Yɩɩ sʋgʋ tə nə zɩga Ezwipətə tɩ̀án nə
19
1 Yɩɩ sʋgʋ tə nə zɩga Ezwipətə lʋʋ nii tə nə:Ba-Yígúrə́-Jə-Tiu nə, ʋ dɩ̀gà bakwan tə
nə vəli lala yuu wa,
ʋ bɩ̀àn Ezwipətə lʋʋ nii wa.
Ezwipətə tɩ̀án kʋ̀nkʋ̀n yɩa tə vɩvaga ʋ yáá con,
Ezwipətə tɩ̀án bɩcan karɩ.
2 À mʋ̀ Ba-Yígúrə́-Jə-Tiu wá sugu
Ezwipətə tɩ̀án à kə duən nə,
à pa ba ta duən:
Nubiu wá ta ʋ zɩgɩ ʋ nubiu nə,
dabɛɛ wá ta ʋ zɩgɩ ʋ dabɛɛ nə,
tɩʋ wá ta kʋ zɩgɩ kʋ tɩʋ don nə,
payuu wá ta kʋ zɩgɩ payuu don nə.
3 Ezwipətə tɩ̀án wʋdɩʋ tə wá nyʋn ba titəŋi wa,
yá à wá gugurə ba vʋ́rá tə.
Ba wá bon ba kə kʋ̀nkʋ̀n yɩa nə,
ba wá bon tɩga nii,
ba ga vʋ ciciri də vʋra con.
4 À wá kə Ezwipətə tɩ̀án yuu-tɩan jɩɩn wa,
ba yoo nə dà zənzən.
Pɩ̀ʋ́ wʋlʋnyiən wá də́ pàrɩ̀ ba yuu wa.
Yuu-Tiu Ba-Yígúrə́-Jə-Tiu,
ʋ nə yɩ kwatara Yɩɩ nii sʋgʋ nə!
5 Nilə mʋʋ tə nɩ́á wá wʋ,
mʋnaa tə wá kʋ̀ mɩ́ámɩ́án.
6 Mʋnɛɛ tə wa wiən tə wá pʋ,
Nilə mʋnaa tə nacwərən tə wá mun,
tə ga kʋ̀,
yá mancanɩ tə də sangaʋ tə wá pɩ̀nɩ̀.
7 Nilə mʋnaa tə nii tə mama wá jì fee,
kʋ ja va kʋ yí bwálɩ́ tə ka nə cùrì!
Won tə mama ba nə dùə̀
Nilə mʋnaa tə nii nə wá kʋ̀,
vʋʋ jàn kʋ ja jɛ́n.
8 Fili jáná tə wá kwi ba sisigə,
lɩ̀à tə mama nə kəni gwalɩ Nilə mʋnaa tə wa,
wá ya lúə́ pucʋnɩ wa,
yá ba tə nə dɩlɩ gəgələn nɩ́á yuu,
pwìí wá cʋ̀gʋ̀.
9 Cavɩra wá zʋ lɩ̀à tə
nə tʋŋa ganbʋa gànàn,
kana tə nə vəri gaŋoni,
də bara tə nə swɩ gantwɛn yɛ́ɛ́ wá cʋ̀gʋ̀.
10 Lɩ̀à tə nə yɩ lʋʋ nii tə sáŋʋ́ dɩ̀àn wá zwɛ̀,
yá lɩ̀à tə mama nə tʋŋa sə ba jon ŋwɩ́rán,
pwìí wá cʋ̀gʋ̀.
11 Sʋan tɩ̀án pàbɩ̀á tə yɩ ləyirən cɩ́gá cɩ́gá,
Ezwipətə pɩ̀ʋ́ Farawon kwenə tə
nə yɩ wʋbʋnyɩna tɩ̀án, yɩ ləbibənən púlí.
Á fwa nətə, á ma swɩ̀n pɩ̀ʋ́ Farawon con,
də á yɩ wʋbʋnyɩna bɩ̀á, fuən pɛ̀gá tə bɩ̀á?
12 N wʋbʋnyɩna tə wulə yə̀n nə, pɩ̀ʋ́ Farawon?
Ba swɩan yoo mama ba bɩrɩ mʋ́,
ba ga pa n yəni yoo tə Ba-Yígúrə́-Jə-Tiu,
ʋ nə yɩ kwatara Yɩɩ nə tanɩ
ʋ zɩgɩ Ezwipətə lʋʋ nii tə nə!
13 Sʋan tɩ̀án pàbɩ̀á tə jìgə̀ ləyirən,
Nofə tɩ̀án pàbɩ̀á tə gɩgarɩ ba tɩ̀àn,
ba dwíə́ yáá tɩ̀án tə gɩgarɩ Ezwipətə tɩ̀án ba dʋga!
14 Ba-Yígúrə́-Jə-Tiu fwi yɩviru vʋʋ
ʋ lwá Ezwipətə tɩ̀án titəŋi wa,
sə kʋ pa ba jwə̀rí ba tʋtʋnɛɛ mama wa,
ndə lìù nə nyʋan sana ʋ sú,
ʋ jwə̀rí ʋ tʋtʋnan wa.
