Yɩɩ sʋgʋ tə nə zɩga Mʋabə tɩ̀án nə
15
1 Yɩɩ sʋgʋ tə nə zɩga Mʋabə tɩ̀án nə:Arə-Mʋabə tɩʋ tə cʋ̀gʋ̀ tɩtɩn nədʋ cɩcɩ wa,
kʋ nyʋan lá tɩtɩn nədʋ cɩcɩ wa.
Kirə-Mʋabə tɩʋ tə cʋ̀gʋ̀ tɩtɩn nədʋ cɩcɩ wa,
kʋ nyʋan lá tɩtɩn nədʋ cɩcɩ wa.
2 Dibon tɩ̀án dɩ̀gà ba yɩɩ dìə̀ tə wa,
ba dɩ̀gà ba jwəŋə dədwələn tə yuu sə ba kwi.
Mʋabə tɩ̀án dɩga lúə́ pucʋnɩ gwaran
Nebo paan tə yuu wa, Medəba nə.
Yun tə mama pàrɩ́,
twaŋa tə mama fɩnɩ.
3 Ba zʋa ganlwɛɛ gànàn ba ja wulə coŋi tə yuu wa.
Ba mama yɩ ba dɩ lúə́ pucʋnɩ gwaran,
yá ba kwi ba sisigə dəyun wa, də kanpwərən wa.
4 Ɛsəbon də Eleyale tɩ̀án mà bubwiə,
ba kori va kʋ nan Yahasə nə.
Kʋ mʋ̀ nə pɩn Mʋabə tɩ̀án kwatara mà cə̀rə́,
fən nə pɩn ba nɛɛ tɩ yɩrɩ.
5 À kwi à pɩn Mʋabə nə, à waa con:
Kʋ lɩ̀à dəri ba va ba nan Sʋarə,
də Egəlatə-Sweliswiya nə.
Cɩ́gá, ba dɩ̀ Luhitə dədolu tə də ba kwi,
yá ba kwi yinəgə kwirə Horonayimə cwəŋə tə wa.
6 Cɩ́gá, Nimərimə nɩ́á tə wʋa,
gaʋ tə kʋa, galɩʋ tə pɩ̀nɩ̀,
wolɩʋ mama kʋ́ʋ̀ tə̀lə́.
7 Kʋ mʋ̀ nə pɩn ba pɛ̀ ba wiən gɩganɩ,
ba zɩŋa ba jɩjə wiən,
ba ja galɩ bʋlatwalan nacoru tə kwa con.
8 Cɩ́gá, bubwiə kɩkarɩ Mʋabə lʋʋ nii tə mama.
Kʋ cə̀rí tə vəli tə nan Egəlayimə nə,
kʋ cə̀rí tə vəli tə nan Bɛrə-Elimə nə.
9 Cɩ́gá, Dimon nɩ́á tə súə́ də jana,
yá à tə wá pa lɛɛ duən yí Dimon:
À wá kə gəru Mʋabə tɩ̀án tə nə,
ba nə tɩga ba ga,
də lʋʋ nii tə wa lɩ̀à tə gɩganɩ tə nə.