Ezayi vəli də yaswələ də napɩrɩswələ
20
1 Bɩnɩ tə nə Asiiri pɩ̀ʋ́ Sarəgon nə tʋn ʋ kwatara yáá tíú tə, ʋ pa ʋ bà Aswədɔdə tɩʋ tə wa, ʋ ta kʋ̀ʋ̀ də Aswədɔdə tɩ̀án, yá ʋ ta tɩʋ tə ʋ də́. 2 Kʋ máŋá tə wa, Ba-Yígúrə́-Jə-Tiu twá də Amɔsə bìú Ezayi, ʋ ma swɩ̀n, ʋ wʋ́: «Vəli n kʋ̀rɩ̀ ganlɔɔ gànʋ̀a tə n taŋa nə, n ga lɩ n natɩra tə n nɛɛ nə.» Ezayi tʋn kʋ nətʋ tə, ʋ ga va yaswələ də napɩrɩswələ. 3 Yá Ba-Yígúrə́-Jə-Tiu swɩ̀n, ʋ wʋ́: «À tʋtʋnʋ Ezayi vəli də yaswələ də napɩrɩswələ bɩna batwa. Kʋ nətʋ yɩ mɩmɩnʋ, kʋ bɩrɩ yoo tə nə wá yí Ezwipətə tɩ̀án də Kuswə tɩ̀án. 4 Asiiri pɩ̀ʋ́ wá ja Ezwipətə də Kuswə tɩ̀án ləzwəndʋn də ba bazʋnan, yaswələ də napɩrɩswələ, ʋ ja va yongaʋ. Ba dəgunə wá nyɩn poni nə, yá kʋ wá ya cavɩra kʋ pa Ezwipətə tɩ̀án nə! 5 Mə nətʋ nə bɩcapuri də cavɩra wá zʋ lʋʋ dwíə́ tə, ba yà nə ken ba yala Kuswə tɩ̀án nə, ba ga jələ Ezwipətə tɩ̀án sáŋʋ́ yuu wa!»6 Kʋ máŋá təntə wa, mʋʋ nii tɩan tə tə wa lɩ̀à tə wá swɩ̀n, ba wʋ́: «Nə̀ń won tə nə yala tə nə jìgə̀! Nə̀ń won tə nə yuu yikwala bwálɩ́ tə, nə yà nə jələ kʋ yuu wa, sə kʋ san nəba, sə kʋ jon nəba Asiiri pɩ̀ʋ́ jɩɩn wa, nə jìgə̀! Nə wá twá nətə nə ma jɛ́n?»