Mʋabə tɩ̀án lòrì Zwerizalɛmə tɩ̀án sáŋʋ́
16
1 Mʋabə tɩʋ tɩ̀án tə swɩ̀n, ba wʋ́:«Á tʋŋa pabɩa á pa ka va
ka pa lʋʋ nii tə yáá tíú tə nə.
Á zɩga Sela nə, á tʋn ka,
á pa ka twá kasɔɔ lanworu tə wa,
á pa ka va Siyon bʋ̀áa paan tə yuu.»
2 Mʋabə tɩ̀án bwɩ̀ɩ́ tə wá ywan
Arənon nacoru tə nii nə, ndə zuŋə nə,
ba nə dɩŋɩ ba lɩ ka pwalʋ wa.
3 Mʋabə tɩ̀án lòrì Zwerizalɛmə tɩ̀án, ba wʋ́:
«Á Pɩan nəba kwìə̀,
á kúrə́ kʋ tə nə yɩ cɩ́gá cwəŋə,
á tì á pa nəba.
Á kwálá nə yuu nə yɩcakʋrʋ wa,
sə nə ya á ywárɩ́ wa, ndə tɩtɩn nə.
Á joŋə ba tə dʋŋa nə dɩŋɩ sə ba ja,
á səgə á con,
á dànà ká ja lìù tə nə dəri sə ʋ jɛ́n, á pa.
4 Á yágá sə nə lɩ̀à tə nə dəri ba bà,
sə ba kwálɩ́ ba yuu á con, ya á con,
sə ba wànɩ́ ba jɛ́n cʋcʋnyiən tə yáá nə.
Cɩ́gá, máŋá don wa, fɩfɩan tə wá zwɛ̀,
cʋcʋran tə wá cən tə zɩgɩ,
lìù tə nə cʋ̀gà lʋʋ nii tə wá nyʋn lá.
5 Yá kʋ dàń wá twá də wʋywaŋʋ*,
padaʋ tə ma ja dɩ̀àn.
Lìù wá nan pɩ̀ʋ́ Davidə dwíí tə wa,
ʋ jə̀ń padaʋ təntə yuu wa də cɩ́gá.
Ʋ wá sóní kʋ tə nə yɩ mənəmənə,
ʋ ga wá bʋ̀rɩ̀ bʋra,
ʋ pa kʋ twá cɩ́gá cwəŋə nə,
ndə kʋ nə mɛ nətʋ.»
Zwerizalɛmə tɩ̀án wàrɩ̀ Mʋabə tɩ̀án nə ba saŋa
6 Nə nì Mʋabə tɩ̀án fwìə́ tə yoo,
ba lamɛɛ tə dwə jɩɩn,
ba jə yɩrʋ zənzən,
ba swə sə ba zɩ̀n ba tɩ̀àn yɩɩ nə zənzən,
ba ga jə fafalɩ sʋ̀ràn, də sʋvɛɛ.
7 Kʋ mʋ̀ nə pɩn
Mʋabə tɩ̀án kwi ba pɩn ba tɩ̀àn nə,
yá ba mama dàń dɩ lúə́ pucʋnɩ gwaran:
Ba pùə́ cʋ̀gʋ̀ zənzən,
yá ba dàń kwɩ̀n Kirə-Haresɛtə divɛn tɩ̀án bɩ̀á tə nə,
ba nə cili ba kə duən nə, tə kʋ̀.
8 Cɩ́gá, Ɛswəbon tɩ̀án kárɩ́ tə kʋa.
Sibəma divɛn tɩ̀án tə pɩ̀nɩ̀,
yá tə mʋ̀ divɛn yà nə janɩ lʋʋ dwíə́ tə pɛ̀gá.
Tə yà tɩɩn nɛɛ tə va tə nan Yazɛrə nə,
tə ga sú tɩa mama, kasɔɔ lanworu tə wa,
yá tə naywalan tɩɩn tə va tə kɛ̀ń mʋʋ tə yuu.
9 Kʋ mʋ̀ nə pɩn
à kwi Sibəma divɛn tɩ̀án kárá tə nə,
ndə Yazɛrə tɩ̀án nə kwi ka nə nətʋ.
À wá nyɩn aba də à yinɩa,
Ɛswəbon də Eleyale tɩ̀án-ba!
Cɩ́gá, kʋ̀ʋ̀ cə̀rí twi tə jon á woceri,
də á tɩ̀án lənə pʋ̀rʋ́ pupwən cə̀rí tə bwálɩ́.
10 Pupwən də jwɩa nyʋan tɩ̀án kárɩ́ tə wa.
Divɛn tɩ̀án kárɩ́ tə wa pupwən cə̀rí tə,
də wuwuli tə kʋ́ʋ̀ ba mà!
Lɩ̀à tə nə nɩŋɩ divɛn tɩ̀án bɩ̀á gwàlán wa,
kʋ́ʋ̀ ba tə nɩŋɩ.
À mʋ̀ Ba-Yígúrə́-Jə-Tiu pɩn
pupwən cə̀rí tə nyʋn lá.
11 Kʋ mʋ̀ nə pɩn
à waa wʋwanɩ Mʋabə yɩrɩ, ndə bànʋ́ nə,
à pùə́ ga cʋ̀gʋ̀ Kirə-Harɛsə yɩrɩ.
12 Mʋabə tɩ̀án wulə ba wʋwalɩ ba tɩ̀án,
jwəŋə dədwələn tə yuu wa.
Ba twi ba yɩɩ wúlú bwálɩ́ tə wa,
sə ba fwa yɩlori,
yá ba wàrɩ̀ sáŋʋ́ mama ba nɩ.