Yɩɩ sʋgʋ tə nə zɩga Kuswə tɩ̀án nə
18
1 Nə̀ń kʋ lɛɛ nyɩɛn, kʋ pa lʋʋ nii tə nə,wopərən nə mà tə vànà kʋ wa,
Kuswə mʋnɛɛ tə kwa con,
2 lʋʋ nii tə nə tʋŋa tʋntʋna mʋʋ tə yuu wa,
nɩ́á yuu bwərə wa, ba nə fwa də gunmʋʋ!
Tʋntʋna-ba, á nɛɛ nə lɩŋa tɩa,
á vələ ləzwəndaran dwíí con,
ba yɩra nə swələ.
Á vələ lalʋʋ con,
ba dɩ̀àn nə ba kamandon jə,
kʋ nə zɩgɩ kʋ jɩjʋ mama.
Ba yɩ lʋʋ dwíí ba nə jə dɩ̀àn,
ba nɩŋɩ won mama ba tɩtaga,
yá ba lʋʋ nii tə yɩ mʋnɛɛ nə gàrɩ̀ kʋ nə.
3 Á mʋ̀ lʋʋ ləzoni tə mama,
á nə wulə tɩa yuu wa,
máŋá tə ba nə zɩ̀n kʋ̀ʋ̀ mɩmɩnʋ yɩɩ nə,
pɛɛn tə yuu wa, á wá na kʋ.
Máŋá tə ba nə wúrí kʋ̀ʋ̀ nabwanʋ,
á wá nì kʋ kori.
4 Cɩ́gá, Ba-Yígúrə́-Jə-Tiu swɩ̀n à con, ʋ wʋ́:
«À zɩga à bwálɩ́ nə sənbwen, yá à ywàŋá,
ndə yɩcayana poni bárɩ́ nə,
nə à yə̀ə́ ndə nyʋ̀nʋ̀ fun nə, wocəri máŋá wa.
5 Yá də woceri máŋá tə wà yí,
máŋá tə wiən nə fwa pùnə́ tə zwɛ̀,
máŋá tə pùnə́ tə nə jìgə̀ divɛn tɩ̀án bɩ̀á tə nə bɩga,
ba yàá ja sɩkwara ba goŋə
naywalan tə nə wà bɩ̀á zɩn,
ba lɩ tɩ̀án tə dəkurən tə yɩra,
ba ga tʋtwə nɛɛ tə nə twə̀ vʋran zənzən.
6 Mə nətʋ nə ba wá vɩ
Kuswə tɩ̀án mama ba dʋgʋ,
ba pa pɛɛn yuu dələn nə,
də tɩa yuu ganaŋa nə.
Dələn tə wá də́ ba tɩpwən wa,
yá tɩa yuu ganaŋa tə wá də́ ba yɩdɩɩn wa.
7 Kʋ máŋá tə wa, ləzwəndaran dwíí tə ba yɩra nə swələ, lalʋʋ tə ba dɩ̀àn nə ba kamandon jə, kʋ nə zɩgɩ kʋ jɩjʋ mama, dwíí tə nə jə dɩ̀àn, ba nɩŋɩ won mama ba tɩtaga, yá ba lʋʋ nii yɩ mʋnɛɛ nə gàrɩ̀ kʋ nə, wá ja zìlə́ wiən ba bà, ba pa Ba-Yígúrə́-Jə-Tiu nə, ʋ nə yɩ kwatara Yɩɩ. Ba wá ja tə ba bà bwálɩ́ tə nə Ba-Yígúrə́-Jə-Tiu, ʋ nə yɩ kwatara Yɩɩ yɩrɩ tə nə wulə, Siyon paan tə yuu wa.