kwatara sɩ̀ʋ́ yáá nə, kʋ nə nan kʋ lɔ́ɔ́ wa,
də twan yáá nə, ka nə van ka dɩ̀,
də kʋ̀ʋ̀ càn yáá nə.