Yɩzərayɛlə lɩ̀à wá pìí ba bà ba lʋʋ nii tə wa
14
1 Cɩ́gá, Ba-Yígúrə́-Jə-Tiu wá dəri Zwakɔbə dwíí tə yinəgə, ʋ tə wá kúrí Yɩzərayɛlə lɩ̀à, yá ʋ wá pìí ʋ tún ba ba lʋʋ nii tə wa. Vərə wá twá ba nə, ba zʋ Zwakɔbə dwíí tə wa.2 Dwíə́ nəkaran* tə wá kə ba cwəŋə nə, ba ja ba ba pìí ba va ba lʋʋ nii wa. Yá Yɩzərayɛlə lɩ̀à dìə̀ tə wá jon ba ndə tori nə Ba-Yígúrə́-Jə-Tiu tɩa tə wa, ndə tʋtʋnbɩa də tʋtʋnkanɩ nə. Ba wá ja ba tə yà nə jɩn ba, ba ma fwa ywəŋə ndə ba ywəŋə nə, yá ba wá də́ dɩ̀àn lɩ̀à tə nə fɩfɩn ba yuu wa.
Babɩlɔnə pɩ̀ʋ́ tə tʋrɩ yoo
3 Yɩzərayɛlə lɩ̀à-ba, máŋá tə Ba-Yígúrə́-Jə-Tiu nə pɩn aba sìə́, á gwàrʋ̀ tə də á wʋwalʋ tə kwa nə, də yontʋtʋncaran tə ba nə kalɩ aba, ba pa á tʋŋa kwa nə, 4 á dàń wá swɩ̀n zwankasarɩ tə tə,
á zɩgɩ Babɩlɔnə pɩ̀ʋ́ nə, á wʋ́:
Kʋ yɩ kʋ twá nətə?
Lìù tə nə fɩfɩn lɩ̀à tə kʋ́ʋ̀ tə̀lə́!
Dɩ̀àn jalɩʋ tə zwɛ̀!
5 Ba-Yígúrə́-Jə-Tiu kɛ́n wʋlʋnyɩna dangolu tə,
ʋ nyʋnyʋgʋ dɩ̀àn tɩ̀án dadɩlʋ tə.
6 Lìù tə yà nə mà lalʋʋ də lɩŋa tə nə fʋrɩ, ʋ ba sìí,
lìù tə yà nə də́ dɩ̀àn lʋʋ dwíə́ tə yuu wa də lɩŋa,
ʋ də dàń jìgə̀ lìù,
ba kəni dɩ̀àn ba dɩŋɩ sə ba ja.
7 Lʋʋ nii tə mama dàń wulə sìə́ wa sənbwen,
yá ba mà pupwən cə̀rí.
8 Nyənbori də tətə, də Liban sɩsaban
fwa pupwən n tʋrɩ tə yɩrɩ,
tə ga swɩ̀n, tə wʋ́:
«Kʋ nə zɩgɩ máŋá tə wa n nə tʋa,
dagonu mama kʋ́ʋ̀ ba twi ʋ goŋi nəba.»
9 Ciru gigiri tɩa də̀ń nə, n yɩrɩ,
sə kʋ ma jəri mʋ́, n túrí máŋá wa.
Kʋ zɩ̀n tɩga dwiən nə, n mʋ̀ yɩrɩ,
kʋ zɩ̀n lɩ̀à tə mama,
ba nə yɩn ləzwənfaran tɩa yuu wa,
kʋ pɩn lʋʋ dwíə́ pɛ̀gá tə mama
zàn ba padaran yuu.
10 Ba mama jon sʋgʋ,
sə ba swɩ̀n n con, ba wʋ́:
«N də ba dɩ̀àn jə ndə nə nə,
n də jìgə̀ ndə nə nə!»
11 Ba dɩlɩ n dun tə ciru nə,
də banan zizigu tə.
N yipaa bwálɩ́ yɩ zənzʋran nə larɩ lá,
yá zənzʋmɩnɩ nə yɩ n gansara.
12 Kʋ yɩ kʋ twá nətə?
Nə̀ń mʋ́ nə, n nan lanworu wa, n tʋ tɩa,
kacɩlacɔɔ tə nə pɩpɩlɩ, tɩbɩlakʋnʋ bìú!
Ba zɩn mʋ́ ba dɩ tɩa,
n mʋ̀ lìù tə nə dí dɩ̀àn lʋʋ dwíə́ tə yuu wa!
13 N yà swɩ̀n n waa con, n wʋ́:
«À wá dɩ̀ lanworu wa,
à tún à padaʋ Yɩɩ kacɩlacɛɛ tə yuu con,
à wá jə̀ń yɩa jə́rə́ paan tə yuu wa,
jɩzən saparʋ nii yígúrə́ con.
14 À wá dɩ̀ bakwan tə yupara wa,
à ga wá nyən ndə Baan Yɩɩ nə.»
15 Yá ba yigu mʋ́ ba dɩ ciru nə,
tɩan bʋʋ wa, kʋ də̀ń nə lu.
16 Lɩ̀à tə nə na mʋ́, fin ba yɩ́á ba kə n yuu,
ba ywàŋá mʋ́ zəən,
ba ga bwe ba tɩ̀àn, ba wʋ́:
«Bɛɛ wà tə yà nə pɩn tɩa tə vuvugə,
ʋ pɩn payun vɩvaga,
17 ʋ pɩn lʋʋ tə jì kasɔɔ lanworu,
ʋ cʋ̀gà tɩfaran,
yá ʋ ba lɩ̀à tə ʋ nə jɩn kʋ̀ʋ̀ wa,
ʋ ma fwa ywə́ŋə́ dʋga,
ʋ pɩn ba pìrí ba vìrí tə naaa?»