15 Yá lìù kʋ́ʋ̀ bá ya Ezwipətə lʋʋ nii wa,
ʋ nə wá wànɩ́ ʋ tʋn cɩ́gá cɩ́gá tʋtʋŋɩ,
ʋ nə yɩ ləzwənfarʋ nə à yə̀ə́ lalaŋʋ,
ʋ nə yɩ jɩjə tíú, nə à yə̀ə́ zʋrʋ.
Ezwipətə lʋʋ nii jwɩan nə wá ya nətʋ
16 Máŋá tə Ba-Yígúrə́-Jə-Tiu, ʋ nə yɩ kwatara Yɩɩ nə wá zɩ̀n ʋ jɩɩn ʋ zɩgɩ Ezwipətə lʋʋ nii tə nə, Ezwipətə tɩ̀án wá jì ndə kana nə: Ba wá jì bayalan, ba vɩvaga. 17 Zwida lʋʋ nii tə wá jì bɩcapuri won kʋ pa Ezwipətə lʋʋ nii tə nə: Máŋá tə mama lìù nə za Zwida lʋʋ nii tə yɩrɩ, Ezwipətə tɩ̀án yáá con, fən wá zʋ ba, yoo tə yɩrɩ Ba-Yígúrə́-Jə-Tiu, ʋ nə yɩ kwatara Yɩɩ nə tanɩ ʋ zɩgɩ Ezwipətə lʋʋ nii tə nə.
18 Kʋ máŋá tə wa, tɩan bonu wá ya Ezwipətə lʋʋ nii wa, tə lɩ̀à nə wá swɩ̀n Kanaan tɩ̀án nəndəli sʋgʋ, yá ba wá dù durə də Ba-Yígúrə́-Jə-Tiu, ʋ nə yɩ kwatara Yɩɩ yɩrɩ tə. Ba wá bon tɩan təntə don yɩrɩ Yirə-Hahɛrɛsəa.
19 Kʋ máŋá tə wa, ba wá lwà Yɩɩ joŋi bwálɩ́ ba pa Ba-Yígúrə́-Jə-Tiu nə, Ezwipətə lʋʋ nii tə titəŋi wa, ba ga zɩ̀n culu kapan* nəfarʋ ba zɩgɩ yɩɩ nə, ba pa Ba-Yígúrə́-Jə-Tiu nə, lʋʋ nii tə sɩswɩan wa. 20 Kʋ wá ya mɩmɩnʋ də dansɩa won, kʋ bɩrɩ də Ba-Yígúrə́-Jə-Tiu, ʋ nə yɩ kwatara Yɩɩ wulə Ezwipətə lʋʋ nii wa. Yá Ezwipətə tɩ̀án nə bubwi ba kə Ba-Yígúrə́-Jə-Tiu nə, dɩ̀àn tɩ̀án nə fɩfɩn ba yɩrɩ, Ba-Yígúrə́-Jə-Tiu wá tʋn jonu, ʋ pa ʋ bà ʋ jon ba, yá ʋ wá zɩgɩ ba jɩrɩmʋ, ʋ jon ba ba dʋŋa jɩɩn wa. 21 Kʋ máŋá tə wa, Ba-Yígúrə́-Jə-Tiu wá bɩrɩ ʋ tɩ̀àn Ezwipətə tɩ̀án nə, yá Ezwipətə tɩ̀án wá lwarɩ wá. Ba wá fwa jwəŋə də zìlə́ wiən, ba ma pa dun Ba-Yígúrə́-Jə-Tiu nə. Ba wá kàn níə́ Ba-Yígúrə́-Jə-Tiu con, yá ba wá pa tə nii sú. 22 Mə nətʋ nə Ba-Yígúrə́-Jə-Tiu, wá mà Ezwipətə tɩ̀án. Ʋ wá mà ba, yá ʋ wá pa ba yazurə. Ba wá pìí ba bà Ba-Yígúrə́-Jə-Tiu con, yá ʋ wá sɛ̀ ʋ cʋgʋ ba lòrí tə, ʋ ga pa ba yazurə.
23 Kʋ máŋá tə wa, cwəŋə wá ya lá, ka nə naŋa Ezwipətə lʋʋ nii, ka vəli Asiiri lʋʋ nii. Asiiri tɩ̀án wá va Ezwipətə lʋʋ nii, yá Ezwipətə tɩ̀án də wá va Asiiri lʋʋ nii, yá Ezwipətə tɩ̀án də Asiiri tɩ̀án mɛ wá tʋn ba pa Ba-Yígúrə́-Jə-Tiu nə.
24 Kʋ máŋá tə wa, Yɩzərayɛlə lʋʋ nii tə wá ya batwa nii lʋʋ nii, kʋ súrí Ezwipətə də Asiiri lʋʋ níə́ tə nə, tə nə yɩ Yɩɩ zəni tə, ʋ nə fwa lʋʋ mɛ yɩra mɩmɩnʋ. 25 Ba-Yígúrə́-Jə-Tiu, ʋ nə yɩ kwatara Yɩɩ wá fwa zəni lʋʋ níə́ təntə yɩra, ʋ swɩ̀n ʋ wʋ́: «À fwa zəni à Ezwipətə tɩ̀án yɩra, ba yɩ à mʋ̀ lɩ̀à. À wá fwa zəni Asiiri lʋʋ nii tə yɩra, à nə fwa də à jɩ̀àn, də Yɩzərayɛlə lʋʋ nii tə yɩra, kʋ nə yɩ à mʋ̀ tori!»