Yɩɩ sʋgʋ tə nə zɩga Damasə tɩʋ tə nə
17
1 Yɩɩ sʋgʋ tə nə zɩga Damasə tɩʋ tə nə:Á nəŋə, Damasə kʋ́ʋ̀ bá ya tɩʋ,
kʋ wá jì dibwərən dədolu.
2 Ba wá vɩ Aroyɛrə tɩan tə ba dʋgʋ,
ba pa vàná nə.
Tə wá pə̀ń lá tə sìí,
yá lìù mama bá wʋwalɩ tə.
3 Efərayimə dɩ̀àn dəkuu bwálɩ́ tə wá cʋ̀gʋ̀,
Damasə payuu tə, də Siiri lʋʋ nii tə
gɩganɩ tə yɩrɩ kʋ́ʋ̀ bá bon:
Tə də wá kwɩ̀n tə dun nə,
ndə Yɩzərayɛlə lɩ̀à nə.
Ba-Yígúrə́-Jə-Tiu, ʋ nə yɩ kwatara Yɩɩ nii sʋgʋ nə!
4 Kʋ máŋá tə wa,
Zwakɔbə dwíí tə wá kwɩ̀n ba dun nə,
yá ba dàń wá jì ndə kətilu nə.
5 Ba wá ya ndə woceru nə yàá goŋə mɩyun,
ʋ pú duən yuu, woceri máŋá wa,
yá ʋ bà ʋ pɛ̀ tə, ʋ kə ʋ vakoo wa.
Ba wá ya ndə máŋá tə wa,
ba nə guni mɩyun Refayimə vara tə wa.
6 Wogunə nədʋ nədʋ wá ga lá,
ndə ba nə bɩbaga olivə* tɩ̀ʋ́,
ba na bɩ̀á bələ,
nə à yə̀ə́ batwa kʋ yupara wa,
bɩ̀á banɩa, nə à yə̀ə́ bonu kʋ nɛɛ wa.
Ba-Yígúrə́-Jə-Tiu, ʋ nə yɩ Yɩzərayɛlə lɩ̀à Yɩɩ nii sʋgʋ nə!
7 Kʋ máŋá tə wa, ləzwənə wá viviri ʋ yáá ʋ te Yɩɩ tə con, ʋ nə dɩga wá, yá ʋ wá zɩ̀n ʋ yɩ́á ʋ kə Yɩzərayɛlə lɩ̀à Yɩɩ tə con, ʋ nə yɩ parɩ*. 8 Ʋ kʋ́ʋ̀ bá kə ʋ yáá jwəŋə bwálá tə con, tə nə yɩ ʋ tətə jɩ̀àn nə fwa, yá ʋ kʋ́ʋ̀ bá balɩ woŋwanan tə, ʋ tətə jɩfwɩ nə fwa, də Aswera* daceli tə, də wiən tə ba nə ma sʋ̀rɩ́ wusinə.
9 Kʋ máŋá tə wa, Yɩzərayɛlə tɩan tə ba nə lwə̀ ba kɩkarɩ də biritaŋan wà ya ndə dabii nə pún wa, nə à yə̀ə́ pɛɛn yuparɩ wa. Tə wá ya ndə Evi dwíí tə, də Amɔrə dwíí tə nə dəri ba nan ba yá ba tɩan tə nətʋ, Yɩzərayɛlə lɩ̀à tə yáá con. Yá kʋ wá cʋ̀gʋ̀, kʋ jì kasɔɔ lanworu.
10 Cɩ́gá, Yɩzərayɛlə lɩ̀à-ba,
á swɛ̀ɛ́ Yɩɩ tə yoo, ʋ nə yɩ á jonu,
á wà pɩ̀ʋ̀ tə nə yɩ á yisəgə bwálɩ́ tə yoo lìí.
Kʋ mʋ̀ nə pɩn á ma cwɛn tɩ̀án tə nə jə fɩra,
á ga dwì wodwii nəkaran,
á ma pɩn dun woŋwanan nə.
11 Máŋá tə á nə dùə̀ tə,
á yàá ywàń tə yuu, tə pɛ́n,
tə bori lala, tə fwa pùnə́.
Yá máŋá tə wa, á nə mɛ
sə á fwa tə lənə koru pupwən,
á wá kwɩ̀n tə nə,
yá á càn tə wá va tʋtʋ.
Lalʋʋ kapʋpʋ zizigu
12 Nə̀ń kʋ lɛɛ nyɩɛn! Á cʋga zizigu,
ndə lalʋʋ kapʋpʋ zizigu nə!
Ba fʋrɩ ndə mʋʋ nə fʋrɩ nətʋ,
ba wùrì ndə lʋʋ dwíə́ kapʋpʋ nə,
ba wùrì ndə navoo nə, ka nə jə dɩ̀àn.
13 Lʋʋ dwíə́ tə wùrì ndə nɩ́á kapʋpʋ nə.
Ba-Yígúrə́-Jə-Tiu caga ba nii nə,
yá ba dəri ba va yiŋʋnɩ.
Ʋ laga ba duən yáá nə,
ndə pɛɛn yuu gakʋrʋ nə, vʋʋ nə laga,
nə à yə̀ə́ ndə kəduə casʋʋ nə kʋa, kùlì jànɩ̀.
14 Didəni nə, kʋ yàá yɩ bɩcapuri,
yá dʋŋa tə mama yàá nyʋn lá,
də tɩa tə wà pʋrɩ!
Mə yoo nə, kʋ nə wá yí lɩ̀à tə nə vɩrɩ nəba,
mə yoo nə, kʋ nə dànɩ̀ ba tə nə jànɩ̀ nə wiən.