18 Lʋʋ dwíə́ pɛ̀gá tə mama,
awo, ba mama,
ba lìù mama tígə́ ʋ libəri wa də dun.
19 Yá ba dɩlɩ n mʋ́ yiŋʋnɩ də n libəri,
ndə tɩ̀ʋ́ naa nə, ba nə pɩrɩ ba dʋgʋ.
N tígə́ lɩ̀à tə ba nə gʋa də kwatara sɩ̀ʋ́ titəŋi wa,
ba nə bibili ba dɩ pɩ̀ʋ̀ bʋʋ wa,
ndə tɩgɩ nə, ʋ nə ba dun jə.
20 Ba bá kə mʋ́ libəri wa,
ndə pɛ̀gá tə duən nə.
Cɩ́gá, n cʋ̀gʋ̀ n lʋʋ nii, n gʋa n lʋʋ lɩ̀à tə.
Ba kʋ́ʋ̀ bá bon wʋlʋnyɩna dwíí tə yɩrɩ də mama.
21 Á tana bɩ̀á tə gʋrɩ,
ba nyɩna-ba cʋna tə yɩrɩ,
sə ba dàn ká pìí ba zàn ba jon tɩa tə,
ba kʋ́ʋ̀ lwà tɩan ba sú lʋʋ tə nii.
22 Ba-Yígúrə́-Jə-Tiu, ʋ nə yɩ kwatara Yɩɩ swɩ̀n, ʋ wʋ́: «À wá zàn à zɩgɩ ba nə, yá à wá pa Babɩlɔnə yɩrɩ jɛ́n. À wá cʋ̀gʋ̀ kʋ gɩganɩ tə, də kʋ dwíí tə yáá də kʋ kwa. À mʋ̀ Ba-Yígúrə́-Jə-Tiu nii sʋgʋ nə! 23 À wá pa kʋ jì vara, sarɩkwɩa yipaa bwálɩ́, à ga ja cʋcʋran zɛn à ma zwarɩ kʋ. À mʋ̀ Ba-Yígúrə́-Jə-Tiu, à nə yɩ kwatara Yɩɩ nii sʋgʋ nə!»
Yɩɩ sʋgʋ tə nə zɩga Asiiri tɩ̀án nə
24 Ba-Yígúrə́-Jə-Tiu ʋ nə yɩ kwatara Yɩɩ
dùə̀, ʋ swɩ̀n, ʋ wʋ́:
«Cɩ́gá mama, yoo tə à nə bʋŋa sə à tʋn
wá jì, ndə à nə bʋŋa nətʋ,
yá kʋ tə à nə ken sírí sə à tʋn
nii wá sú, ndə à nə tanɩ kʋ nətʋ!
25 À wá nyʋnyʋgʋ Asiiri tɩ̀án tə, à lʋʋ nii tə wa,
à wá nɩŋa ba də nɛɛ, à pɛɛn tə yun wa,
yá à wá lɩ ba nɩan bɩan dàʋ̀ tə,
də ba zɩlɩ tə à lɩ̀à tə pàrà wa.»
26 Mə táná nə Ba-Yígúrə́-Jə-Tiu nə tanɩ,
ʋ zɩgɩ tɩa tə mama nə,
mə jɩɩn nə ʋ nə zɩ̀n lʋʋ dwíə́ tə mama yuu wa.
27 Ba-Yígúrə́-Jə-Tiu, ʋ nə yɩ kwatara Yɩɩ
nə kúrí ʋ tì sə ʋ tʋn nətʋ:
Wàà nə wàá kʋ yáá nə ʋ cɩ̀?
Ʋ zɩ̀n ʋ jɩɩn sə ʋ mà:
Wàà nə wàá ʋ pɩn ʋ pìí ʋ kʋ̀rɩ́ kʋ?
Yɩɩ sʋgʋ tə nə zɩga Filisi tɩ̀án nə
28 Pɩ̀ʋ́ Ahazə tɩan bɩnɩ nə nə, Yɩɩ swɩ̀n sʋgʋ kʋ tə, ʋ zɩgɩ Filisi tɩ̀án nə:
29 Á dànà ká fwa pupwən, á mʋ̀ Filisi lʋʋ lɩ̀à tə mama,
dangolu tə yà nə mà aba nə kɛ́n yɩrɩ.
Cɩ́gá, kapaa wá nan dən don yɩra,
yá kʋ dwíí wá ya bancaŋʋ,
kʋ nə piri, kʋ cwan ga wiri.
30 Lalaŋa dàń wá na wodiu ba də́,
zʋra də ga wá pə̀ń ba sìí də yazurə.
Yá à wá pa á mʋ̀ dwíí tə tɩ də niən,
à ga pa dʋŋa gʋ á lɩ̀à tə gɩganɩ tə.
31 Á dɩa lúə́ pucʋnɩ gwaran, mimien-ba!
Tɩan-ba, á maga bubwiə!
Pa jɩgwarʋ zʋ mʋ́,
n mʋ̀ Filisi lʋʋ nii tə mama!
Cɩ́gá, ŋwɩn nan jɩzən saparʋ con tə bɩ̀àn,
yá ladʋa tətə wà dʋŋʋ tə lɩ̀à tə nii nə mùrì.
32 Bɛ̀ɛ̀ nə nə wá le lalʋʋ təntə tʋntʋna tə?
Nə wá le də
Ba-Yígúrə́-Jə-Tiu nə tún Siyon tɩʋ tə,
sə ʋ lalʋʋ tə yinənyɩna na yuu yikwala bwálɩ́ kʋ wa.